កាលពីរសៀលថ្ងៃទី១៧ ខែមីនា ឆ្នាំ២០២០ម្សិលមិញនេះ គ្រួសារក្រីក្រ១២គ្រួសារ ដែលរស់នៅលើដីវត្តអារញ្ញសាគរតាំងពីឆ្នាំ១៩៧៩ និងពុំមានដីលំនៅដ្ឋានជាកម្មសិទ្ធ ស្ថិតនៅក្នុងភូមិអារញ្ញ សង្កាត់សៀមរាប ក្រុងសៀមរាប បានធ្វើការចាប់ឆ្នោតទទួលយកដីឡូតិ៍ ដែលជាការបរិច្ចាគ របស់ចៅអធិការ និងគណៈកម្មាការវត្តអារញ្ញសាគរ។
គួររំលឹកថា នៅឆ្នាំ២០០៦ ប្រជាពលរដ្ឋក្រីក្រទាំង១២គ្រួសារនេះ បានធ្វើកិច្ចសន្យាថា បើវត្តត្រូវការដីនៅថ្ងៃណា ពួកគាត់នឹងរុះរើចេញពីដីនេះដោយគ្មានលក្ខខណ្ឌ និងគ្មានការតវ៉ា ហើយពួកគាត់បានផ្តិតមេដៃយល់ព្រមផងដែរ។ លុះដល់ថ្ងៃទី២៨ ខែសីហា ឆ្នាំ២០១៩ ព្រះចៅអធិការវត្ត បានកោះហៅពលរដ្ឋទាំង១២គ្រួសារ ដែលមានការចូលរួមពីអាជ្ញាធរភូមិឃុំនិងសង្កាត់ ព្រមទាំង ព្រះសង្ឃ គណៈកម្មការអាចារ្យវត្ត សុំឲ្យពលរដ្ឋចាកចេញពីដីវត្ត។ តែដោយទឹកព្រះទ័យសណ្តោសប្រណី និងយល់ឃើញថា ពួកគាត់ពុំមានដីសង់លំនៅដ្ឋានស្នាក់អាស្រ័យ និងមានជីវភាពក្រីក្រ ទើបព្រះអង្គសម្រេចព្រះទ័យ យកដីដែលបានទិញនៅក្រោយវត្ត និងទិញបន្ថែមទៀត ដោយយកថវិកាទ្រទ្រង់វត្តមកបង់រំលោះ។
តំណាងប្រជាពលរដ្ឋទាំង១២គ្រួសារ បានសម្តែងក្តីត្រេកអរ និងបានថ្លែងអំណរព្រះគុណដល់ ព្រះគ្រូវិសារទោ ហ៊ាក់ គឹមហ៊ត់ ចៅអធិការ គណៈកម្មការវត្ត និងអាជ្ញាធរដែនដី នូវទឹកព្រះទ័យ និងទឹកចិត្តសប្បុរសធម៌ គិតគូរដល់ជនក្រីក្រខ្វះខាត ការបរិច្ចាគនេះ គឺជាកម្លាំងចិត្តមួយ សម្រាប់ពួកគាត់ខិតខំបន្ថែមទៀត ដើម្បីលើកកម្ពស់ជីវភាពគ្រួសារ ឲ្យរួចផុតពីភាពក្រីក្រ។
លោក ម៉ៃ សាមេត ចៅសង្កាត់សៀមរាប បង្ហាញថា អាជ្ញាធរសង្កាត់ បានចូលរួមសម្របសម្រួលដោះស្រាយដីលំនៅដ្ឋានជូនពួកគាត់ ដោយក្នុងមួយគ្រួសារ ទទួលបានដីលំនៅដ្ឋាន ទទឹងប្រវែង ៦ម៉ែត្រ និងបណ្តោយ ១៣ម៉ែត្រ និងបានកំណត់ផ្លូវរួមសម្រាប់ចេញចូល មានទទឹង៥ម៉ែត្រ ស្ថិតនៅខាងកើតវត្ត ក្នុងភូមិពោធិ សង្កាត់សៀមរាប ក្រុងខេត្តសៀមរាប។ ក្រោយការចាប់ឆ្នោតអាជ្ញាធរសង្កាត់ និងព្រះគ្រូចៅអធិការ បានកំណត់ឱ្យរុះរើលំនៅដ្ឋានពីទីតាំងចាស់ ចាប់ពីពេលនេះ យ៉ាងយូរត្រឹមខែធ្នូឆ្នាំ២០២០ ក្នុងករណីគ្រួសារ ដែលមានលទ្ឋភាព អាចមកសាងសង់លំនៅដ្ឋានមុនបានគ្រប់ពេលវេលា។
តាមការបញ្ជាក់ របស់លោកចៅសង្កាត់ ដីលំនៅដ្ឋានថ្មីនេះ តម្រូវឲ្យប្រជាពលរដ្ឋទាំង ១២គ្រួសារប្តូរសៀវភៅគ្រួសារ និងសៀវភៅស្នាក់នៅថ្មី ដោយសារទីតាំងថ្មីស្ថិតនៅក្នុងភូមិពោធិ ខុសពីទីតាំងរស់នៅចាស់ស្ថិតនៅភូមិអារញ្ញ។ មួយវិញទៀត ការបំបែកបណ្ណកម្មសិទ្ឋសម្គាល់ម្ចាស់អចលនវត្ថុ លោកជា ចៅសង្កាត់ពុំមានសិទ្ឋិធ្វើជូនប្រជាពលរដ្ឋទាំង១២គ្រួសារនេះបានឡើយ តែក្នុងនាមអាជ្ញាធរមូលដ្ឋាន នឹងខិតខំជួយរៀបចំលិខិតស្នាម កាន់កាប់បណ្តោះអាសន្ន ដើម្បីអាច តប្រព័ន្ឋភ្លើង និងដើម្បីអាចស្នើសុំបណ្ណកម្មសិទ្ឋសម្គាល់ម្ចាស់អចលនវត្ថុ ឬហៅថាប្លង់រឹង តាមនីតិវិធីរបស់មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត។
សូមជម្រាបថា វត្តអារញ្ញសាគរ គឺជាគោលដៅទេសចរណ៍វត្តគំរូ ក្នុងចំណោមវត្តទាំង៩ ក្នុងក្រុងសៀមរាប។ បន្ទាប់ពីការរុះរើលំនៅដ្ឋាននេះ សិស្សានុសិស្ស និងអ្នកដំណើរឆ្លងកាត់ទៅមក នឹងទទួលបានផ្លូវធ្វើដំណើរធំទូលាយ ជាពិសេសផ្លូវចូលសាលារៀនដែលស្ថិតនៅក្បែរវត្តនេះ។
អត្ថបទ និង រូបថត ៖ យូ វង្ស
សម្រួលអត្ថបទ៖ សេង ផល្លី
