កាលពីរសៀលថ្ងៃទី១២ ខែមីនា ឆ្នាំ២០២០ម្សិលមិញនេះ បុរសជនជាតិខ្មែរ ដែលកំពុងសម្រាកព្យាបាលជំងឺCovid-19 នៅមន្ទីរពេទ្យបង្អែកខេត្តសៀមរាប បង្ហាញភាពសប្បាយរីករាយ និងសុខភាពល្អ ខណៈឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាល អញ្ជើញចុះសួរសុខទុក្ខបុរសរូបនេះ នៅបន្ទប់សម្រាកព្យាបាលដាច់ដោយឡែក។
បន្ទាប់ពីអ្នកនាំពាក្យ ក្រសួងសុខាភិបាលកម្ពុជា បានប្រកាសជាផ្លូវការ កាលពីថ្ងៃទី០៧ ខែមីនា ឆ្នាំ២០២០ ថាមានបុរសជនជាតិខ្មែរដំបូងម្នាក់ បានឆ្លងជំងឺ Covid-19 ពីបុរសជនជាតិជប៉ុននោះ មានរយៈពេល ៧ថ្ងៃហើយ។
ក្នុងឱកាសជួបសួរសុខទុក្ខនេះ ឯកឧត្តមរដ្ឋមន្រ្តី សំណូមពរដល់បុរសរូបនេះ បន្តសហការណ៍ជាមួយ គ្រូពេទ្យជំនាញថែទាំ ទទួលទានអាហារ ហាត់ប្រាណឲ្យបានទៀងទាត់ និងកុំឲ្យមានការព្រួយបារម្ភអ្វីទាំងអស់។
បុរសជនជាតិខ្មែររូបនេះ បានថ្លែងនូវអំណរគុណយ៉ាងជ្រាលជ្រៅ ដល់រាជរដ្ឋាភិបាលកម្ពុជា ក៏ដូចជាក្រសួងសុខាភិបាល ដែលបានយកចិត្តទុកដាក់ ក្នុងការព្យាបាលរូបលោក និងអ្នកដែលកំពុងសង្ស័យថាមានឆ្លងមេរោគ Covid-19 នេះ។
ជាមួយគ្នាដែរ ឯកឧត្តមរដ្ឋមន្រ្តី ក្រសួងសុខាភិបាល ក៏បានកោតសសើរដល់មន្រ្តីសុខាភិបាល ដែលបាននិងខិតខំប្រឹងប្រែងបំពេញការងាររបស់ខ្លួនអស់ពីកម្លាំងកាយចិត្ត ខណៈរបស់សម្តេចតេជោ ប្រមុខរាជរដ្ឋាភិបាល បាននិងកំពុងតែយកចិត្តទុកដាក់ខ្ពស់លើបញ្ហាមួយនេះផងដែរ។ ឯកឧត្តមរដ្ឋមន្រ្តី មានសេចក្តីសង្ឃឹមយ៉ាងមុតមាំ ថាបុរសជនជាតិខ្មែរដែលមានផ្ទុកមេរោគ Covid-19 នឹងបានជាសះស្បើយ ពីជំងឺនេះក្រោមការមើលថែព្យាបាល របស់លោកគ្រូ-អ្នកគ្រូពេទ្យក្នុងមន្ទីរពេទ្យខេត្តសៀមរាប។
អត្ថបទនិង រូបថត ៖ មន្ទីរពេទ្យបង្អែកខេត្តសៀមរាប
កែសម្រួលអត្ថបទ ៖ លោក សេង ផល្លី
