លោក ង៉ាន់ ភិរុណ អភិបាលរងខេត្តសៀមរាប បានមានប្រសាសន៍ថា វិស័យអភិវឌ្ឍន៍ជនបទរួមចំណែកយ៉ាងសកម្មក្នុងការងារអភិវឌ្ឍខេត្តកន្លងមកនេះ តួយ៉ាងដូចជាការងារលើកកម្ពស់ការផ្កត់ផ្គង់ទឹកស្អាត និងអនាម័យជនបទ ដែលចំណុចនេះរាជដ្ឋាភិបាលកម្ពុជា ក៏បានកំណត់យកគោលដៅនៅឆ្នាំ២០២៥ ឲ្យប្រជាពលរដ្ឋគ្រប់រូបនៅតាមសហគមន៍ជនបទ មានលទ្ឋភាពទទួលបាននូវសេវាផ្គត់ផ្គង់ទឹកស្អាត និងការរស់នៅក្នុងបរិស្ថានដែលមានអនាម័យល្អប្រកបដោយនិរន្តរភាពគ្រប់ៗគ្នា ។
លោក ង៉ាន់ ភិរុណ មានប្រសាសន៍បែបនេះ ក្នុងកិច្ចប្រជុំផ្សព្វផ្សាយខ្លឹមសារសន្និបាតបូកសរុបលទ្ធផលការងារឆ្នាំ២០១៩ និងលើកទិសដៅការងារឆ្នាំ២០២ របស់ក្រសួងអភិវឌ្ឍន៍ជនបទ នៅរដ្ឋបាលខេត្តសៀមរាប នាព្រឹកថ្ងៃទី២៦ ខែ កុម្ភៈ ឆ្នាំ២០២០នេះ ។
លោកអភិបាលរងខេត្តសៀមរាប បានមានប្រសាសន៍បន្ថែមថា ការងារហេដ្ឋារចនាសម័្ពន្ធផ្លូវជនបទ ត្រូវបានចាត់ទុកជាសសៃឈាមសេដ្ឋកិច្ច និងជាច្រកទ្វារជនបទមួយដ៏សំខាន់សម្រាប់បើកឲ្យមានទំនាក់ទំនងសេដ្ឋកិច្ច ម៉្យាងវិញទៀតការកែលម្អពីផ្លូវក្រាលក្រួសក្រហមទៅជាផ្លូវក្រាលកៅស៊ូ និងផ្លូវបេតុង ដែលបានបង្កលក្ខណៈងាយស្រួលដល់ការធ្វើដំណើរ ព្រមទាំងជួយលើកកម្ពស់សុខមាលភាព របស់ប្រជាពលរដ្ឋនៅទីជនបទ និងផ្នែកដទៃទៀតក្នុងការរួមចំណែកកាត់បន្ថយភាពក្រីក្រ និងការលើកកម្ពស់ជីវភាពរស់នៅរបស់ប្រជាពលរដ្ឋ។
ព័ត៌មានជាតិ ថ្មីៗ
ឯកឧត្តម អ៊ិន ចន្ថា រដ្ឋលេខាធិការក្រសួងអភិវឌ្ឍន៍ជនបទ បានមានប្រសាសន៍ថា ក្រសួងបានកំណត់យកផែនការយុទ្ធសាស្រ្តអភិវឌ្ឍន៍ជនបទឆ្នាំ២០១៩-២០២៣ លើ០៤ចំណុចជាអាទិ៍ភាព គឺ១. ពង្រឹងស្ថាប័ន អភិវឌ្ឍសមត្ថភាព និងធនធានមនុស្ស , ២. អភិវឌ្ឍហេដ្ឋានរចនាសម្ព័ន្ធរូបវន្ត និងគមនាគមន៍ , ៣. លើកកម្ពស់លក្ខខណ្ឌនៃការរស់នៅរបស់សហគមន៍ជនបទ និងទី៤. ធ្វើពិពិធកម្មសកម្មភាពសេដ្ឋកិច្ចនៅតំបន់ជនបទ ដូច្នេះដើម្បីសម្រេចបានការងារស្របតាមផែនការកម្មវិធីនយោបាយយុទ្ធសាស្រ្តចតុកោណដំណាក់កាលទី៤ របស់រាជរដ្ឋាភិបាលផែនការយុទ្ធសាស្រ្តអភិវឌ្ឍន៍ជនបទឆ្នាំ២០១៩-២០២៣ ក្រសួងអភិវឌ្ឍន៍ជនបទ បានកែសម្រួលលិខិតបទដ្ឋានគិតិយុទ្ធដែលមានស្រាប់ និងបង្កើតថ្មី , បង្កើតក្រុមការងារពិភាក្សារៀបចំវិភាគមុខងារ និងថវិកាទៅឱ្យបាលក្រុង ស្រុក ខណ្ឌ , កែសម្រួលហិរញ្ញវត្ថុសាធារណៈ និងកសាងរដ្ឋបាលមួយឱ្យកាន់តែមានភាពឆ្លើយតបប្រសិទ្ធភាព និងប្រសិទ្ធផល ដើម្បីផ្តល់សេវាសាធារណៈដល់ប្រជាពលរដ្ឋ ។
ក្នុងឱកាសនោះដែរ ឯកឧត្តម អ៊ិន ចន្ថា បានជំរុញឱ្យដៃគូអភិវឌ្ឍនានាចូលរួមគាំទ្រ ជាមួយរាជរដ្ឋាភិបាលកម្ពុជា ដើម្បីស្តារប្រទេសចេញពីភាពក្រីក្រ ហើយត្រូវបានមជ្ឈដ្ឋានជុំវិញគេជឿជាក់ថា កម្ពុជានៅឆ្នាំ២០៣០ នឹងក្លាយជាប្រទេសដែលមានចំណូមធ្យម កម្រិតខ្ពស់ និងឆ្នាំ២០៥០ក្លាយជាប្រទេសដែលមានចំណូលខ្ពស់ដូចបណ្តារប្រទេសនានាលើសកលលោក៕
អត្ថបទ និង រូបថត ៖ លោក បុង ឆវ័ន
កែសម្រួលអត្ថបទ ៖ លោក លីវ សាន្ត
