យោងតាមការចុះផ្សាយនៅលើហ្វេសប៊ុករបស់លោកអភិបាលស្រុកបន្ទាយស្រី កាលពីថ្ងៃទី២៤ ខែមីនា ឆ្នាំ២០២០ បានបង្ហាញថា រដ្ឋបាលស្រុកបន្ទាយស្រី បានរៀចំក្រុមការងារពិសេសចំនួន៣៦ក្រុម ដើម្បីចុះផ្សព្វផ្សាយ វិធីបង្ការការពារខ្លួនពីជំងឺកូវីដ-១៩ នៅតាម ភូមិទាំង៣៦ ក្នុងស្រុកបន្ទាយស្រី ខេត្តសៀមរាប។
ក្រុមការងារពិសេសចំនួន៣៦ក្រុមនេះ នឹងចុះចែកខិតបណ្ណនៅតាមមូលដ្ឋាន និងផ្សព្វផ្សាសារអប់រំជាសំឡេង តាមឧបករណ៍បំពងសំឡេង ដើម្បីឲ្យប្រជាពលរដ្ឋនៅតាមខ្នងផ្ទះទទួលបានព័ត៌មានពិតប្រាកដ និងទុកចិត្តបាន។
យោងតាម ការចុះផ្សាយនេះដែរ បញ្ជាក់ថា ក្រុមការងារពិសេសទាំងនេះ បានបង្កើតឡើង ដែលមានសមាសភាពចូលរួមពីសំណាក់មេភូមិ មន្ត្រីមណ្ឌលសុខភាព នគរបាលបុស្តិ៍ សមាជិកក្រុមប្រឹក្សាឃុំ និងអ្នកស្ម័គ្រចិត្ត ដើម្បីតាមដាន ត្រួតពិនិត្យរកមុខសញ្ញា ដែលមានហានីភ័យ ធ្វើរបាយការណ៍ជាប្រចាំថ្ងៃ និងផ្តល់ជាមូលដ្ឋានដល់ថ្នាក់ដឹកនាំស្រុកធ្វើការវាយតម្លៃសភាពការណ៍និងសម្រេចចិត្តទាន់ពេលវេលា។
អត្ថបទ និងរូបភាព៖ គឿន វេត
សម្រួលអត្ថបទ៖ សេង ផល្លី
