ព័ត៌មានបឋម ៖ សមត្ថកិច្ចនគរបាលស្រុកពួក បានឲ្យដឹងថា នៅវេលាម៉ោងប្រមាណ៦ល្ងាច នៅថ្ងៃទី ២៨ ខែមីនា ឆ្នាំ២០២០នេះមានភ្លៀងនិងខ្យល់កន្ទ្រាក់បានកើតឡើង ប៉ះចំឃុំចំនួន៣ក្នុងស្រុកពួក គឺឃុំត្រីញ័រ , ឃុំល្វា និង ឃុំសសរស្ដម្ភ បណ្តាលឲ្យរលំផ្ទះចំនួន២ ខ្នង , របើកដំបូលផ្ទះចំនួន៣១ខ្នង និងទុស្សេខ្សែភ្លើងឆេះផ្ទះអស់១ខ្នង
ក្នុងនោះ ៖ នៅឃុំត្រីញ័រ ប៉ះពាល់៤ភូមិ រួមមានភូមិតាហុក , គោកដូង ធិបតី និងភូមិឈូក ធ្វើឲ្យរលំផ្ទះអស់ចំនួន១ខ្នង ទំហំ៦ម៉ែត្រគុណនឹង៧ម៉ែត្រ និង របើកដំបូលផ្ទះអស់ចំនួន២៧ខ្នង , ឃុំល្វា ប៉ះចំភូមិទួលរវៀង ធ្វើឲ្យរបើកដំបូលផ្ទះអស់ចំនួន៣ខ្នង និង នៅឃុំសសរស្ដម្ភ ប៉ះចំភូមិដំណាក់ស្លាញ ធ្វើឲ្យរបើកដំបូលផ្ទះអស់ចំនួន១ខ្នង និង ឆេះបន្ទប់គេង នៃផ្ទះចំនួនមួយខ្នង ទំហំ៨ម៉ែត្រគុណនឹង៩ម៉ែត្រ ដោយសារទុស្សេខ្សែភ្លើង បណ្ដាលឲ្យឆេះសម្ភារនិងប្រាប់មួយចំនួន ។
សមត្ថកិច្ចបានឲ្យដឹងទៀតថា ក្នុងហេតុការណ៍ទាំងអស់នេះ ពុំបណ្តាលឲ្យគ្រោះថ្នាក់ដល់មនុស្សឡើយ ៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
