ការផ្សព្វផ្សាយព័ត៌មានមិនពិត អំពីជំងឺកូវីត-១៩ ធ្វើឲ្យប្រជាពលរដ្ឋមានវិបត្តិផ្លូវចិត្ត និងប៉ះពាល់ជីវភាពរស់នៅប្រចាំថ្ងៃ
ជំងឺកូវីត-១៩ អាចព្យាបាលបាន តែការផ្សព្វផ្សាយព័ត៌មានមិនពិត បានបង្កភាពភ័យខ្លាច ក្លាយទៅជាជម្ងឺដ៏កាចសាហាវជាងកូវិត-១៩ទៅទៀត ដូច្នេះកត្តាសំខាន់ដែលត្រូវយកចិត្តទុកដាក់នៅក្នុងវិបត្តិនេះ គឺការថែរក្សាសុវត្តិភាពផ្លូវចិត្តជូនប្រជាពលរដ្ឋ នេះបើតាមប្រសាសន៍ ឯកឧត្តម ផៃ ស៊ីផាន រដ្ឋមន្រ្តីប្រតិភូអមនាយករដ្ឋមន្រ្តី ប្រធានអង្គភាពអ្នកនាំពាក្យរាជរដ្ឋាភិបាល បានលើកឡើង ក្នុងជំនួបពិភាគ្សាការងារ ជាមួយលោក លី សំរឹទ្ធ អភិបាលរងខេត្តសៀមរាប រួមនិងមន្រ្តីអ្នកនាំពាក្យ ជុំវិញអង្គភាពរដ្ឋបាលខេត្តសៀមរាប នារសៀលថ្ងៃទី១៣ ខែមីនា ឆ្នាំ២០២០។
តាមការបញ្ជាក់ ឯកឧត្តម ផៃ ស៊ីផាន ក្នុងឱកាសនោះ មកទល់ពេលនេះ នៅកម្ពុជាពុំទាន់មានករណីស្លាប់ ដោយសារជំងឺកូវីត-១៩ នៅឡើយទេ ក៏ប៉ុន្តែ ដោយសារតែការបញ្ចេញព័ត៌មានមិនពិត បានធ្វើឲ្យករណីកូវីត-១៩ បានក្លាយជាវិបត្តិនៃការភ័យខ្លាច បង្កគ្រោះថ្នាក់ដល់សង្គម។
ឯកឧត្តមបញ្ចាក់បន្ថែមថា ក្នុងតំណាក់ការនៃវិបត្តិកូវិត-១៩ ការពង្រឹងវិស័យព័ត៌មាន ដើម្បីថែរក្សាសុវត្ថិភាពផ្លូវចិត្តជូនប្រជាពលរដ្ឋ គឺជាកត្តាសំខាន់ខ្លាំងណាស់ អ្វីដែលត្រូវធ្វើឲ្យមានប្រសិទ្ធភាព គឺការផ្សព្វផ្សាយឲ្យសាធារណជន គ្រប់ជាន់ថ្នាក់ ទាំងនៅទីក្រុង និងជនបទ បានយល់ ជឿ និងចូលរួមទប់ស្កាត់ការរីករាលដាលនៃជំងឺនេះ។
ក្រោមការចាត់តាំងសកម្មភាពនៃការធ្វើសន្និសីទសារព័ត៌មាន ការផ្សព្វផ្សាយតាមរយៈវេទិកាសាធារណៈ ពិសេសមន្ទីរព័ត៌មានខេត្តសៀមរាបត្រូវសកម្ម បង្កើនការយកចិត្តទុកដាក់បន្ថែម លើកម្មវិធីសន្ទនាមតិ ដែលមានស្រាប់ នៅក្នុងកម្មវិធីទូទស្សន៍អនឡាញ និងវិទ្យុហ្វេសអឹម របស់ខ្លួន ដោយអញ្ជើញមន្ត្រីជំនាញសុខាភិបាល ឆ្លើយតបចម្ងល់តាមទូរស័ព្ទ ជាមួយប្រជាពលរដ្ឋ និងបន្តការផ្សព្វផ្សាយព័ត៌មានបច្ចុប្បន្នភាព នៃការតាមដានស្ថានភាពវិបត្តិកូវីត-១៩ ជូនប្រជាពលរដ្ឋឲ្យបានញឹកញាប់។ សកម្មភាពទាំងអស់នេះ នឹងអាចចូលរួមបញ្ជាក់ប្រាប់ជូនប្រជាពលរដ្ឋថា ព័ត៌មានពិតនៅទីនេះ ចៀសវាងការស្តាប់ ការមើល ហើយទទួលយកព័ត៌មានដែលគ្មានប្រភពច្បាស់លាស់ ព័ត៌មានមិនពិត ដែលបង្កឲ្យមានការភ័យខ្លាច។
នៅក្នុងដំណើរបំពេញការងារនៅខេត្តសៀមរាបនេះ ក្រៅពីជំនួបពិភាក្សាការងារស្តីពីការថែរក្សាសុវត្តិភាពផ្លូវចិត្តជូនប្រជាពលរដ្ឋ ឯកឧត្តមក៏បានពិនិត្យស្វែងយល់ផងដែរ អំពីស្ថានភាពទូទៅក្នុងក្រុងសៀមរាប និងបានជួបស្តាប់របាយការណ៍របស់ប្រធានមន្ទីរសុខាភិបាល ស្តីពីបច្ចុប្បន្នភាព នៃការព្យាបាលបុរសមានផ្ទុកជំងឺកូវីត-១៩ ព្រមទាំងបានជួបសំណេះសំណាលលើកទឹកចិត្តគ្រូពេទ្យបង្អែកខេត្តសៀមរាប ដែលឯកឧត្តមចាត់ទុកថា ជាគ្រូពេទ្យជួរមុខនៃសមរភូមិវិបត្តិកូវីត-១៩។
ឆ្លៀតក្នុងឱកាសនោះ ឯកឧត្តម ផៃ ស៊ីផាន បានបង្ហាញនូវសារនយោបាយជុំវិញវិបត្តិកូវិត-១៩ ផ្ញើជូនប្រជាពលរដ្ឋយ៉ាងដូច្នេះថា ៖
ក្នុងវីដេអូខាងក្រោម ៖
