កាលពីរសៀលថ្ងៃទី១៧ ខែមីនា ឆ្នាំ២០២០ កម្លាំងសមត្ថកិច្ចនៃស្នងការដ្ឋាននគរបាលខេត្តសៀមរាប បានឃាត់ខ្លួនបុរស៥នាក់ ពាក់ព័ន្ធនឹង ករណីជួញដូរ ចាត់ចែង រក្សាទុក និងប្រើប្រាស់ដោយខុសច្បាប់ នូវសារធាតុញៀន ក្នុងខេត្តសៀមរាប។
តាមការឲ្យដឹងពីកម្លាំងសមត្ថកិច្ច ក្នុងចំណោមជនសង្ស័យ៥នាក់នេះ ជនសង្ស័យ២នាក់ ត្រូវសមត្ថកិច្ចធ្វើការឃាត់ខ្លួនបាន នៅចំនុចលំនៅដ្ឋាន ស្ថិតនៅភូមិ ពួកថ្មី ឃុំពួក ស្រុកពួក ខេត្តសៀមរាប និងដកហូតបានវត្ថុតាងដូចជា ជញ្ជីងថ្លឹងគ្រឿងញៀនចំនួន ០១គ្រឿង ទូរស័ព្ទដៃចំនួន ០២គ្រឿង ឧបករណ៏ប្រើប្រាស់ និងសំភារៈវេចខ្ចប់គ្រឿងញៀនមួយចំនួនទៀត។
ដោយឡែក ជនសង្ស័យ៣នាក់ទៀត កម្លាំងសមត្ថកិច្ចនៃការិយាល័យប្រឆាំងគ្រឿងញៀនខេត្ត បានសហការជាមួយ កម្លាំងការិយាល័យចរាចរណ៍ផ្លូវគោកខេត្ត ឃាត់ខ្លួនបាននៅចំនុចលើដងផ្លូវ ស្ថិតនៅភូមិវត្តដំណាក់ សង្កាត់សាលាកំរើក ក្រុងសៀមរាប និងនៅចំនុចភូមិទី៦ សង្កាត់ចុងឃ្នៀស ក្រុងសៀមរាប ខេត្តសៀមរាប រួមនិងវត្ថុតាង ម្សៅមេតំហ្វេតាមីនប្រភេទទឹកកចំនួន០៧ កញ្ចប់ស្មើនឹងទម្ងន់៦.៣ក្រាម ទូរស័ព្ទដៃចំនួន០៣គ្រឿង។
បច្ចុប្បន្នជនសង្ស័យទាំង៥នាក់ មន្ត្រីសមត្ថកិច្ចការិយាល័យជំនាញ បាននិងកំពុងរៀបចំសំណុំរឿង ដើម្បីបញ្ជូនទៅកាន់សាលាដំបូងខេត្ត ចាត់ការតាមនីតិវិធី។
អត្ថបទ និង រូបថត ៖ ថាច់ ពិសុទ្ធ
សម្រួលអត្ថបទ៖ សេង ផល្លី
