កាលពីរសៀលថ្ងៃទី២៣ ខែកុម្ភៈ ឆ្នាំ២០២០នេះ នៅប្រាសាទខ្នារផ្ទោល ស្ថិតក្នុងភូមិខ្នារផ្ទោលឃុំស្រែណូយ ស្រុក វ៉ារិន ខេត្តសៀមរាប មានរៀបចំពិធីបុណ្យផ្កាប្រាក់សាមគ្គី ដែលផ្តូចផ្ដើមដោយ ឧត្តមសេនីយ៍ឯក សេង សារី មេបញ្ជាការរងកងទ័ពជើងគោកនិងជាមេបញ្ជាការមុខប្រចាំទិសយោធភូមិភាគទី៤ និងភរិយាព្រមទាំងក្រុមគ្រួសារ សហការី។
ពិធីបុណ្យនេះ ក៏មានការនិមន្ត និងចូលរួម ពីព្រះអនុគណក្រុងសៀមរាប ព្រះថេរានុត្ថេរៈ តាមបណ្ដាវត្តមួយចំនួនក្នុងក្រុងសៀមរាប អភិបាលស្រុកវ៉ារិន អាជ្ញាធរមូលដ្ឋានឃុំស្រែណូយស្រុកវ៉ារិន និងប្រជាពុទ្ឋបរិស័ទជិតឆ្ងាយយ៉ាងច្រើនកុះករ។បច្ច័យប្រមូលបាននៅរសៀលថ្ងៃដដែលនោះ មានចំនួនជាង១៦លានរៀល និង១,៦៣៧ដុល្លារ។
មានប្រសាសន៍ក្នុងពិធីនោះ ឧត្តមសេនីយ៍ឯក សេង សារី បង្ហាញថា ពិធីបុណ្យផ្កាប្រាក់សាមគ្គីនេះ មានគោលបំណង ប្រមូលថវិកាយកទៅរៀបចំបរិស្ថានជុំវិញប្រាសាទខ្នារផ្ទោល ដោយការដាំកូនឈើ ស្តារឡើងវិញកសិន្ធុបុរាណ ដែលនៅក្បែរប្រាសាទ។ ការស្តារឡើងវិញនូវកសិន្ធុបុរាណនេះ ដើម្បីរក្សាទឹកទុកសម្រាប់លំនឹងគ្រឺះប្រាសាទផង និងដើម្បីផ្គត់ផ្គង់ទឹកទុកជូនប្រជាពលរដ្ឋប្រើប្រាស់នៅរដូវប្រាំង ព្រោះទីនេះជាតំបន់ខ្សត់ទឹកនៅរដូវប្រាំង រួមនិងកសាងផ្លូវគ្រួសក្រហមមួយខ្សែប្រវែងជាង៣០០ម៉ែត្រ ភ្ជាប់ពីផ្លូវលេខ៦៧ចូលទៅកាន់ប្រាសាទនេះផង។
ឧត្តមសេនីយ៍ឯក សេង សារី គ្រោងនឹងសាងសង់សាលាឆទានមួយ និងបន្ទប់បង្គន់សាធារណៈ សម្រាប់សម្រួលដល់ទេសចរណ៍ជាតិ និងអន្តរជាតិមកកំសាន្តនៅទីនេះផងដែរ។
ឯកឧត្តម បញ្ជាក់ថា គំនិតផ្តួចផ្ដើមទាំងអស់នេះ ដោយសារអង្គភាពឈរជើង របស់ទីបញ្ជាការដ្ឋានបញ្ជាការមុខប្រចាំទិសយោធភូមិភាគទី៤ នៅក្បែរនឹងទីតាំងប្រាសាទ ទើបយើងត្រូវរួមគ្នាថែរក្សា ការពារ និងជួយសំអាតនិងស្តារឡើងវិញបរិស្ថានជុំវិញទីនេះ ឱ្យមានភាពស្រស់បំព្រងឡើង។
ឯកឧត្តម បញ្ជាក់បន្ថែមថា ដោយសារតំបន់នេះ ជាតំបន់បុរាណដ្ឋាន ក្រុមការងារ បាននិងកំពុងទំនាក់ទំនង ធ្វើសំណើរទៅកាន់អាជ្ញាធរជាតិអប្សរា ដើម្បីអនុញ្ញាតដល់ការរងារខាងលើទៅតាមភាពជាក់ស្តែង និងបានអំពាវនាវ និងសំណូមពរដល់ប្រជាពលរដ្ឋ និងអាជ្ញាធរគ្រប់លំដាប់ថ្នាក់ សូមចូលរួមជួយជ្រោមជ្រែងជាកម្លាំងក្តី ជាថវិកាក្តី ដើម្បីរួមសហការគ្នាស្តារ និងកែលំអបរិស្ថានជុំវិញប្រាសាទ ដើម្បីឱ្យមានសោភ័ណ្ឌភាពឡើងវិញ ឱ្យសមជាទីសក្ការៈនិងជាវប្បធម៌រូបីដែលដូនតាខ្មែរបន្សល់ទុកមក។
អត្ថបទ និងរូបភាព: លោក យូ វង្ស
កែសម្រួលដោយ៖ លោក សេង ផល្លី
