នាព្រឹកថ្ងៃទី២៦ ខែកុម្ភៈ ឆ្នាំ២០២០នេះ នាយកដ្ឋានសំណង់នៃក្រសួងព្រះបរមរាជវាំង បានរៀបចំពិធីបញ្ចុះបឋមសិលាសាងសង់ខ្លោងទ្វារ , ផ្លូវបេតុង , របង និងកែលំអសួនច្បារខាងមុខព្រះរាជដំណាក់ក្រុងសៀមរាប នៅក្នុងបរិវេណសួនច្បារខាងមុខព្រះរាជដំណាក់ ដើម្បីសែនព្រេន និងសែនក្រុងពាលី បួងសួងសុំសេចក្តីសុខសប្បាយ ពីម្ចាស់ទឹកម្ចាស់ដី សូមឱ្យដំណើរការសាងសង់ប្រព្រឹត្តិទៅដោយរលូន តាមការគ្រោងទុក ក្រោមអធិបតីភាពដ៏ខ្ពង់ខ្ពស់ សម្តេចចៅហ្វាវាំងវរវៀងជ័យធិបតីស្រឹង្គារ គង់ សំអុល ឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង , ឯកឧត្តម គុយ សុផល ទេសរដ្ឋមន្ត្រីទទួលបន្ទុកកិច្ចការទូទៅនៃក្រសួងព្រះបរមរាជវាំង និង ឯកឧត្តម អ៊ាន ឃុន សមាជិកក្រុមប្រឹក្សាខេត្ត តំណាងរដ្ឋបាលខេត្តសៀមរាប ដោយមានការចូលរួមពីសំណាក់ឯកឧត្តម លោក លោកស្រី ជាសមាជិកក្រុមប្រឹក្សាខេត្ត ថ្នាក់ដឹកនាំមន្ទីរ អង្គភាពនានាជុំវិញខេត្ត និងមន្ត្រីអ្នកមុខអ្នកការ ដែលកំពុងបំរើការងារនៅព្រះរាជដំណាក់ក្រុងសៀមរាប ។
សូមបញ្ជាក់ថា ពិធីបញ្ចុះបឋមសិលានេះ បានប្រព្រឹត្តទៅតាមលំនាំព្រហ្មញ្ញសាសនាផង និងព្រះពុទ្ធសាសនាផង និង ទៅតាមទំនៀមទម្លាប់ប្រពៃណីខ្មែរដែលមានពីយូរលង់ណាស់មកហើយ ហើយសំណង់ដែលត្រូវសាងសង់ខ្លោងទ្វារ , ផ្លូវបេតុង , របង និងកែលំអសួនច្បារនេះ នឹងត្រូវប្រើប្រាស់ក្នុង រយៈពេលចំនួន២០ខែ ដោយគិតចាប់ពីពេលនេះទៅ ។
បើតាមមន្ត្រីសាលាខេត្តសៀមរាប បានឲ្យដឹងថា ក្រោយពីបញ្ចប់ការសាងសង់ សំណង់ខ្លោងទ្វារនេះ នឹងក្លាយទៅជាសមិទ្ធផល និង រមណីយដ្ឋានមួយថ្មីបន្ថែមទៀត សម្រាប់លើកមុខមាត់របស់ខេត្តសៀមរាប ដែលជាខេត្តទេសចរណ៍ធំបំផុតរបស់កម្ពុជាបន្ទាប់ពីរាជធានីភ្នំពេញ ព្រោះនឹងធ្វើឲ្យសោភ័ណភាពរបស់ក្រុងសៀមរាប កាន់មានភាពស្រស់ស្អាត កាន់តែមានភាពទាក់ទាញបន្ថែមទៀតចំពោះអ្នកទេសចរណ៍ ទាំងអ្នកទេសចរជាតិ និង អន្តរជាតិ ខណៈបច្ចុប្បន្នតំបន់នេះ ជាតំបន់ដែលមានការទាក់ទាញរួចជាស្រចទៅហើយសម្រាប់ភ្ញៀវទេសចរ ពិសេសគឺជាកន្លែងសម្រាប់កម្សាន្តលំហែកាយ និង កន្លែងហាត់ប្រាណរបស់ប្រជាពលរដ្ឋដែលកំពុងរស់នៅក្នុងក្រុងសៀមរាប ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
