ព្រឹកថ្ងៃទី១៣ ខែកុម្ភៈ ឆ្នាំ២០២០ នេះ សហព័ន្ធជាតិនៃសមាគមយូណេស្កូជប៉ុន សហការជាមួយមន្ទីរអប់រំ យុវជន និងកីឡាខេត្តសៀមរាប បានបើកវគ្គបណ្តុះបណ្តាលស្តីពីការកសាងផែនការ ការត្រួតពិនិត្យនិងវាយតម្លៃ និងសរសេររបាយការណ៍ ជូនដល់គណៈកម្មការគ្រប់គ្រងនៃមជ្ឈមណ្ឌលសិក្សាសហគមន៍ក្នុងខេត្តសៀមរាប មន្ត្រីអប់រំនៃការិយាល័យអប់រំក្រៅប្រព័ន្ធ មកពីបណ្តាស្រុកទាំង១២ របស់ខេត្តសៀមរាប សរុប៥០នាក់។
គួរជម្រាបថា វគ្គបណ្ដុះបណ្ដាលនេះ នឹងជួយពង្រឹងសមត្ថភាពមន្ត្រីបុគ្កលិកពាក់ព័ន្ធ ក្នុងការគ្រប់គ្រង មជ្ឈមណ្ឌលសិក្សាសហគមន៍ ដែលជាមជ្ឈមណ្ឌលផ្តល់ឱកាសសិក្សា ដល់ប្រជាពលរដ្ឋងាយរងគ្រោះ ទុរគត៌ជន អនក្ខរជន និងសិស្សដែលបោះបង់ចោលសាលាគ្រប់វ័យ ឲ្យទទួលបាននូវការអប់រំជាមូលដ្ឋាន តាមរយៈកម្មវិធីពហុវិស័យរបស់ខ្លួន។
លោក លោក នង វុត្ថា នាយកអង្គការសហព័ន្ធជាតិនៃសមាគមយូណេស្កូជប៉ុន បានពន្យល់ថា ការងារអ្វីក៏ដោយ មិនអាចដំណើរការប្រកបដោយជោគជ័យបាននោះទេ បើពុំមានការកសាងផែនការច្បាស់លាស់នោះ។ មានផែនការសម្រាប់ការអនុវត្តហើយ តែពុំមានការតាមដានត្រួតពិនិត្យ និងវាយតម្លៃទេនោះ គឺស្មើនឹងការធ្វើសកម្មភាព ដោយពុំមានការគ្រប់គ្រង ។ ក្នុងនោះ របាយការណ៍ ក៏ជាកត្តាសំខាន់ផងដែរ សម្រាប់កត់ត្រាគ្រប់សកម្មភាពទាំងឡាយ ដែលបានខិតខំប្រឹងប្រែងអនុវត្តកន្លងមក។ គ្មានរបាយការណ៍ នោះគឺស្មើនឹងមិនបានធ្វើអ្វីទាំងអស់ ព្រោះភស្តុតាងសកម្មភាព ត្រូវបានរក្សាទុកនៅក្នុងរបាយការណ៍ទាំងនោះ ។
មានប្រសាសន៍ក្នុងឱកាសនោះ លោក កុយ ផល ប្រធានការិយាល័យអប់រំក្រៅប្រព័ន្ធ នៃមន្ទីរអប់រំយុវជន និងកីឡាខេត្តសៀមរាប លើកឡើងថា ដើម្បីឆ្លើយតបទៅនឹងរបត់តម្រូវការសង្គម ការសិក្សាពេញមួយជីវិតបានដើរតួនាទីយ៉ាងសំខាន់ ក្នុងការផ្តល់នូវការអប់រំជាមូលដ្ឋានសម្រាប់សហគមន៍ ។
គួរបញ្ជាក់ថា មកដល់ពេលនេះ នៅក្នុងខេត្តសៀមរាប មានមជ្ឈមណ្ឌលសិក្សាសហគមន៍ ដែលកំពុងដំណើរការចំនួនសរុប២១កន្លែង ក្នុងនោះ ១៨កន្លែង បង្កើតឡើងដោយអង្គការសហព័ន្ធជាតិ នៃសមាគមយូណេស្កូជប៉ុន និង៣កន្លែងផ្សេងទៀត ជាមជ្ឈមណ្ឌលសិក្សាសហគមន៍របស់រដ្ឋ ។ ការបង្កើតឡើងនូវមជ្ឈមណ្ឌលនេះ ស្ថិតក្នុងគោលបំណងផ្តល់ឱកាសសិក្សាដល់ប្រជាពលរដ្ឋដែលងាយរងគ្រោះ ទុរគត៌ជន អនក្ខរជន និងសិស្សដែលបោះបង់ចោលសាលាគ្រប់វ័យ ឲ្យទទួលបាននូវការអប់រំជាមូលដ្ឋាន តាមរយៈកម្មវិធីពហុវិស័យរបស់មជ្ឈមណ្ឌលនេះ មានដូចជា ៖ កម្មវិធីអក្ខរកម្ម កម្មវិធីសមមូលបឋមសិក្សា អាហារូបត្ថម្ភ កម្មវិធីមត្តេយ្យសាលាសហគមន៍ បណ្ណាល័យ កម្មវិធីបំណិនជីវិត និងកម្មវិធីចំណូលគ្រួសារផ្សេងៗទៀត ។
អត្ថបទ និង រូបភាព៖ ងិន គឹមឡេង
កែសម្រួល៖ សេង ផល្លី
