នាព្រឹកថ្ងៃទី១៣ ខែកុម្ភៈ ឆ្នាំ២០២០នេះ រដ្ឋបាលខេត្តសៀមរាប បានរៀបចំបើកកិច្ចប្រជុំគណៈកម្មាធិការសម្របសម្រួលបច្ចេកទេសរបស់ក្រុមប្រឹក្សាខេត្ត ក្រោមអធិបតីភាពលោក ង៉ាន់ ភិរុណ អភិបាលរងខេត្ត និងជាប្រធានគណៈកម្មាធិការសម្របសម្រួលបច្ចេកទេសរបស់ក្រុមប្រឹក្សាខេត្ត ដែលហៅកាត់ថា គ.ស.ប ដោយមានការអញ្ជើញចូលរួមពីសំណាក់ឯកឧត្ដម លោក លោកស្រី ជាសមាជិក្ក្រុមប្រឹក្សាខេត្ត ថ្នាក់ដឹកនាំមន្ទីរ អង្គភាពនានាក្នុងខេត្ត និង អភិបាលស្រុកពាក់ព័ន្ធមួយចំនួន ដើម្បីធ្វើការពិភាក្សា និង អនុម័តទៅលើរបៀបវារៈចំនួន៧ ។
របៀបវារៈទាំង៧នេះ រួមមាន ៖ ១. ពិនិត្យនិងផ្ដល់យោបល់លើសេចក្តីព្រាងកម្មវិធីវិនិយោគ០៣ឆ្នាំរំកិល ២០២០-២០២២របស់រដ្ឋបាលខេត្ត , ២. ពិនិត្យ ពិភាក្សា និងដោះស្រាយលើបញ្ហាការលក់ដូររញ៉េរញ៉ៃ នៅជុំវិញរបងមន្ទីរពេទ្យបង្អែកខេត្តសៀមរាប ដែលធ្វើឲ្យបាត់បង់នូវសោភ័ណភាព , ៣. ពិនិត្យ ពិភាក្សា និងចាត់វិធានការលើការលុបប្រព័ន្ធទឹកអមសងខាងផ្លូវ SR7 ពីស្រុកពួក-ស្រុកអង្គរជុំ ជាពិសេសការសាងសង់បំពានយកដីចំណីផ្លូវសម្រាប់រំដោះទឹក ស្ថិតនៅក្នុងភូមិឈូក ឃុំត្រីញ័រ ក្នុងស្រុកពួក , ៤. ពិនិត្យពិភាក្សា និងចាត់វិធានការចំពោះរថយន្តដែលដឹកលើសទម្ងន់ , ៥. ពិនិត្យ ពិភាក្សា និង ដោះស្រាយលើបញ្ហាប្រជាពលរដ្ឋមួយចំនួន ដែលបានចូលកាន់កាប់អាស្រ័យ និងចាត់ចែងដីពាក់ព័ន្ធនេងដីព្រៃសហគមន៍ មានទីតាំងភូមិបុស្សធំ ឃុំខ្នារពោធិ ស្រុកសូទ្រនិគម , ៦. ពិនិត្យនិងធ្វើបច្ចុប្បន្នភាពនៃការដោះស្រាយលើសំណួរ-សំណូមពរ ដែលបានលើកក្នុងវេទិកានិងពិគ្រោះយោបល់របស់ក្រុមប្រឹក្សាខេត្ត អាណត្តិទី២ ឆ្នាំ២០១៨ និង ៧. ពិនិត្យ ពិភាក្សា និងដោះស្រាយលើបញ្ជីសំណួរ-សំណូមពរ ដែលបានលើកក្នុងវេទិកានិងពិគ្រោះយោបល់របស់ក្រុមប្រឹក្សាខេត្ត អាណត្តិទី៣ឆ្នាំ២០១៩ ។
លោក ង៉ាន់ ភិរុណ អភិបាលរងខេត្តសៀមរាប បានមានប្រសាសន៍ថា នេះជាកិច្ចប្រជុំលើកទី១ របស់គ.ស.ប សម្រាប់ឆ្នាំ២០២០ ហើយជាកិច្ចប្រជុំដែលមានសារៈសំខាន់មួយផងដែរ ដែលយើងត្រូវរួមគ្នាដោះស្រាយនូវបញ្ហាប្រឈម និង ក្ដីកង្វល់របស់ប្រជាពលរដ្ឋនៅតាមមូលដ្ឋាន តាមរយៈក្រុមប្រឹក្សាខេត្តសៀមរាបតាំងពីឆ្នាំ២០១៨មក ដូច្នេះក្នុងរបៀបវារៈទាំង៧ដែលបានលើកមកពិភាក្សាក្នុងកិច្ចប្រជុំនាពេលនេះ យើងត្រូវតែពិភាក្សាគ្នាឲ្យបានហ្មត់ចត់ រកឲ្យឃើញគន្លឹះនៃបញ្ហា ហើយដោះស្រាយបញ្ហាឲ្យចំគោលដៅ ដោយឈរលើគោលការណ៍ច្បាប់ជាធំ ព្រោះថាបើសិនជាយើងទាំងអស់គ្នា មិនបាននាំគ្នារួសរាន់ និង ព្យាយាមដោះស្រាយឲ្យបានទាន់ពេលវេលាទេនោះ បញ្ហាប្រឈម និង សេចក្ដីត្រូវការរបស់ប្រជាពលរដ្ឋនឹងកាន់តែមានច្រើនបន្តទៀត ស្របតាមការវិវត្តន៍របស់ខេត្ត ក៏ដូចជាក្នុងសង្គមជាតិយើងទាំងមូល ។
លោក ង៉ាន់ ភិរុណ មានប្រសាសន៍ទៀតថា ដោយសារប្រទេសជាតិមានសុខសន្តិភាព បានផ្ដល់ឱកាសគ្រប់បែបយ៉ាងដល់ប្រជាពលរដ្ឋក្នុងការប្រកបរបររកស៊ីប្រចាំថ្ងៃ ធ្វើឲ្យជីវភាពរស់នៅរបស់ពួកគាត់ កាន់តែមានការរីកចម្រើនទៅមុខជាបន្តបន្ទាប់ ហើយជាមួយគ្នានេះ បញ្ហាសំណូមពរ និង សេចក្ដីត្រូវការរបស់ពួកគាត់ក៏មានច្រើនដែរ ដូច្នេះក្នុងកិច្ចប្រជុំនេះ សូមឲ្យមន្ទីរ-អង្គភាពទាំងអស់ ដែលជាប់ពាក់ព័ន្ធនឹងបញ្ហាសំណូមពររបស់ប្រជាពលរដ្ឋ ត្រូវប្រញាប់ប្រញាល់ ព្យាយាមដោះស្រាយតាមតួនាទី និង ភារកិច្ចរបស់ខ្លួន ហើយលទ្ធផលដែលអាចដោះស្រាយបានក្នុងកម្រិតណានោះ សុំធ្វើជាលាយលក្ខណ៍អក្សរ ជម្រាបជូនមកក្រុមប្រឹក្សាខេត្ត ដើម្បីឲ្យក្រុមប្រឹក្សាខេត្តធ្វើជាមូលដ្ឋាន សម្រាប់ជម្រាបជូនដល់ប្រជាពលរដ្ឋ ដែលជាម្ចាស់សំណួរ-សំណូមពរ ឲ្យពួកគាត់បានយល់ដឹងទាន់ពេលវេលា ៕
អត្ថបទ ៖ លោក លីវ សាន្ត
រូបថត ៖ លោក ហាំ ម៉េងហួត
