នៅព្រឹកថ្ងៃទី១៨ ខែមីនា ឆ្នាំ២០២០នេះ ឯកឧត្តមនាយឧត្តមសេនីយ៍ ឃឹម ប៊ុនសុង រដ្ឋលលេខាធិការ ក្រសួងការពារជាតិ តំណាងសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានដឹកនាំប្រតិភូ អញ្ជើញចុះមកសួរសុខទុក្ខនាយទាហាន នាយទាហានរង និង ពលទាហាន សម្រាប់ពិធីបុណ្យចូលឆ្នាំថ្មី ប្រពៃណីជាតិខ្មែរ ដែលនឹងឈានមកដល់នាពេលខាងមុខ នៅមជ្ឈមណ្ឌលអភិវឌ្ឍ យោធិនពិការ សម្ដេចតេជោ ហ៊ុន សែន គូលែន៣១៧ និង អ្នកជម្ងឺកំពុងសម្រាកព្យាបាល នៅក្នុងមន្ទីរពេទ្យយោធភូមិភាគទី៤ ស្ថិតក្នុងស្រុកប្រាសាទបាគង ខេត្តសៀមរាប។
ឯកឧត្តមនាយឧត្តមសេនីយ៍ ឃឹម ប៊ុនសុង នាំយកនូវការផ្តាំផ្ញើរ សួរសុខទុក្ខ ពីសំណាក់សម្តេចនាយករដ្ឋមន្ត្រី សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និង សម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្ត្រីក្រសួងការពារជាតិ និងលោកជំទាវ ដែលជានិច្ចកាល សម្តេចតែងតែគិតគូរពីសុខទុក្ខ និង ជីវភាពរស់នៅរបស់យោធិន នាយទាហាន នាយទាហានរង និងពលទាហាននៃកងយោធពលខេមរភូមិន្ទ សំខាន់ក្នុងមជ្ឈមណ្ឌលអភិវឌ្ឍយោធិនពិការ សម្ដេចតេជោ ហ៊ុន សែន គូលែន៣១៧ ខេត្តសៀមរាបទាំងអស់។ នៅពេលរដូវបុណ្យទានប្រពៃណីជាតិ ក៏ដូចពិធីបុណ្យជាតិ រាជរដ្ឋាភិបាលកម្ពុជា ក៏ដូចជាគណៈប្រតិភូក្រសួងការពារជាតិ និង អាជ្ញាធរគ្រប់លំដាប់ថ្នាក់ តែងតែចុះ សួរសុខទុក្ខ ដល់បងប្អូនយោធិនពិការ បាត់បង់សុពលភាពការងារ និងយោធិននិវត្តន៍នៅតាមមជ្ឈមណ្ឌលអភិវឌ្ឍន៍យោធិនពិការក៏ដូចនៅតាម បណ្តាកងពល និងអង្គភាពផងដែរ ។
ឯកឧត្តម ធ្វើការកោតសរសើរចំពោះវីរភាព ក្នុងស្មារតីដ៏មុះមុតរបស់បងប្អូនយោធិនពិការទាំងអស់ ដែលបានចូលរួមបូជាសាច់ស្រស់ ឈាមស្រស់ ការពារបូរណភាពដែនដី និង រកសុខសន្តិភាពជូនជាតិមាតុភូមិរហូតធ្លាក់ខ្លួនពិការ ។ ដោយមាននយោបាយ ឈ្នះ ឈ្នះ របស់សម្តេចតេជោ ហ៊ុន សែន នាយករដ្ឋមន្រ្តី បានបង្រួបបង្រួមជាតិ សាមគ្គីជាតិ ឯកភាពផ្ទៃក្នុង បានបញ្ចប់សង្គ្រាមនៅកម្ពុជាទាំងស្រុងក្នុងឆ្នាំ១៩៩៨ ធ្វើឲ្យជីវភាពរស់នៅរបស់ប្រជាពលរដ្ឋកាន់តែប្រសើរឡើង និងប្រទេសជាតិមានការអភិវឌ្ឍរីកចម្រើនលើគ្រប់វិស័យ។
ឆ្លៀតក្នុងឱកាសនោះ ឯកឧត្តម ក៏បានធ្វើការផ្តាំផ្ញើដល់បងប្អូនយោធិនពិការទាំងអស់ ត្រូវខិតខំថែរក្សាសុខភាព និងសំខាន់ចូលរួម ក្នុងការបង្ការទប់ស្កាត់ជំងឺរលាកផ្លូវដង្ហើមថ្មី ហៅថា COVID-19 ដែលបង្កឡើងដោយវីរុសកូរ៉ូណាប្រភេទថ្មី និង សូមឲ្យបងប្អូនចេះធ្វើអនាម័យដៃផ្ទាល់ខ្លួន ឲ្យបានស្អាតជាប្រចាំ ព្រមទាំងក្នុងក្រុមគ្រួសារផងដែរ ។
ឯកឧត្តម ក៏បានថ្លែងអំណរគុណ និងកោតសសើរ ចំពោះមេបញ្ជាការ មេបញ្ជាការរង អង្គភាព នាយទាហាន និងពលទាហាន យោធិនពិការគូលែន៣១៧សៀមរាប ដែលរក្សាបាននូវប្រពៃណី សីលធម៌ អត្តចរិក និង វិន័យរបស់កងយោធពល ខេមរភូមិន្ទ ដោយកន្លងមកពុំដែល ធ្វើអំពើអ្វីមិនសមរម្យ បង្កការលំបាកដល់រាជរដ្ឋាភិបាលក្នុងការដោះស្រាយនោះឡើយ ។
ក្នុងនោះ ឯកឧត្តមនាយឧត្តមសេនីយ៍ ឃឹម ប៊ុនសុង បាននាំយកអំណោយសម្តេចពិជ័យសេនា ទៀ បាញ់ ប្រគល់ជូនមជ្ឈមណ្ឌលអភិវឌ្ឍ យោធិនពិការ សម្ដេចតេជោ ហ៊ុន សែន គូលែន៣១៧សៀមរាប នូវអង្ករ ៥តោន ថវិកា៥លានរៀល និង ចែកជួនដល់បងប្អូនយោធិនពិការ បាត់បង់សុពលភាពការងារ និង យោធិននិវត្តន៍ ទាំង ២៩៨នាក់ ដោយម្នាក់ៗទទួលបាន អាហារកញ្ចប់ គ្រឿងទេស ភេសជ្ជៈ និងថវិកាមួយចំនួន។ ចំពោះសិស្សានុសិស្ស ៦៤៥នាក់ ម្នាក់ៗ ទទួលបានសម្ភារៈសិក្សាមួយចំនួន ថវិកា៥ពាន់រៀល និង ប្រគេនព្រះសង្ឃនូវ អង្ករ អាហារកញ្ចប់ ភេសជ្ជៈ គ្រឿងទេស រួមទាំងបច្ច័យមួយចំនួនផងដែរ។ ដោយឡែក កងទ័ព និង គ្រួសារទ័ព កំពុងសម្រាកព្យាបាលជម្ងឺ នៅ ក្នុងមន្ទីរពេទ្យយោធភូមិភាគទី៤ ឯកឧត្តមនាយឧត្តមសេនីយ៍ ក៏បានចែកជូនអំណោយ របស់សម្តេចពិជ័យសេនា ទៀ បាញ់ ជូនដល់ពួកគាត់នូវ គ្រឿងទេស ភេសជ្ជៈ និងថវិកាមួយចំនួនផងដែរ។
អត្ថបទ និង រូបថត ៖ ម៉ី សុខារិទ្ធ
សម្រួលអត្ថបទ៖ សេង ផល្លី
