មន្ដ្រីជាន់ខ្ពស់ក្រសួងសុខាភិបាល បានថ្លែងថា ស្ដ្រីមិនត្រឹមតែជាសរសរទ្រូវដ៍រឹងមាំសម្រាប់ប្រទេសជាតិប៉ុណ្ណោះទេ ប៉ុន្ដែថែមទាំងជារនាំងការពារមេរោគ Covid-19 នៅក្នុងគ្រួសារបានល្អថែមទៀតផង ព្រោះស្ដ្រីពូកែយកចិត្ដទុកដាក់ទៅលើការថែទាំងសុខភាពគ្រួសារ។ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានថ្លែងបែបនេះ នៅក្នុងពិធីអបអរសាទរ ខួបលើកទី១០៩នៃទិវាអន្ដរជាតិ៨មីនា ក្រោមប្រធានបទមានសន្ដិភាពមានការលើកកម្ពស់សមភាពយេនឌ័រ នៅមន្ទីរពេទ្យបង្អែកខេត្ដសៀមរាប កាលពីល្ងាចទី០៦ខែមីនា ឆ្នាំ២០២០នេះ។
លោកជំទាវ មានប្រសាសន៍ថា កត្តាសុខសន្ដិភាព និងស្ថិរភាពនយោបាយ គឺជាមូលដ្ឋានគ្រឹះដ៏រឹងមាំ សម្រាប់ធានានូវការអភិវឌ្ឍលើគ្រប់វិស័យ ក្នុងនោះរួមមានថ្ងៃទិវាសិទ្ធិនារី ៨មីនាផងដែរ។ ជាក់ស្ដែងការជួបជុំគ្នាប្រារព្ធទិវាសិទ្ធិនារីនៅពេលនេះ គឺដោយសារប្រទេសជាតិមានសន្ដិភាពមានការរីកចំរើននៃការអភិវឌ្ឍសុខសន្តិភាព ក្រោមការដឹកនាំដ៏ឈ្លាសវៃរបស់ប្រមុខរាជរដ្ឋាភិបាល សម្ដេចអគ្គមហាសេនាបតីតេជោ ហ៊ុន សែន ជានាយករដ្ឋមន្រ្តីនៃព្រះរាជាណាចក្រកម្ពុជា បានដាក់ចេញនូវគោលនយោបាយឈ្នះឈ្នះ ឲ្យខ្មែរួបរួមគ្នាតែមួយ ដែលធ្វើឲ្យប្រជាជនយើងទូទាំងប្រទេសមិនភ្លេចពាក្យថា“អរគុណសន្តិភាព” មានសន្តិភាពមានអ្វីៗទាំងអស់។ ជាមួយគ្នានោះដែរ ក្នុងការកសាង និងអភិវឌ្ឍប្រទេសជាតិ និងបានជំរុញលើកទឹកចិត្តស្ត្រី ឲ្យបន្តអភិវឌ្ឍខ្លួនតាមរយៈការអប់រំ និងទទួលយកតួនាទីជាអ្នកដឹកនាំកាន់តែច្រើនថែមទៀតនៅក្នុងវិស័យសាធារណៈ និងវិស័យឯកជន។
លោកជំទាវក៏បានថ្លែងការកោតសរសើរ និងអំណរគុណយ៉ាងជ្រាលជ្រៅដល់មន្ត្រីរាជការ ដែលជា ស្ត្រីនៅក្នុងមន្ទីរពេទ្យបង្អែកខេត្ដសៀមរាប ដែលបានខិតខំប្រឹងប្រែងបំពេញការងារ និងរួមចំណែកដល់ការសម្រេចបានជោគជ័យទាំងឡាយ របស់ក្រសួងបានប្រគល់អោយអនុវត្ដការងារកន្លងមក។ លោកជំទាវបានបន្ដថា មិនត្រឹមតែជាសសរទ្រូងប្រទេសជាតិដ៏រឹងមាំប៉ុណ្ណោះទេ ប៉ុន្ដែស្រីជាមេគ្រួសារផង និងជាមេផ្ទះផង ពិសេស ពួកគាត់គឺអាចជួយគ្រប់គ្រងនូវបញ្ហាជម្ងឺឆ្លងនៅក្នុងក្រុមគ្រួសារគាត់ថែមទៀតផង។ លោកជំទាវ បានលើកឧទាហរណ៍ថា ស្ដ្រីនៅក្នុងមន្ទីរពេទ្យបង្អែកខេត្ដសៀមរាបមានស្ដ្រីចំនួន២៤៧នាក់ គឺអាចគ្រប់គ្រង និងការពារការជំងឺឆ្លងបាន២៤៧គ្រួសារ ហើយបើក្នុងមួយគ្រួសារមានបួននាក់ អាចការពារការឆ្លងជំងឺបានរាប់ពាន់នាក់ថែមទៀត ។
លោកជំទាវក៏បានក្រើនរំលឹកដល់ស្ដ្រីគ្រប់រូបត្រូវថែរក្សាសុខភាព និងអប់រំដល់ពលរដ្ឋដទៃទៀតអោយចេះថែរក្សាសុខភាព ជាពិសេសចេះការពារពីជំងឺឆ្លង Covid-19នេះ ដើម្បីឲ្យបងប្អូនប្រជាពលរដ្ឋយើង មានជំនឿលើវិធានការ របស់ក្រសួងសុខាភិបាលបានដាក់ចេញនាពេលបច្ចុប្បន្ននេះ៕
អត្ថបទ និងរូបភាព៖ បូ សាវី
