ក្រោមជំនួយឧបត្ថម្ភពីទីភ្នាក់ងារសហប្រតិបត្តិការអន្តរជាតិប្រទេសជប៉ុន ហៅកាត់ថា JICA ក្រសួងឧស្សាហកម្មនិងសិប្បកម្ម បានរៀបចំសិក្ខាសាលាមួយ ស្តីពីបែបបទបញ្ជីស្នាមគណនេយ្យក្នុងប្រព័ន្ធគ្រប់គ្រងអាជីវកម្ម នៅសណ្ឋាគាររ៉ូយ៉ាល់ ក្នុងខេត្តសៀមរាប នាថ្ងៃទី២៨ ខែកុម្ភៈ ឆ្នាំ២០២០នោះ ជូនដល់មន្ត្រីរាជការជាង ៨០ នាក់ មកពីអង្គភាពរដ្ឋាករទឹកស្វយ័តបាត់ដំបង , កំពង់ចាម , កំពង់ធំ , កំពត , ពោធិសាត់ , ស្វាយរៀង និងអង្គភាពរដ្ឋាករទឹកស្វ័យតព្រះសីហនុ ក្រោមអធិបតីភាពឯកឧត្តម អ៊ុ សុថា រដ្ឋលេខាធិការក្រសួងឧស្សាហកម្មនិងសិប្បកម្ម តំណាងដ៏ខ្ពង់ខ្ពស់ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្មនិងសិប្បកម្ម ។
គោលបំណងនៃសិក្ខាសាលានេះ ដើម្បីចែករំលែកបទពិសោធន៍ដែលជាធាតុចូលបន្ថែមទៀតឱ្យបានគ្រប់ជ្រុងជ្រោយ សម្រាប់រៀបចំបែបបទបញ្ជីស្នាមគណនេយ្យឱ្យបានពេញលេញទៅក្នុងប្រព័ន្ឋ (SUMS) ឱ្យក្លាយជាប្រព័ន្ឋមួយដែលមានបទដ្ឋានគំរូសម្រាប់វិស័យទឹកស្អាតទូទាំងប្រទេស ពិសេសដើម្បីបញ្ចប់ការងារបែបបទបញ្ជីស្នាមគណនេយ្យក្នុងប្រព័ន្ឋគ្រប់គ្រងអាជីវកម្មទឹកស្អាត ដែលបានរៀបតម្លើងក្នុងគម្រោងបណ្តុះបណ្តាលធនធានមនុស្សរបស់ទីភ្នាក់ ងារសហប្រតិបត្តិការអន្តរជាតិប្រទេសជប៉ុន (JICA) ជំហាន ទី៣ កន្លងមក និង ឈានទៅដាក់ឱ្យប្រើប្រាស់ពេញលេញសម្រាប់អង្គភាពរដ្ឋាករទឹកសាធារណៈទាំង៧ រួមមានអង្គភាពរដ្ឋាករទឹកស្វ័យតបាត់ដំបង , កំពង់ចាម , កំពង់ធំ , កំពត , ពោធិសាត់ , ស្វាយរៀង និងអង្គភាពរដ្ឋាករទឹកស្វយ័តព្រះសីហនុ។
លោក KOKI AZUMA ប្រធានទីប្រឹក្សាគម្រោងពង្រឹងសមត្ថភាពគ្រប់គ្រងនិងដឹកនាំវិស័យទឹកស្អាតទីប្រជុំជននៅកម្ពុជា ជំហានទី៤ នៃ JICA មានប្រសាសន៍ថា JICA បានអនុវត្តនូវគម្រោងកិច្ចសហប្រតិបត្តិការផ្នែកបច្ចេកទេសទឹកស្អាតនៅក្នុងប្រទេសកម្ពុជារយៈពេល១៥ឆ្នាំមកហើយ ហើយគម្រោងបច្ចុប្បន្ន គឺជំហានទី៤ ដែលគោលដៅប្តូរពីរដ្ឋាករទឹកសាធារណៈមកអគ្គនាយកដ្ឋានទឹកស្អាត ចាប់ពីឆ្នាំ២០១៨ដល់ឆ្នាំ២០២២ ដើម្បីពង្រឹងសមត្ថភាពដឹកនាំរបស់អគ្គនាយកដ្ឋានទឹកស្អាត រាប់ទាំងការបើកវគ្គបណ្តុះបណ្តាល ដើម្បីសិក្សាស្វែងយល់ពីប្រព័ន្ឋគ្រប់គ្រង ផែនការប្រចាំឆ្នាំ របាយការណ៍ស្តីពីវិស័យទឹកស្អាតនៅទីប្រជុំជន ជាដើម។
មានប្រសាសន៍ក្នុងឱកាសនោះ ឯកឧត្តម អ៊ុ សុថា រដ្ឋលេខាធិការ ក្រសួងឧស្សាហកម្មនិងសិប្បកម្ម បានសម្តែងភាពជឿជាក់ថា សិក្ខាកាមដែលមកពីអង្គភាពរដ្ឋាករទឹកសាធារណៈទាំងអស់ នឹងយកចំណេះដឹងពីវគ្គបណ្តុះបណ្តាលនេះទៅរៀបចំទម្រង់បែបបទគណនីរៀបចំតារាងគណនារំលស់ អចលនទ្រព្យ និងគណនាពន្ឋដារ តាមអង្គភាពរៀងៗខ្លួនឱ្យបានត្រឹមត្រូវ ជាពិសេសចំពោះអង្គភាពរដ្ឋាករទឹកសាធារណៈទាំង៧អង្គភាព ដែលកំពុងប្រើប្រាស់ប្រព័ន្ឋ SUMS នេះ ត្រូវរៀបចំការងារនេះឱ្យបានរួចរាល់ និងស្នើឱ្យក្រុមការងារនៃនាយកដ្ឋានផែនការនិងគ្រប់គ្រងទិន្នន័យ គ្រូបង្គោលនៃអង្គភាពរដ្ឋាករទឹកសៀមរាប អ្នកជំនាញការJICA សហការគ្នាចុះទៅធ្វើការពិនិត្យផ្ទៀងផ្ទាត់កែសុម្រួលឱ្យបានត្រឹមត្រូវ ដើម្បីឈានទៅដាក់ឱ្យអនុវត្តប្រព័ន្ធគ្រប់គ្រងអាជិវកម្មទឹកស្អាតពេញលេញ ។
ឯកឧត្តម អ៊ុ សុថា បានណែនាំដល់អង្គភាពរដ្ឋាករទឹកទាំង៧ ត្រូវប្រើប្រាស់ប្រព័ន្ឋគ្រប់គ្រងអាជីវកម្មនេះតែមួយគត់ ហាមប្រើប្រាស់ប្រព័ន្ឋផ្សេងៗចាស់ពីមុន ដើម្បីធានាឱ្យការគ្រប់គ្រងអាជីវកម្មរបស់អង្គភាពរដ្ឋាករទឹកទាំងអស់ មានបទដ្ឋានគណនេយ្យជាតិ គឺ ប្រព័ន្ឋហិរញ្ញវត្ថុស្តង់ដារអន្តរជាតិនៃកម្ពុជា ដែលមានកម្រិតវិជ្ជាជីវៈខ្ពស់ ដូចរដ្ឋាករទឹកស្វយ័តក្រុងភ្នំពេញ និងអអ្គភាពរដ្ឋាករទឹកស្វយ័តសៀមរាបដែរ។
សូមបញ្ជាក់ថា JICA បានអនុវត្តនូវគម្រោងកិច្ចសហប្រតិបត្តិការផ្នែកបច្ចេកទេសទឹកស្អាតនៅក្នុងប្រទេសកម្ពុជារយៈពេល១៥ឆ្នាំមកហើយ ដែលដំណាក់កាលទីមួយចាប់ពីឆ្នាំ២០០៣ដល់ឆ្នាំ២០០៦ ផ្តល់ជំនួយនូវផ្នែកបច្ចេកទេសដល់រដ្ឋាករទឹកស្វយ័តរាជធានីភ្នំពេញ , ជំហានទី២ ពីឆ្នាំ២០០៧ដល់ឆ្នាំ២០១១ ពង្រីកទំហំការងារពី PPWSA ទៅដល់រដ្ឋាករទឹកសាធារណៈទាំង៨ និងដំណាក់កាលទី៣ពីឆ្នាំ២០១២ ដល់ឆ្នាំ២០១៨ បន្តជួយទៅដល់រដ្ឋាករទឹកសាធារណៈទាំងនេះ ដោយមិនផ្តោតទៅលើបញ្ហាបច្ចេកទេសតែមួយមុខទេ គឺជួយដល់ជំនាញគ្រប់គ្រងផងដែររាប់បញ្ចូលទាំងការគ្រប់គ្រងហិរញ្ញវត្ថុ អង្គភាព និងធនធានមនុស្ស ៕
អត្ថបទ និងរូបភាព: លោក យូ វង្ស
កែសម្រួលដោយ៖ លោក លីវ សាន្ត
