យោធិនពិការទាំងអស់ សុខភាពពួកគាត់ខ្សោយ មិនមាំមួនដូចមនុស្សធម្មតានោះទេ ពួកគាត់ងាយនឹងឆ្លងជំងឺផ្សេងៗ ហេតុនេះ ថ្នាក់ដឹកនាំក្នុងមជ្ឈមណ្ឌលមិនដែលធ្វេសប្រហែសឡើយ គឺតែងតែយកចិត្តទុកដាក់តាមដាន ពិនិត្យ អង្កេតជាប្រចាំនិងអប់រំណែនាំពីវិធានការបង្ការនិងការពារជំងឺជារៀងរាល់សប្តាហ៍ ។ នេះបើតាមប្រសាសន៍ឯកឧត្តម ឧត្តមសេនីយ៍ឯក ពៅ ស៊ា នាយកមជ្ឈមណ្ឌលអភិវឌ្ឍន៍ យោធិនពិការសម្តេចតេជោ ហ៊ុន សែន គូលេន ៣១៧ សៀមរាប កាលពីព្រឹកថ្ងៃទី៣០ ខែមីនា ឆ្នាំ២០២០នេះ ។
ឯកឧត្តម ឧត្តមសេនីយ៍ឯក ពៅ ស៊ា មានប្រសាសន៍ បន្តថា បច្ចុប្បន្ននេះស្ថានភាពជំងឺផ្លូវដង្ហើមថ្មី កូវីដ១៩ កំពុងរាតត្បាតជុំវិញពិភពលោក ជាពិសេសកម្ពុជាយើងក៍ទទួលរងនូវការលំបាកនេះដែរ សម្រាប់ បងប្អូនយោធិនពិការ និងក្រុមគ្រួសារ ដែលរស់នៅក្នុងមជ្ឈមណ្ឌលនេះ គឺពួកយើងទាំអស់គ្នាមានសុខភាពល្អប្រសើរធម្មតាទេ តាំងពីកើតនូវវិបត្តិនៃជំងឺនេះ ថ្នាក់ដឹកនាំក្នុងមជ្ឈមណ្ឌលតែងតែតាមដានព័ត៌មានពីក្រសួងសុខាភិបាលជាប្រចាំអំពីដំណើរវីវត្តនិងការឆ្លងរាលដាលរបស់វា និងវិធានការបង្ការការពារ និង ស្តាប់ការណែនាំរបស់ប្រមុខរាជរដ្ឋាភិបាល ដែលមានសម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបាននឹងកំពុងយកចិត្តទុកដាក់គិតគូពីសុខទុក្ខបងប្អូនប្រជាពលរដ្ឋគ្រប់កាលៈទេសៈ ។ ជាពិសេសក្នុងស្ថានភាពការរាតត្បាតនៃជំងឺកូវីដ១៩នេះ និងអនុវត្តតាមការណែនាំរបស់អាជ្ញាធរខេត្តចុះអនុវត្តនិងពិនិត្យតាមដានជាប្រចាំពីស្ថានភាពសុខភាព ក៍ដូចជាសកម្មភាពប្រាស្រ័យទាក់ទងផ្សេងៗ ចៀសវាងការជួបជុំប្រមូលផ្តុំគ្នា រក្សាគម្លាតឱ្យឆ្ងាយពីគ្នាក្នុងការប្រាស្រ័យទាក់ទង ណែនាំឱ្យធ្វើអនាម័យខ្លួនប្រាណនិងលំនៅឋានជាប្រចាំផងដែរ ដោយលាងដៃឲ្យបានញឹកញាប់ជាមួយសាប៊ូឬទឹលអាល់កុល ញ៉ាំអាហារដែលចំអិនបានល្អ ហាត់ប្រាណ ដើម្បីការពារការជំងឺឆ្លងកូវិដ ១៩ និងទប់ស្កាត់ការរាតត្បាតជម្ងឺ ផ្សេង ៗនៅក្នុងមណ្ឌល ពិសេសបងប្អូនពលករដែលទើបតែត្រឡប់មកពីប្រទេសផ្សេងៗចំនួន២នាក់ យើងបានដាក់គាត់ឱ្យស្នាក់នៅដាច់ដោយឡែករយៈពេល១៤ថ្ងៃដើម្បីតាមដានពីសុខភាពគាត់ និងសុំកុំឱ្យគាត់ទៅជិតស្និទ្ឋនិងក្រុមគ្រួសារបងប្អូនមិត្តភក្កិ ។
ឯកឧត្តម ក៏បានអំពាវនាវបើសង្ស័យ ឬមានសុខភាពមិនប្រក្រតីក្នុងករណីមានរោគសញ្ញាដូចជា គ្រុនក្តៅខ្លួន ក្អក ហៀរសំបោរ ពិបាកដកដង្ហើម ឬចំណុចសង្ស័យណាមួយ សូមមេត្តាធ្វើការទំនាក់ទំនងមកអាជ្ញាធរមូលដ្ឋាន ជាបន្ទាន់ ឬបងប្អូន អាចទៅពិនិត្យសុខភាពតាមមណ្ឌលសុខភាពរបស់យើងដែលនៅជិតតាមរយៈការយកសំណាកពីច្រមុះនិងបំពង់ក យកទៅពិនិត្យ និងសូមកុំមានការរើសអើងរវាងគ្នានិងគ្នា និងក៍ត្រូវធ្វើការតាមដាន ពិនិត្យដោយយកចិត្តទុកដាក់ទៅលើពត៌មានផ្លូវការ ជាពិសេសព័ត៌មានរបស់ក្រសួងសុខាភិបាល និងប្រមុខរាជរដ្ឋាភិបាល ជៀសវាងកុំជឿលើពត៌មានមិនពិត មិនច្បាស់លាស់ ឬមាននិន្នាការនយោបាយផ្សេង ដែលបាននឹងកំពុងធ្វើឲ្យមានភាពចលាចល នាំមកនូវមហន្តរាយ វិបត្តិសតិអារម្មណ៍ រើសអើង ប៉ះពាល់ដល់ជីវភាព កិត្តិយសបុគ្គល និងខេត្តសៀមរាបទាំងមូល ៕
អត្ថបទ និង រូបភាព៖ យូ វង្ស
