ប្រធានមន្ទីរសុខាភិបាលខេត្តសៀមរាប បង្ហាញថា បុរសជនជាតិខ្មែរទី១ ដែលឆ្លងជំងឺកូវីដ១៩ ពីជនជាតិជប៉ុន រំពឹងថានឹងអាចជាសះស្បើយក្នុងពេលឆាប់ៗ។ ដោយឡែកបុរសជនជាតិខ្មែរទី២ ដែលបានមកពីប្រទេសម៉ាឡេស៊ី រកឃើញ វិជ្ជមាន នៃវីរុសកូវីដ១៩ និងបានដាក់ឲ្យនៅដាច់ឡែក ក្នុងមន្ទីរពេទ្យបង្អែកខេត្តសៀមរាប នៅព្រឹកថ្ងៃទី២៣ ខែមីនា ឆ្នាំ២០២០នេះ តាមលទ្ធផលធ្វើតេស្តសំណាក រកឃើញថា អវិជ្ជមាននៃវីរុសកូវីដ១៩ វិញហើយ ប៉ុន្តែពួកគេទាំង២រូប នៅតែស្ថិតក្រោមការពិនិត្យតាមដាន និងដាក់ឲ្យនៅដាច់ឡែក ក្នុងមន្ទីរពេទ្យបង្អែកខេត្តសៀមរាបនៅឡើយទេ។
នាពេលបច្ចុប្បន្ន ក្នុងខេត្តសៀមរាប មានជនជាតិខ្មែរតែ ២រូបប៉ុណ្ណោះ បានឆ្លងជំងឺកូវីត១៩ ក្នុងនោះពួកគេក៏នៅតែមានសុខភាពល្អប្រសើរផងដែរ។ ទន្ទឹមនោះ មន្រ្តីជួរមុខនៃមន្ទីរពេទ្យបង្អែកខេត្តសៀមរាប ទទួលការពិនិត្យសំណាករបស់ជនដែលសង្ស័យថាមានឆ្លងវីរុសកូវីត១៩ បានចំនួន ១៧២នាក់ ក្នុងនោះចំនួន ៨នាក់ ត្រូវបានដាក់ឲ្យនៅដាច់ដោយឡែក និងតាមដានត្រួតពិនិត្យសុខភាពរយៈពេល១៤ថ្ងៃ។ សូមបញ្ជាក់ថា ជនទាំង៨នាក់នេះ គឺពុំមែនជាអ្នកឆ្លងឬផ្ទុកវីរុសកូវីត១៩ឡើយ។
អត្ថបទ និងរូបភាព៖ ងិន គឹមឡេង
សម្រួលអត្ថបទ៖ សេង ផល្លី
ព័ត៌មានជាតិ ថ្មីៗ
