នៅព្រឹកថ្ងៃទី២០ ខែកុម្ភៈ ឆ្នាំ២០២០នេះ ក្រុមការងារចំរុះនៃរដ្ឋបាលខេត្តសៀមរាប សហការជាមួយអង្គភាពនិយ័តករទូរគមនាគមកម្ពុជានិងប្រតិបត្តករទូរគមនាគមន៍នានាក្នុងខេត្ត ដឹកនាំដោយលោកស្រី យូ សុភា អភិបាលរងខេត្តសៀមរាប បានបន្តចុះអនុវត្តក្នុងការកាត់ខ្សែកាបអាកាស មកប្រើខ្សែកាបអុបទិកក្រោមដីវិញ ក្នុងជំហានទី២ លើកំណាត់ផ្លូវទី១៣ តាមបណ្តោយផ្លូវវត្តបូព៌ចាប់ពីចំណុចស្ថានីយសាំងតូតាលរហូតដល់ស្តុបកោះកេរ និង បន្តទៅទល់នឹងស្ពានវត្តពោធិលង្កា ដែលមានសម្ងាយប្រវែង ៣.២០០ម៉ែត្រ ដោយគិតទាំងសងខាងផ្លូវ ។
លោកស្រី យូ សុភា អភិបាលរងខេត្តសៀមរាប មានប្រសាសន៍ថា នេះមិនមែនជាលើកទី១ទេ ដែលក្រុមការងារចម្រុះរដ្ឋបាលខេត្ត ចុះមកកាត់ទម្លាក់ខ្សែកាបអាកាសគ្រប់ប្រភេទនៅតាមដងផ្លូវសាធារណៈ ក្នុងបំណងកែលំអសោភ័ណភាពក្រុងសៀមរាបរបស់យើង និងដើម្បីរក្សាបាននូវសុខសុវត្ថិភាព សណ្តាប់ធ្នាប់សាធារណៈនៅតាមដងផ្លូវ ហើយសម្រាប់ការកាត់ខ្សែកាបអាកាស មកប្រើខ្សែ កាបអុបទិកក្រោមដី គឺពុំធ្វើឲ្យប៉ះពាល់ដល់ទ្រព្យសម្បត្តិ សាធារណៈទេ លើសពីនេះ គឺមានតែជួយកាត់បន្ថយនូវហានិភ័យផ្សេងៗដូចជា ទុស្សេខ្សែភ្លើង ឬពេលមានភ្លៀងខ្យល់ អាចបាក់មែកឈើលើធ្វើឲ្យដាច់ធ្លាក់រញ៉េរញ៉ៃ និងកាត់បន្ថយគ្រោះថ្នាក់ពេលយប់ជាយថាហេតុ ដែលអាចបង្កគ្រោះថ្នាក់ដល់អ្នកធ្វើដំណើរ ជិះកង់ ជិះម៉ូតូ ឬរថយន្ត ជាដើម
ក្នុងឱកាសនោះដែរលោកស្រី យូ សុភា បានអំពាវនាវដល់បងប្អូនប្រជាពលរដ្ឋដែលមានលំនៅដ្ឋាននៅអមសងខាងតាមបណ្តោយផ្លូវ និងអ្នកដែលកំពុងប្រើប្រាស់បណ្តាញខ្សែកាបនានា សូមមេត្តាអធ្យា ស្រ័យនិងយោគយល់ ព្រោះការកាត់ទម្លាក់ខ្សែកាបអាកាសនេះអាច នឹងមានការរអាក់រអួលដល់ការប្រើប្រាស់ នៅពេលក្រុមការ ងារ អនុវត្តតាមគម្រោងផែនការ ហើយពេលបញ្ចប់ការងារប្រតិបត្តិករនៃបណ្តាក្រុមហ៊ុនខ្សែកាបនានា នឹងភ្ជាប់ប្រព័ន្ឋប្រើប្រាស់ក្រោមដីជូនបងប្អូនវិញ ជាពិសេសសូមឱ្យអាជ្ញាធរមូលដ្ឋានភូមិសង្កាត់ សហការសម្របសម្រួលជាមួយក្រុមការងារ និងផ្សព្វផ្សាយជូនដំណឹងដល់បងប្អូនប្រជាពលរដ្ឋ ឱ្យពួកគាត់ជ្រាបពីសកម្មភាពការងារ ដើម្បីការពារពីហានិភ័យកើតឡើងជាយថាហេតុនៅពេលក្រុមការងារកំពុងបំពេញភារកិច្ច ។
លោកសុខ សីហា ប្រធានមន្ទីរប្រៃសណីយ៍និងទូរគមនាគមន៍ខេត្តសៀមរាប មានប្រសាសន៍ថា នេះជាជំហានទី២ សម្រាប់ការកាត់ខ្សែកាបអាកាសតាមផ្លូវសាធារណៈ ដែលមាន១២ផ្លូវ ដោយចាប់ផ្តើមអនុវត្តនៅថ្ងៃទី ២០ ខែកុម្ភៈ ឆ្នាំ ២០២០ នឹងគ្រោងបញ្ចប់នៅដំណាច់ខែកុម្ភៈឆ្នាំ ២០២១ ខណៈជំហានទី១ យើងបានចាប់ផ្ដើមអនុវត្តពីថ្ងៃទី១៦ ខែសីហាឆ្នាំ ២០១៨ ហើយបានបញ្ចប់នៅថ្ងៃទី១៧ ខែកញ្ញា ឆ្នាំ២០១៩ ដោយសម្រេចបាន ១១ផ្លូវ មានប្រវែងសរុប ៦៣.៣០៥ម៉ែត្រ ។
លោកស្រី លឹម យ៉ាសាល់ អនុប្រធាននាយកដ្ឋាននិយ័តកម្មគមនាគមន៍ នៃអង្គភាពនិយ័តករទូរគមនាគមន៍កម្ពុជា មានប្រសាសន៍ថា ការកាត់ទម្លាក់បណ្តាញខ្សែកាបអាកាសមកប្រើបណ្តាញកាបអុបទិកក្រោមដី បានធ្វើឲ្យរាជធានីខេត្ត-ក្រុង មានសោភ័ណភាព សុវត្ថិភាព សណ្តាប់ធ្នាប់ និងរបៀបរៀបរយសាធារណៈ ខណៈកន្លងមក បានអនុវត្តនៅតាមខេត្តមួយចំនួនដែលទទួលបានការអនុញ្ញាតពីរាជរដ្ឋាភិបាល និងជាពិសេសខេត្តដែលមានព្រឹត្តិការណ៍បុណ្យធំៗ ដូចជា រាជធានីភ្នំពេញ , ក្រុងព្រះសីហនុ , ខេត្តសៀមរាប , ខេត្តកំពត និង ខេត្តបាត់ដំបងជាដើម ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
