ការសរសេរកុហក ឬព័ត៌មានមិនពិត នៅលើបណ្តាញផ្សព្វផ្សាយសង្គម ដូចជា Facebook ឬYoutube ជាដើម អាចជាប់ទោសបាន ព្រោះអ្នកសរសេរនោះមិនបានរៀនត្រឹមត្រូវ ខាងផ្នែកសារព័ត៌មាន នេះបើតាមប្រសាសន៍ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន កាលពីថ្ងៃទី១៧ ខែមីនា ឆ្នាំ២០២០ ក្នុងពិធីប្រកាសចូលកាន់មុខតំណែងថ្មីរបស់ប្រធានមន្ទីរព័ត៌មានខេត្តពោធិ៍សាត់។
ឯកឧត្តមរដ្ឋមន្ត្រី លើកឡើងថា កាលពីមុនប្រទេសដែលមានកំលាំងទ័ព មានអាវុធច្រើន ជាប្រទេស ដែលមានអំណាចរឹង ហើយអាចលើកទ័ពទៅច្បាំងជាមួយ ប្រទេសគេ អាចនឹងឈ្នះ ប៉ុន្តែមុននឹងឈ្នះ ក៏មានការបាត់បង់អាយុជីវិតកងទ័ព និងមានការចំណាយលុយអស់ជាច្រើនថែមទៀតផង ។ តែសម័យឥឡូវ គេមិនប្រើអំណាច រឹង ទៀតនោះទេ គេប្រើអំណាចទន់ តាមរយះ អក្សរសាស្រ្ត ខ្សែភាពយន្ត គ្រប់រូបភាព និងប្រពន្ធ័ផ្សព្វផ្សាយថ្មីៗជាច្រើន ជាពិសេស ព័ត៌មាន នេះឯង ដើម្បីជះឥទ្ធិពល លើប្រទេសផ្សេងទៀត។
ឯកឧត្តមបន្ថែមថា សម្រាប់សម័យនេះ ព័ត៌មានមានសារសំខាន់ណាស់ ព្រោះមនុស្សម្នាក់ ជាទូរទស្សន៍មួយ ហើយបញ្ហានេះ ក៏មានការលើកជាសំណួរ ថាហេតុអ្វីអនុញ្ញាត្តឲ្យមានអ្នកសារព័ត៌មានច្រើនម្ល៉េះ? ប៉ុន្តែសម្រាប់រដ្ឋមនុញ្ញ នៃព្រះរាជាណាចក្រកម្ពុជា បានកំណត់ថា សិទ្ធិធ្វើជាអ្នកសារព័ត៌មាន គឺជាសិទ្ធិរបស់ប្រជាពលរដ្ឋ ម្នាក់ៗ ដែលមិនអាចហាម ឃាត់គេបាននោះទេ តែបើខុស នឹងមានបញ្ហាប្រឈម។
បញ្ហានេះ ឯកឧត្តមរដ្ឋមន្ត្រី បញ្ជាក់ថា ដំណឹងដែលចុះផ្សាយនៅ កាសែត និងប្រពន្ធ័ព័ត៌មានស្របច្បាប់ និងមានវិជ្ជាជីវះ តាមរយះការសម្ដែងមតិ នៅពេលចុះផ្សាយខុស មិនមានការជាប់ទោសនោះទេ ដោយតម្រូវ អោយចុះផ្សាយកែតម្រូវ។ ដោយឡែក អ្នកដែលសរសេរកុហក ឬមិនពិត នៅលើបណ្តាញផ្សព្វផ្សាយសង្គម និងពុំមែនជាអ្នកសារព័ត៌មានស្របច្បាប់ អាចជាប់ទោសបាន ដោយសារមិនបានរៀនត្រឹមត្រូវ ខាងផ្នែកសារព័ត៌មាន។
ទន្ទឹមនោះ ឯកឧត្តមរដ្ឋមន្ត្រី ណែនាំដល់ ប្រធាន អនុប្រធានមន្ទីរ និងមន្រ្តី ផ្នែកនៃមន្ទីរព័ត៌មាន ត្រូវចេះប្រើប្រាស់ប្រពន្ធ័ផ្សព្វផ្សាយសង្គមនេះ ជាពិសេសត្រូវជួបប្រជុំគ្នាជារៀងរាល់ព្រឹក ដើម្បីពិនិត្យតាមដានរាល់ព័ត៌មាន ដែលកើតមានឡើងថ្មីៗ ក្នុងព័ត៌មាន ដែលពាក់ព័ន្ធក្នុងខេត្តរបស់ខ្លួន និងរាយការណ៍ ជូនអភិបាលរងខេត្ត ដែលទទួលបន្ទុកការងារព័ត៌មាន និងបន្តជម្រាបដល់អភិបាលខេត្ត ដើម្បីមានវិធានការដោះស្រាយ និងស្រាយបំភ្លើជាបន្ទាន់ ជូនដល់ ប្រជាពលរដ្ឋ ថារឿងនេះកើតឡើងដោយសារមូលហេតុអ្វី? ទើបមានការស្ងប់ចិត្ត និង បញ្ជៀស បាននូវព័ត៌មានក្លែងក្លាយ។
ឯកឧត្តមរដ្ឋមន្ត្រី ក៏បានបញ្ជាក់ផងដែរថា ការងារព័ត៌មាន ធ្វើ ១ ថ្ងៃ ២៤ ម៉ោង ហើយ ១ អាទិត្យ ៧ ថ្ងៃ មិនមានពេលឈប់នោះទេ ដើម្បីតាមឲ្យទាន់សភាពការ។ ជាងនេះទៅទៀត អ្វីដែលសំខាន់គឺការរួមគ្នា នៅក្នុងមន្ទីរ និងថ្នាក់ដឹក ជាមួយមន្រ្តីជុំវិញខេត្ត ពិសេសត្រូវមានកិច្ចសហការជាប់ជាមួយ អភិបាលខេត្ត និងអភិបាលរងខេត្ត ដែលទទួលបន្ទុកការងារព័ត៌មាន ដើម្បីឆ្លើយតបបានទាន់ពេលវេលា៕
អត្ថបទ និង រូបថត ៖ ក្រសួងព័ត៌មាន
សម្រួលអត្ថបទ៖ សេង ផល្លី
