នៅព្រឹកថ្ងៃទី ១៣ ខែ កុម្ភះ ឆ្នាំ២០២០នេះ មានករណីសិស្ស ចំនួន១២នាក់ មានអាការៈក្អួតចង្អោរ ស្ថិតក្នុងសាលាអនុវិទ្យាល័យ ជា ស្មន់ ឃុំមានជ័យ ស្រុកប្រាសាទបាគង បន្ទាប់ពីទទួលទាននំបុ័ងដែលលក់នៅតាមសាលា។
តាមរបាយការណ៍របស់សមត្ថកិច្ចនៃអធិការដ្ឋាននគរបាលស្រុកប្រាសាទបាគង បង្ហាញថា នំបុ័ងដែលសិស្សទាំងនោះ បានទទួលទាន ត្រូវបានអ្នកលក់ យកមកពីផ្សាររលួស ស្ថិតក្នុងស្រុកប្រាសាទបាគង មកលក់បន្ត។ បន្ទាប់ពី សមត្ថកិច្ចជំនាញ បានពិនិត្យវត្ថុតាង និងសួរនាំអ្នកលក់នំរូបនោះរួចរាល់ សមត្ថកិច្ចបានអនុញ្ញាតឲ្យអ្នកលក់រូបនោះ ត្រឡប់ទៅគេហដ្ឋានវិញ និងរង់ចាំការសាកសួរបន្ថែមទៀត។
តាមការឲ្យដឹងពីលោកនាយករដ្ឋបាល សាលាស្រុកប្រាសាទបាគង បានបញ្ជាក់ថា បន្ទាប់ពីមានអាការៈពុល និងបានបញ្ជូនសិស្សទាំង ១២នាក់ទៅមណ្ឌលសុខភាពមានជ័យ ក្នុងស្រុកប្រាសាទបាគងនោះ គិតត្រឹមរសៀលថ្ងៃទី១៤នេះ មានសិស្ស ២នាក់បានត្រឡប់ទៅផ្ទះវិញ បន្ទាប់ពីមានសភាពធូរស្រាល ចំណែកឯ១០នាក់ទៀត រំពឹងថានឹងអាចត្រឡប់ទៅផ្ទះវិញនៅល្ងាចនេះផងដែរ។
អត្ថបទ និង រូបភាព៖ ថាច់ ពិសុទ្ធ
កែសម្រួល៖ សេង ផល្លី
