នៅព្រឹកថ្ងៃទី ១៤ ខែ កុម្ភៈ ឆ្នាំ២០២០ នៅសាលាបឋមសិក្សាសម្តេចក្រុមព្រះនរោត្តមរណឬទ្ធិ ស្ថិតនៅភូមិទឹកថ្លា ឃុំខ្នាត ស្រុកពួក ខេត្តសៀមរាប មានរៀបចំ សម្ពោធកាត់ខ្សែបូរ ដាក់ឲ្យដំណើរការជាផ្លូវការ គម្រោងអភិវឌ្ឍន៍សហគមន៍ ដែលមានការគាំទ្រថវិកា ពីសប្បុរសជនមកពីចក្រភពអង់គ្លេស និង ប្រទេសនានា តាមរយៈអង្គការគម្រោងអភិវឌ្ឍន៍សហគមន៍។
តាមការបញ្ជាក់របស់លោក នួន វ៉ានី្ន នាយកប្រតិបត្តិអង្គការគម្រោងអភិវឌ្ឍន៍សហគមន៍ បានឲ្យដឹងថា អង្គការនេះ បង្កើតឡើង ដើមី្បជួយអភិវឌ្ឍន៍សហគមន៍ តាមរយៈវិស័យអប់រំ លើកកម្ពស់ធនធានមនុស្ស និង កាត់បន្ថយ ភាពក្រីក្រ ។ ក្នុងនោះអង្គការបានបណ្តុះបណ្តាលសិស្សានុសិស្ស នូវជំនាញភាសារអង់គ្លេស និង បណ្តុះបណ្តាលគ្រូ ព្រមទាំងការងារអនាម័យសុខភាព ដែលមានការឧបត្ថម្ភគាំទ្រថវិកា ពីសប្បុរសជនមកពីចក្រភពអង់គ្លេស និង ប្រទេសនានា ។ លោកសង្ឃឹមជឿជាក់ផងដែរថា អាជ្ញាធរមូលដ្ឋាន ស្ថាប័នពាក់ព័ន្ធ និងបន្តគាំទ្រ ដើម្បីមានលទ្ធភាព ក្នុងការបន្តជួយគាំទ្រដល់សហគមន៍បន្ថែមទៀត។
មានប្រសាសន៍ លោក សាន ណារិទ្ធ អភិបាលរងស្រុកពួក លើកឡើងថា ការបណ្តុះបណ្តាលធនធានមនុស្ស គឺជាការងារមួយ ដ៏ចាំបាច់បំផុត ដែលមិនអាចខ្វះបាន ដើមី្បរួមចំណែកអភិវឌ្ឍប្រទេសជាតិ ស្របតាមកាលៈទេសៈនៃការរីកចម្រើនផ្នែក វិទ្យាសាស្ត្រ និង សមារណកម្មក្នុងតំបន់។
ព័ត៌មានជាតិ ថ្មីៗ
លោកអភិបាលរងស្រុក បានថ្លែងអំណរគុណ ចំពោះអង្គការអភិវឌ្ឍន៍សហគមន៍ ដែលបានផ្តល់កម្មវិធី អភិវឌ្ឍន៍សហគមន៍ ក្នុងគោលបំណងរួម ចំណែកអភិវឌ្ឍន៍វិស័យអប់រំ និង លើកកម្ពស់ធនធានមនុស្ស និង កាត់បន្ថយភាពក្រីក្រនៅខេត្តសៀមរាប ។ លោកបន្តថា ក្នុងនាមអាជ្ញាធរមូលដ្ឋាន និង ផ្តល់ការគាំទ្រ ប្រកបដោយកាយវិការសប្បុរសធម៌ រួមចំណែកធ្វើឲ្យសម្រេចគោលដៅ នៃការអប់រំសម្រាប់យើងទាំងអស់គ្នា ដើម្បីលើកស្ទួយវិស័យអប់រំដល់សិស្សានុសិស្ស និង កាត់បន្ថយអត្រាបោះបង់ការសិក្សា របស់សិស្សនៅក្នុងខេត្ត ឲ្យបានចូលសាលារៀនឡើងវិញ ។
អត្ថបទ និង រូបភាព៖ ម៉ី សុខារិទ្ធ
កែសម្រួល៖ សេង ផល្លី
