ព្រះវិហារវត្តប្រាសាទសីលវ័ន្ត ហៅវត្តប្រាសាទ ស្ថិតនៅក្នុងភូមិកាប់ដៃ ឃុំប្រាសាទ ស្រុកវ៉ារិន ដែលបានដំណើរការសាងសង់អស់រយៈពេល១០ឆ្នាំកន្លងនេះ ត្រូវបានប្រារព្ធពិធីបុណ្យបញ្ចុះខណ្ឌសីមាហើយ នៅព្រឹកថ្ងៃទី១២ ខែមីនា ឆ្នាំ២០២០នេះ ក្រោមព្រះអធិបតី និង អធិបតីភាព ព្រះតេជគុណ ព្រះមង្គលសិលាចា ជុំ គឹមឡេង ព្រះមេគណខេត្តសៀមរាប និង លោក នាក់ ណេរ៉ុន អភិបាលបាលរងខេត្ត តំណាងដ៏ខ្ពង់ខ្ពស់ឯកឧត្ដម ទៀ សីហា អភិបាលខេត្តសៀមរាប ដោយមានការនិមន្ត និង អញ្ជើញចូលរួមពីសំណាក់មន្ត្រីសង្ឃខេត្ត ព្រះអនុគណស្រុកវ៉ារិន អង្គរជុំ និង ស្រុកបន្ទាយស្រី លោក លោកស្រីជាថ្នាក់ដឹកនាំមន្ទីរ អង្គភាពនានាក្នុងខេត្ត ក្រុមប្រឹក្សានិងគណៈអភិបាល រួមទាំងមន្ត្រីរាជការសាលាស្រុកវ៉ារិន អាជ្ញាធរឃុំប្រាសាទ លោកគ្រូអ្នកគ្រូ សិស្សានុសិស្ស បងប្អូនប្រជាពលរដ្ឋ និង តាជីយាយជីចំណុះជើងជាច្រើនរូបទៀត ។
លោក ធិននី វិធូរ អភិបាលស្រុកវ៉ារិន បានឲ្យដឹងថា វត្តប្រាសាទសីលវ័ន្តនេះ ត្រូវបានកសាងឡើងតាំងពីឆ្នាំ១៩៤១ នៅលើផ្ទៃដីទំហំ ១៦.៦៩៨ ម៉ែត្រការ៉េ ដឹកនាំកសាងដោយព្រះចៅអធិការដំបូងព្រះនាម ឡែម សោន ខណៈ ពេលនោះព្រះចៅអធិការវត្ត បានដឹកនាំប្រជាពុទ្ធបរិស័ទក្នុងភូមិ កាប់ឆ្ការព្រៃ និង បានសាងសង់កុដិតូចមួយខ្នងធ្វើអំពីឈើប្រក់ស្លឹក សម្រាប់ព្រះសង្ឃគង់នៅ ហើយរហូតដល់ថ្ងៃ១៧មេសា១៩៧៥ វត្តនេះត្រូវបានរបបប៉ុល ពត បំផ្លាញចោលស្ទើរទាំងស្រុង លុះក្រោយថ្ងៃរំដោះ ៧មករា១៩៧៩ វត្តនេះត្រូវបានរៀបចំបង្កើតឡើងវិញ ដោយកសាងហេដ្ឋារចនាសម្ព័ន្ធ និង ទីសេនាសនៈទៅតាមលទ្ធភាពរបស់ប្រជាពុទ្ធបរិស័ទក្នុងភូមិ ហើយដោយសារកម្លាំងមហាសាមគ្គីរបស់ប្រជាពុទ្ធបរិស័ទជិតឆ្ងាយ ព្រះវិហារនេះត្រូវបានកសាងរួចជាស្ថាពរក្នុងអំលុងខែតុលា ឆ្នាំ២០១៩ បន្ទាប់ពីដំណើរការសាងសង់អស់រយៈពេល១០ឆ្នាំកន្លងនេះ ។
បើតាមរបាយការណ៍របស់គណៈកម្មការវត្តបានឲ្យដឹងថា ព្រះវិហារនេះពីមុន គឺជាបោតសម្រាប់ព្រះសង្ឃ និង ពុទ្ធបរិស័ទធ្វើបុណ្យទានជាបណ្ដោះអាសន្នតែប៉ុណ្ណោះ ប៉ុន្តែ នៅថ្ងៃទី២៨ ខែមករា ឆ្នាំ២០១២ ព្រះចៅអធិការ អាចារ្យ គណៈកម្មការវត្ត និង ពុទ្ធបរិស័ទចំណុះជើងវត្ត បានផ្តួចផ្ដើម និង ចលនាបំផុសកសាងព្រះវិហារ មានបណ្ដោយប្រវែង២២,៣០ម៉ែត្រ និង ទទឹងប្រវែង១២,៦០ម៉ែត្រ ហើយដោយមានការចូលរួមឧបត្ថម្ភពីសំណាក់សប្បុរសជនជិតឆ្ងាយ ព្រះវិហារនេះត្រូវបានកសាងរួចជាស្ថាពរនៅថ្ងៃទី០៨ ខែតុលា ឆ្នាំ២០១៩ ដែលចំណាយអស់ចវិកាសុបចំនួន ២២១.០៨២ដុល្លារអាមេរិក ខណៈបច្ចុប្បន្ននៅជំពាក់គេចំនួន១៥.៨៥០ដុល្លារអាមេរិកទៀត ។
មានប្រសាសន៍ក្នុងឱកាសនោះ លោក នាក់ ណេរ៉ុន អភិបាលរងខេត្តសៀមរាប បានសម្ដែងនូវការកោតសរសើរ និង អរគុណ ចំពោះព្រះសង្ឃ អាជ្ញាធរស្រុក ឃុំ ប្រជាពលរដ្ឋក្នុងភូមិ រួមទាំងសប្បុរសជនជិតឆ្ងាយ ដែលបានសហការ សាមគ្គីគ្នា និង ចូលរួមជាថវិកាទៅតាមលទ្ធភាពរបស់ខ្លួន ក្នុងការកសាងព្រះវិហារនេះ រហូតដល់រួចរាល់ជាស្ថាពរ ហើយត្រូវបានប្រារព្ធពិធីបុណ្យបញ្ចុះខណ្ឌសីមា ដាក់ឲ្យប្រើប្រាស់ជាផ្លូវការ សម្រាប់វិស័យព្រះពុទ្ធសាសនា ដែលជាសាសនារបស់រដ្ឋ ។
លោក នាក់ ណេរ៉ុន មានប្រសាសន៍បន្ថែមថា មុនដំបូងបង្អស់ គឺត្រូវអរគុណសន្តិភាព ព្រោះថា បើប្រទេសជាតិគ្នាសន្តិភាពទេនោះ កុំថាឡើយការកសាងសមិទ្ធផលទាំងវិស័យពុទ្ធចក្រ និង អាណាចក្រ សូម្បីតែការរស់នៅប្រចាំថ្ងៃរបស់ប្រជាពលរដ្ឋយើងក៏ជួបប្រទះនូវការលំបាកផងដែរ ដូចបងប្អូនប្រជាពលរដ្ឋយើងនៅទីនេះបានដឹងស្រាប់ហើយថា ចាប់ពីស្រុកទេសមានសង្គ្រាមចាប់ពីឆ្នាំ១៩៧០ រហូតដល់ឆ្នាំ១៩៩៨ មុនគោលនយោបាយឈ្នះឈ្នះ តំបន់យើងនេះគឺជាសមរភូមិប្រយុទ្ធគ្នាយ៉ាងស្រួចស្រាល់ជារៀងរាល់ថ្ងៃ ធ្វើឲ្យជីវភាពរស់នៅប្រចាំថ្ងៃរបស់ប្រជាពលរដ្ឋយើងជួបប្រទះនូវការលំបាកជាខ្លាំង ។
លោក នាក់ ណេរ៉ុន មានប្រសាសន៍បន្ថែមទៀតថា ក្រោមគោលនយោបាយឈ្នះឈ្នះរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និង ក្រោមការដឹកនាំប្រកបដោយគតិបណ្ឌិតរបស់សម្ដេចតេជោ បានធ្វើឲ្យប្រទេសជាតិយើងទាំងមូលមានសុខសន្តិភាពពេញបរិបូរណ៍ និង មានការអភិវឌ្ឍលើគ្រប់វិស័យយ៉ាងឆាប់រហ័ស ដូចដែលយើងទាំងអស់គ្នាបានឃើញនឹងភ្នែកនៅក្នុងថ្ងៃនេះ ដូច្នេះក្នុងឱកាសនេះ សូមអំពាវនាវដល់បងប្អូនប្រជាពលរដ្ឋទាំងអស់ រួមទាំងក្មួយៗជាសិស្សានុសិស្សផងនោះ ត្រូវរួមគ្នាការពារសន្តិភាពនេះ ឲ្យស្ថិតស្ថេរគង់វង្សជារៀងរហូត និង ត្រូវប្រឆាំងដាច់ខាតចំពោះជនទាំងឡាយណាដែលមកបំផ្លិចបំផ្លាញសុខសន្តិភាពនេះ ព្រោះថាមានសន្តិភាព គឺមានសេចក្ដីសុខសប្បាយ និង មានការអភិវឌ្ឍ ។
ក្នុងឱកាសនោះដែរ លោក នាក់ ណេរ៉ុន អភិបាលបាលរងខេត្តសៀមរាប បានផ្ដាំផ្ញើដល់សិស្សានុសិស្សទាំងអស់ ត្រូវខិតខំប្រឹងប្រែងរៀនសូត្រ សម្រាប់បង្កើនចំណេះដឹងរបស់ខ្លួន ដើម្បីចូលរួមក្នុងការអភិវឌ្ឍសង្គមជាតិយើង ហើយមិនត្រូវប្រព្រឹត្តនូវអំពើទាំងឡាយណាដែលធ្វើឲ្យប៉ះពាល់អស្ថេរភាព និង កិត្តិយសខ្លួនឯង ក្រុមគ្រួសារ និង សង្គមជាតិ ត្រូវចៀសឲ្យឆ្ងាយពីគ្រឿងញៀន ល្បែងស៊ីសង អំពើអបាយមុខគ្រប់ប្រភេទ និង ត្រូវគោរពច្បាប់ចរាចរណ៍ឲ្យបានខ្ជាប់ខ្ជួន ជាពិសេសត្រូវចូលរួមអនុត្តនូវគោលនយោបាយភូមិឃុំមានសុវត្ថិភាពទាំង០៩ចំណុច ។
ជាកម្មវិធីចុងក្រោយព្រះតេជគុណ ព្រះមង្គលសិលាចា ជុំ គឹមឡេង ព្រះមេគណខេត្ត និង លោក នាក់ ណេរ៉ុន អភិបាលបាលរងខេត្ត រួមជាមួយនឹងមន្ត្រីអ្នកមុខអ្នកការ បានកាត់ឫសសីមាព្រះវិហារវត្តប្រាសាទសីលវ័ន្ត ហៅវត្តប្រាសាទ ដាក់ឲ្យប្រើប្រាស់ជាផ្លូវការ សម្រាប់វិស័យព្រះពុទ្ធសាសនា ៕
អត្ថបទ ៖ លោក លីវ សាន្ត
