យ៉ាងហោចណាស់ប្រាសាទតាព្រហ្ម ក្នុងខេត្តសៀមរាប ត្រូវការរយៈ២០ឆ្នាំ ដើម្បីធ្វើការជួសជុលសំណង់ប្រាសាទ និងប្រពន្ធហេដ្ឋារចនាសម្ព័ន្ធក្នុងប្រាសាទ។ គិតត្រឹមខែកុម្ភៈ ឆ្នាំ២០២០នេះ ប្រាសាទនេះ បានប្រើប្រាស់រយៈពេលជួសជុល ១៥ឆ្នាំហើយ ក្រោមគម្រោងសហប្រតិបត្តិការឥណ្ឌាកម្ពុជា ដើម្បីអភិរក្ស និងជួសជុលប្រាសាទតាព្រហ្ម ដោយក្រុមអ្នកស្រាវជ្រាវបុរាណវិទ្យាឥណ្ឌា ហៅថា ASI។
តាមការឲ្យដឹងពី លោកបណ្ឌិត ឌីអេស ស៊ូដ មន្ត្រីស្ថានទូតឥណ្ឌាប្រចាំព្រះរាជាណាចក្រកម្ពុជា និងជាទីប្រឹក្សាសហប្រតិបត្តិការឥណ្ឌាកម្ពុជាដើម្បីអភិរក្សនិងជួសជុលប្រាសាទតាព្រហ្មនេះ បង្ហាញថា តាមរយៈការចុះស្រាវជ្រាវASI កាលពីឆ្នាំ២០០២ ប្រាសាទតាព្រហ្ម មានសភាពទ្រុឌទ្រោម និងរងការខូចខាត ដោយសារ គ្រោះធម្មជាតិ សង្គ្រាម និង ការបំផ្លាញពីជនខិលខូច ជីកគាស់រំលើងក្នុងពេលកន្លងមក។
លោកបណ្ឌិត បញ្ជាក់ថា ក្រុមស្រាវជ្រាវបុរាណវិទ្យាឥណ្ឌា ASI បានផ្តល់ប្រឹក្សាជំនាញ និងការគាំទ្រផ្នែកបច្ចេកទេសចំពោះគម្រោង នៅតាមបណ្តាប្រទេសជាច្រើន និងភាគច្រើននៅអាស៊ី។ ប៉ុន្តែ ASI បានចាប់អារម្មណ៍យ៉ាងខ្លាំងចំពោះ គម្រោងអភិរក្ស និងជួសជុលប្រាសាទតាព្រហ្ម នៅខេត្តសៀមរាប ក្នុងប្រទេសកម្ពុជា។ សម្រាប់គម្រោងដំណាក់កាលទី១ ចាប់ផ្ដើមពីឆ្នាំ២០០៤ ដល់ឆ្នាំ២០១៥ រដ្ឋាភិបាលឥណ្ឌា បានផ្ដល់ថវិកាចំនួន ៤លាន៥សែនដុល្លារអាមេរិក ។ បន្ទាប់ពីគម្រោងទី១ ត្រូវបានបញ្ចប់ ក្រោមកិច្ចសហប្រតិបត្តិការល្អ រវាងរដ្ឋាភិបាលឥណ្ឌា និងរាជរដ្ឋាភិបាលកម្ពុជា ដោយមានកិច្ចសហការពីអាជ្ញាធរជាតិអប្សរា គាំទ្រពីអង្គការយូណេស្កូ និងវាយតម្លៃពីគណៈកម្មាធិការអន្តរជាតិ ដើម្បីសម្របសម្រួលកិច្ចគាំពារនិងអភិវឌ្ឍន៍រមណីយដ្ឋានប្រវត្តិសាស្ត្រអង្គរហៅកាត់ថា អាយស៊ីស៊ី-អង្គរ រដ្ឋាភិបាលឥណ្ឌា បានសម្រេចផ្ដល់ថវិកាជិត ៥លានដុល្លារអាមេរិកបន្ថែមទៀត ដើម្បីចាប់ផ្ដើមដំណាក់កាលទី២ គឺចាប់ពីឆ្នាំ២០១៥ ដល់២០២៥ ដែលមាន ៤គម្រោង រួមមានការសិក្សាទៅលើដើមឈើដុះក្នុងប្រាសាទ និរន្តភាពរបស់ប្រាសាទ ការរៀបចំប្រពន្ឋ័បង្ហូរទឹក និងការបញ្ចៀសទឹកពីតំបន់ប្រាសាទ។
គួរជម្រាបថា ក្រុមអ្នកស្រាវជ្រាវបុរាណវិទ្យាឥណ្ឌា ASI បានបង្កើតឡើងនៅឆ្នាំ១៨៦១ និងជាអង្គការរដ្ឋាភិបាលនាំមុខមួយនៅប្រទេសឥណ្ឌា។ អង្គការនេះមានភារៈស្រាវជ្រាវផ្នែកបុរាណវិទ្យានិងការពារបេតិកភ័ណ្ឌវប្បធម៌នៅក្នុងប្រទេសឥណ្ឌា។
អត្ថបទ និង រូបភាព៖ យូ វង្ស
កែសម្រួល៖ សេង ផល្លី
