រសៀលថ្ងៃទី០១ ខែមីនា ឆ្នាំ២០២០នេះ សមាគមគ្រូបង្រៀនភាសាជប៉ុនអង្គរវត្ត មានការសហការគាំទ្រពីស្ថានទូតជប៉ុនប្រចាំកម្ពុជា និងសមាគមជនជាតិជប៉ុនកម្ពុជាសាខាខេត្តសៀមរាប បានរៀបចំការប្រឡងប្រជែងសមត្ថភាពរបស់បេក្ខជនបេក្ខនារីជនជាតិខ្មែរ រៀនភាសាជប៉ុន ក្នុងខេត្តសៀមរាបលើកដំបូង នៅសកលវិទ្យាល័យមេគង្គកម្ពុជា ក្នុងក្រុងសៀមរាប។
ការប្រឡងប្រជែងនេះ មានអ្នកចូលរួមប្រកួតចំនួន២៦រូប សុទ្ឋសឹងជាសិស្សដែលបានប្រឡងជាប់នៅវគ្គជម្រុះ និងឆ្លងកាត់ការវាយតម្លៃយ៉ាងសុក្រឹតបំផុត កាលពីថ្ងៃទី២៦ខែមករាឆ្នាំ២០២០ ដោយគ្រឺះស្ថានអប់រំវប្បធម៌ជប៉ុនអន្តរជាតិ ។ វិញ្ញាសារប្រឡងរួមមាន អំណានទោល អំណានជាក្រុម និងការសម្តែងរឿងខ្លីជាដើម ដើម្បីប្រជែងដណ្តើមពិន្ទុ ពីគ្នាទៅវិញទៅមក។
នេះជាលើកដំបូង ដែលសមាគមគ្រូបង្រៀនភាសាជប៉ុនអង្គរវត្ត បានរៀបចំការប្រឡងប្រភេទនេះក្នុងខេត្តសៀមរាប និងជាលើកទី១០សម្រាប់រាជធានីភ្នំពេញ និងខេត្តសៀមរាប។ ក្នុងឱកាសនោះដែរ គេឃើញមានវត្តមានមន្ត្រីនៃស្ថានទូតជប៉ុន ប្រចាំនៅកម្ពុជា និងការិយាល័យកុងស៊ុលជប៉ុនប្រចាំខេត្តសៀមរាប ព្រមទាំងវត្តមានលោកគ្រូអ្នកគ្រូសាស្ត្រចារ្យជប៉ុនជាច្រើនផងដែរ ដើម្បីផ្ទៀងផ្ទាត់ វាយតម្លៃផ្តល់ពិន្ទុនិងផ្តល់វិញ្ញាបនបត្របញ្ជាក់ពីសមត្ថភាពព្រមទាំងរង្វាន់លើកទឹកចិត្តជាច្រើនផងដែរ ។
ព័ត៌មានជាតិ ថ្មីៗ
អ្នកស្រីអូនី ហ៊ីហ្វឺម៉ី គ្រូបង្រៀនភាសាជប៉ុននៃសមាគមន៍គ្រូបង្រៀនភាសាជប៉ុនអង្គរវត្ត មានប្រសាសន៍ក្នុងឱកាស នោះថា គោលបំណងនេះការប្រឡងនេះ គឺដើម្បីជាវេទិកា សម្រាប់សិស្សនិស្សិតជនជាតិខ្មែរ ដែលបាន និងកំពុងរៀនភាសាជប៉ុន ក្នុងខេត្តសៀមរាប បានបង្ហាញសមត្ថភាពរបស់ខ្លួន។ ដោយសារនាពេលកន្លង ការប្រឡងប្រភេទនេះ មានតែនៅរាជធានីភ្នំពេញប៉ុណ្ណោះ។
អ្នកស្រីបានរំលឹកពីសមាគមន៏គ្រូបង្រៀនភាសាជប៉ុនអង្គរវត្ត ថាបានបង្កើតឡើងនៅខែកុម្ភៈឆ្នាំ២០០៧ ក្រោមគោលបំណងផ្លាស់ប្តូរបទពិសោធបង្រៀនឱ្យកាន់តែល្អនិងមានការប្រាស្រ័យទាក់ទងគ្នាទៅវិញទៅមក ហើយសព្វថ្ងៃមានកន្លែងបង្រៀនភាសាជប៉ុនជាច្រើនដូចជាសាលាថែរក្សាស្នាមញញឹមកុមារ គ្រឺះស្ថានអប់រំវប្បធម៌ជប៉ុនអន្តរជាតិ សាលាតាគឹមិ សាលាហាតុហ្គោល សាលាហាយ៉ាកាវ៉ា សាលាមិស្ហឹមិ សកលវិទ្យាល័យមេគង្គកម្ពុជាអង្គការក្រៅរដ្ឋាភិបាលបេះដូងមាស។
ក្រោយពីពិនិត្យវាយតម្លៃនិងផ្តល់ពិន្ទុរួចមក លោក សាឃីម៉ា (Sakema) មន្ត្រីនៃមជ្ឈមណ្ឌលសហប្រតិបត្តិការកម្ពុជា ជប៉ុន និង គណៈកម្មាការវាយតម្លៃគ្រប់ៗរូបបានសម្តែង ការកោតសសើរចំពោះសមត្ថភាពភាសាជប៉ុន របស់សិស្សកម្ពុជា ទាំងការអាន ការសរសេរនិងការបញ្ចេញសម្លេងបានល្អប្រសើរ។ ដោយឡែកចំណុចខ្វះខាតមួយចំនួន ក្រុមគណៈកម្មការ ជំរុញដល់បេក្ខជនបេក្ខនារី ចូលរួមប្រឡងភាសាជប៉ុននៅឆ្នាំក្រោយ។
បន្ទាប់ពីការវាយតម្លៃ ក្នុងការប្រឡងនេះ គណៈកម្មាការ រកឃើញបេក្ខជនទទួលជ័យលាភីពីររូប រើសចេញពីផ្នែកអំណានជាក្រុមម្នាក់ និងផ្នែកសម្តែងជាក្រុមម្នាក់។ រង្វាន់លើកទឹកចិត្តបេក្ខជនជ័យលាភី រួមមានការទៅទស្សនានៅប្រទេសជប៉ុនរយៈពេលមួយសប្តាហ៍។ រីឯ សិស្សទទួលបាននិទ្ទេសល្អ ទទួលបានការចូលរួមប្រឡងភាសាជប៉ុនចំនួន២ឆ្នាំ ដោយមិនយកកម្រៃផងដែរ។ បន្ថែមពីនេះ ដោយសារឆ្នាំនេះជាឆ្នាំទី១០នៃកម្មវិធីប្រឡង សមាគមគ្រូបង្រៀនភាសាជប៉ុនអង្គវត្ត បានបន្ថែមរង្វាន់សម្រាប់ក្រុម៤នាក់ ស្នាក់នៅសណ្ឋាគារមួយ ចំនួន១យប់បូករួមទាំងអាហារព្រឹកល្ងាចដោយពុំគិតកម្រៃផងដែរ។
អត្ថបទ និងរូបភាព: លោក យូ វង្ស
កែសម្រួលដោយ៖ លោក សេង ផល្លី
