តាមរយៈរូបភាពនៅលើបណ្ដាញសង្គម របស់បុគ្គលិកក្រុមហ៊ុនម៉ាដាមឃ្លីន ជាច្រើននាក់ ដែលបានយកថ្ងៃនៃសេចក្ដីស្រឡាញ់ កាលពីថ្ងៃទី១៤ ខែកុម្ភៈ ឆ្នាំ២០២០ ជាថ្ងៃចូលរួមសម្អាតបរិស្ថាន ដោយចុះប្រមូលសំរាម នៅក្នុងប្រពន្ធ័លូបង្ហូរទឹកសម្អុយ ក្នុងសង្កាត់ស្វាយដង្គំ ក្រុងសៀមរាប។
សកម្មភាពជាគម្រូនេះ ឯកឧត្តម ទៀ សីហា អភិបាលខេត្តសៀមរាប តាមរយៈលោក នួន ពុទ្ធារ៉ា អភិបាលក្រុងសៀមរាប បានកោតសរសើរ និងអរគុណ ចំពោះទឹកចិត្តចូលរួមថែរក្សាបរិស្ថាន របស់គណៈគ្រប់គ្រង និងបុគ្គលិក ក្រុមហ៊ុនម៉ាដាម ឃ្លីន ដែលជាមូលដ្ឋានគ្រឹះ និងជាវប្បធម៌ចូលរួមសាមគ្គី ដើម្បីអភិវឌ្ឍន៍ធ្វើឲ្យខេត្តសៀមរាប កាន់តែមានភាពរីកចម្រើន។
ជាមួយគ្នានោះ ឯកឧត្តមអភិបាលខេត្ត ក៏មានការព្រួយបារម្ភអំពី សុវត្ថិភាព និងសុខភាពរបស់ បុគ្គលិកក្រុមហ៊ុន ក៏ដូចជាប្រជាពលរដ្ឋផ្សេងទៀត ព្រោះការចុះ ទៅក្នុងទឹកកខ្វក់ ដោយពុំមានសម្ភារៈបច្ចេកទេសបែបនេះ វាអាចធ្វើឲ្យពួកគេប្រឈមនឹងបញ្ហាសុខភាព។
លោក នួន ពុទ្ធារ៉ា ក៏បានណែនាំដល់ អាជ្ញាធរមូលដ្ឋាន កងកម្លាំង និងមន្ត្រីជំនាញទាំងអស់ សូមបន្តស្វាគមន៍ សកម្មភាពចូលរួម របស់វិស័យឯកជន និងប្រជាពលរដ្ឋ ក្នុងការសម្អាតបរិស្ថានក្នុងក្រុងសៀមរាប និងធ្វើការណែនាំពីបទដ្ឋានសុវត្ថិភាពអនាម័យ ដើម្បីចៀសវាងហានិភ័យដល់សុខភាពអ្នកចូលរួម។
គួរជម្រាបថា ក្រុមហ៊ុនម៉ាដាមឃ្លីន ជាក្រុមហ៊ុនឯកជន ផ្ដល់សេវាសម្អាតអនាម័យនៅតាមបណ្ដាក្រុមហ៊ុន អង្គភាពទូទៅ ក្នុងខេត្តសៀមរាប។
អត្ថបទ និង រូបភាព៖ ទ្រា ពន្លឺ
កែសម្រួល៖ សេង ផល្លី
