នៅព្រឹកថ្ងៃទី១១ ខែមីនា ឆ្នាំ២០២០ នាសាលប្រជុំទន្លេបាសាក់២ រាជធានីភ្នំពេញ សមាគមនារីកម្ពុជា ដើម្បីសន្តិភាព និងអភិវឌ្ឍន៏ សាខាក្រសួងព័ត៌មាន មានរៀបចំពិធីអបអរសាទរ ខួប លើកទី១០៩ ទិវាអន្តរជាតិនារី ៨ មីនា ក្រោម “មានសន្តិភាព មានការលើកកម្ពស់សមភាពយេនឌ័រ” និងមានវត្តមានអញ្ជើញជាអធិបតី ឯកឧត្តម ខៀវ កាញារីទ្ធ រដ្ឋមន្រ្តី ក្រសួងព័ត៌មាន និង លោកជំទាវ ខៀវ ទេពរង្ស៊ី ប្រធានកិត្តិយស សមាគមនារីកម្ពុជា ដើម្បីសន្តិភាព និងអភិវឌ្ឍន៏ សាខាក្រសួងព័ត៌មាន។
នៅក្នុងឱកាសនោះ លោកជំទាវ ច័ន្ទ ធី រដ្ឋលេខាធិការ ក្រសួងព័ត៌មាន បានឡើងអាន ព្រះរាជសារ សម្តេចព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិ ខ្មែរ ក្នុងសិរីភាព សេចក្តីថ្លៃថ្នូរ និងសុភមង្គល ដោយបានសម្ដែងការអបអរសាទរ ចំពោះការរំលឹក ខួបស្តីពីការតស៊ូរបស់នារីទទូទាំងសកលលោក ដើម្បីទាមទារឲ្យមានការលើកកម្ពស់ សមភាពយេនឌ័រ ដែលជាយុទ្ធសាស្រ្តគន្លឹះមួយ ក្នុងការផ្តល់ឱកាសដល់ស្រ្តី និងការអនុវត្តសិទ្ធិស្មើ ភាពរវាងបុរស និងស្រ្តី។ ប្រធានបទសម្រាប់ ទិវាអន្តរ ជាតិនារី ៨ មីនា ឆ្នាំនេះ គឺដើម្បីរំលឹកពីការតស៊ូរបស់នារីនៅទូទាំងពិភពលោក ក្នុងការទាមទារ សិទ្ធិសេរីភាព ប្រជាធិបតេយ្យ និងការអនុវត្តសិទ្ធិស្មើភាពគ្នា រវាងបុរស និង ស្រ្តី។
លោកជំទាវ ឡងឌី សាន់ណារ៉ា អនុរដ្ឋលេខាធិការ និងជាប្រធានប្រតិបត្តិ សមាគមនារីកម្ពុជា ដើម្បីសន្តិភាព និងអភិវឌ្ឍន៍ សាខាក្រសួងព័ត៌មាន បានធ្វើរបាយការណ៍បូកសរុប ពីលទ្ធផលការងារ ដែលសមាគមសម្រេចបាន ក្នុង រយៈពេល ៣ ឆ្នាំ មកនេះ ពិសេសការ ប្រឹងប្រែង ដើម្បីដើរឲ្យទាន់ ចរន្តនៃការរីកចម្រើន ទាំងផ្នែកវិទ្យាសាស្រ្ត បច្ចេកវិទ្យា និង នវានុវត្តន៍។ សមាគមនារីកម្ពុជា និងអភិវឌ្ឍន៍សាខាក្រសួងព័ត៌មាន ត្រូវបានទទួលការ កោតសរសើរ ពីសម្តេចកិត្តិ ប៊ុន រ៉ានី ហ៊ុន សែន លោកជំទាវ កិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី និងលោកជំទាវ ឃួន សុដារី អនុប្រធានទី២ រដ្ឋសភា ។ ជាងនេះទៅទៀត គឺបានការគាំទ្រ ពី ឯកឧត្តម ខៀវ កាញារីទ្ធ និងលោកជំទាវ ទេព រង្ស៊ី បានផ្តល់តម្លៃខ្ពស់ និងការជំរុញលើកទឹកចិត្ត ដែលធ្វើឲ្យស្រ្តី មានឱកាសកាន់តែច្រើន ក្នុងការបញ្ចេញសមត្ថភាព ទេពកោសល្យ និងសេចក្តីក្លាហាន មានភាពជឿជាក់ បំពេញកិច្ចការងារជាមួយ បុរសគ្រប់កាលៈទេសៈ ។
ឯកឧត្តម រដ្ឋមន្រ្តី ខៀវ កាញារីទ្ធ បានសម្ដែងនូវការកោតសរសើរចំពោះលទ្ធផលការងារទាំងឡាយ ដែលថ្នាក់ដឹកនាំ មន្រ្តី ជានារី ក្នុងក្រសួងព័ត៌មាន សម្រេចអនុវត្តន៍បាននាពេលកន្លងមកនេះ និងជំរុញលើកទឹកចិត្តឲ្យបន្តរាល់សកម្មភាពការងារ តាមផ្នែកតាមជំនាញ ឲ្យទទួលបានជោគជ័យថ្មីថែមទៀត។
ឯកឧត្តម បានបង្ហាញភាពសប្បាយរីករាយចំពោះកម្មវិធី នាពេលនេះ និង លើកទឹកចិត្ត ឲ្យមានការបន្តរៀបចំជាប្រចាំឆ្នាំ ពិសេសពង្រឹងស្មារតីសាមគ្គីភាព ស្មារតី ជាគ្រួសារ របស់ក្រសួងព័ត៌មានទៅមុខទៀត ព្រោះថា នៅក្នុងឆ្នាំបន្តបន្ទាប់ គឺមានកិច្ចការងារជាច្រើនដែល ត្រូវរួមសហការគ្នាធ្វើបានកាន់តែល្អ ។ កិច្ចការងារសំខាន់ៗ ដែល ក្រសួងព័ត៌មាន ត្រៀមធ្វើនោះ គឺការផ្លាស់ប្តូរប្រពន្ធ័ផ្សាយពី អានណាឡូក ទៅជា ឌីជីថល នៅឆ្នាំ ២០២៣ ដោយក្នុងនោះ ទូរទស្សន៍ជាតិកម្ពុជា នឹងមានការបំបែកប៉ុស្តីផ្សាយ ជា ៣ ប៉ុស្តី ហើយវិទ្យុជាតិកម្ពុជា ក៏ប្តូរទៅជាឌីជីថលផងដែរ ។ ទាំងអស់នេះទាមទារឲ្យ មានការខិតខំ ប្រឹងប្រែងបន្ថែមទៀត សម្រាប់មន្រ្តី និងថ្នាក់ដឹកនាំ គ្រប់ផ្នែក គ្រប់ជំនាញ បង្កើននូវ ចំណេះដឹង ជំនាញ ឲ្យបានកាន់តែប្រសើរ តាមរយៈវគ្គបណ្តុះបណ្តាល វិជ្ជាជីវៈទូទៅជាច្រើននាពេលខាងមុខ។
ឯកឧត្តម រដ្ឋមន្រ្តី បានសម្ដែងនូវការកោតសរសើរ ចំពោះភាព រីកចំរើន និងការប្រឹងប្រែង យ៉ាងសកម្ម ក្នុងកិច្ចការងារយកព័ត៌មាន ខុសពីកាលពី ៥ ឆ្នាំមុន ដែលប្រការនេះ បានលេច ចេញពីស្មារតី រួមសហការគ្នាបំពេញកិច្ចការបានល្អ និងមាន ការសរសើរ ផ្តល់ការជឿទុក ចិត្ត ពីប្រមុខថ្នាក់ដឹកនាំ ពិសេសសម្តេចតេជោនាយករដ្ឋមន្រ្តី ហ៊ុន សែន មកលើក្រសួងព័ត៌មាន ហើយសម្តេចក៏បាន ឯកភាពឲ្យមានការផ្លាស់ប្ដូរប្រព័ន្ធផ្សព្វផ្សាយ ឲ្យកាន់តែមាន គុណភាព និងភាពលឿនរហ័ស បន្ថែមទៀត ។ ការផ្តាស់ប្តូរប្រព័ន្ធផ្សាយ ពីអានណាឡូក ទៅ ឌីជីថល ដែលក្រសួងព័ត៌មាន ត្រូវអនុវត្តន៍ នេះ ត្រូវបានប្រមុខរាជរដ្ឋាភិបាល សម្រេចផ្ដល់ថវិកាប្រមាណ ជិត ២០០ លានដុល្លាអាមេរិក ។ ដូច្នេះដោយទទួលបានការ ជឿជាក់មកលើកិច្ចការងាររបស់ថ្នាក់ដឹកនាំ និងមន្រ្តីរាជការ គ្រប់លំដាប់ថ្នាក់ នៃក្រសួងព័ត៌មាន ពីប្រមុខរាជរដ្ឋាភិបាល ក្នុងរយៈពេលបន្តបន្ទាប់កន្លងមកនេះ ឯកឧត្តមរដ្ឋមន្រ្តី ខៀវ កាញារីទ្ធ បានជំរុញលើកទឹកចិត្ត ឲ្យទាំងអស់គ្នា រួមសហការ សាមគ្គីភាព ចេះយោគយល់គ្នា ទៅវិញទៅមក ដើម្បីយើងអាចដោះស្រាយ និងសម្រេច បាននូវរាល់ កិច្ចការងារ ដែលត្រូវបំពេញ ពិសេសសម្រាប់ការងារព័ត៌មាន ត្រូវយល់ថា មិនមែនធ្វើម្នាក់បាន បានល្អ និងជោគជ័យនោះទេ ការងារព័ត៌មានជាការងាររួម ដែលទាមទារ ត្រូវរួមគ្នា ធ្វើទើប សម្រេចបានលទ្ធផលល្អ ។
អត្ថបទ និងរូបភាព៖ ក្រសួងព័ត៌មាន
