សំណើរសុំគម្រោងប្រព័ន្ធចម្រោះទឹកកខ្វក់ របស់រដ្ឋបាលស្រុកក្រឡាញ់ ទៅកាន់មន្ទីរសាធារណការនិងដឹកជញ្ជូនខេត្តសៀមរាប តាំងពីឆ្នាំ២០១៤ បានបង្ហាញរូបរាងជាបន្តបន្ទាប់ តាមរយៈកិច្ចសហប្រតិបត្តិការជាមួយ ទីភ្នាក់ងារសហប្រតិបត្តិការអន្តរជាតិរបស់ជប៉ុន ហៅកាត់ថា ចាយកា (JICA)។
គម្រោងប្រព័ន្ធចម្រោះទឹកកខ្វក់នេះ ចាយកា បានធ្វើការសិក្សាទៅលើស្រុកពួក ស្រុកប្រាសាទបាគង ស្រុកសូទ្រនិគម និងស្រុកក្រឡាញ់។ ប្រសិនបើគម្រោងនេះ ត្រូវបានសម្រេច ចាយកា នឹងផ្ដល់ជំនួយទាំងថវិកា និងបច្ចេកទេស សម្រាប់ស្រុកមួយ ក្នុងចំណោម៤ ស្រុកខាងលើ ក្នុងខេត្តសៀមរាប។
តាមការឲ្យដឹងពីលោក សុខ ណារ៉េត អភិបាលរងស្រុកក្រឡាញ់ បានឲ្យដឹងថា គម្រោងប្រព័ន្ធចម្រោះទឹកកខ្វក់នេះ មន្ត្រីជំនាញមន្ទីរសាធារណការ និងដឹកជញ្ជូនខេត្ត និងចាយកា បានចុះសិក្សាដំបូងកាលពីឆ្នាំ២០១៦ និងថ្មីៗនេះ នៅដើមខែមីនា ឆ្នាំ២០២០ ដែលគម្រោងនេះបានសិក្សានៅខាងក្រោយផ្សារក្រឡាញ់ ស្ថិតក្នុងឃុំកំពង់ថ្កូវ។
លោកអភិបាលរងស្រុក បញ្ជាក់ថា ប្រសិនបើគម្រោងនេះត្រូវបានសម្រេចដាក់ ក្នុងស្រុកក្រឡាញ់ វានឹងជួយដល់ការប្រមូលទឹកកខ្វក់ក្នុងទីប្រជុំជនស្រុក រំដោះទឹកជំនន់ ជួយលើកកម្ពស់សុខុមាលភាព និងអនាម័យរបស់ប្រជាពលរដ្ឋក្នុងស្រុកក្រឡាញ់ទាំងមូល។
ដោយមានកិច្ចសហការល្អរវាងលោកស្រី ម៉ននី រង្ស៊ី អភិបាលស្រុកក្រឡាញ់ រួមនិងមន្ត្រីគ្រប់ជាន់ថ្នាក់របស់រដ្ឋបាលស្រុក ជាមួយក្រុមហ៊ុនជប៉ុន និងអ្នកជំនាញការចាយកា ព្រមទាំងមន្ទីរសាធារណការនិងដឹកជញ្ជូនខេត្ត នៅខែមេសា ឆ្នាំ២០២០នេះ ក្រុមការងារជំនាញរបស់ពួកគេ នឹងចុះមកសិក្សាលើកចុងក្រោយ ដែលលោកសង្ឃឹមថា ស្រុកក្រឡាញ់មានភាគរយខ្ពស់ ទទួលបានគម្រោងនេះ។
រូបថត ៖ រដ្ឋបាលស្រុកក្រឡាញ់
អត្ថបទ ៖ លោក សេង ផល្លី
