បុរសជនជាតិខ្មែរ វ័យ ៣៨ឆ្នាំដំបូងគេ ដែលបានឆ្លងជំងឺកូវីដ១៩ ពីបុរសជនជាតិជប៉ុនម្នាក់ក្នុងខេត្តសៀមរាប បានជាសះស្បើយ និងត្រឡប់ទៅលំនៅដ្ឋានវិញហើយ នៅរសៀលថ្ងៃទី៣០ ខែមីនា ឆ្នាំ២០២០។
តាមការឲ្យដឹងពីលោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាល និងជាប្រធានក្រុមការងារចត្តឡីស័កខេត្តសៀមរាប បានឲ្យដឹងថា បុរសវ័យ៣៨ឆ្នាំរូបនេះ បានសម្រាកព្យាបាលនៅក្នុងមន្ទីរពេទ្យបង្អែកខេត្តសៀមរាប ចាប់ពីថ្ងៃទី៥ ដល់ទី៣០ ខែមីនា ឆ្នាំ២០២០ សរុបមានរយៈពេល ២៥ថ្ងៃ ទើបជាសះស្បើយ។ លោកប្រធានមន្ទីរ បញ្ជាក់ថា ការជាសះស្បើយនេះ មានល្បឿនយឺត ដោយសារបុរសរូបនេះ មានជំងឺថ្លើមប្រភេទបេ។
លោកប្រធានមន្ទីរ បញ្ជាក់ថា ទោះបីបុរសរូបនេះ បានទទួលស្គាល់ពីវិទ្យាស្ថានជាតិប៉ាស្ទ័រនិងក្រសួងសុខាភិបាល ថាបានជាសះស្បើយពីជំងឺកូវីដ១៩ និងអនុញ្ញាតឲ្យចេញពីមន្ទីរពេទ្យ ក៏ដោយ ក៏មន្ត្រីសុខាភិបាលខេត្ត នៅតែបន្តទំនាក់ទំនង និងស្នើដល់បុរសរូនេះ ត្រូវនៅដាច់ដោយឡែកពីសមាជិកគ្រួសារ ព្រមទាំងមនុស្សនៅក្នុងសហគមន៍ រយៈពេល 14ថ្ងៃបន្ថែមទៀត។
និយាយដោយក្ដីរំភើប បុរសវ័យ៣៨រូបនេះ មានសេចក្ដីត្រេកអរ ដែលសមាជិកគ្រួសារ មិត្តភក្តិ រួមនិងប្រជាពលរដ្ឋ ក្នុងខេត្តសៀមរាប មិនបានឆ្លងជំងឺកូវីត១៩ ពីរូបលោក។ រូបលោក និងនៅតែបន្តគោរពតាមការណែនាំ របស់មន្ត្រីជំនាញសុខាភិបាលខេត្ត ដោយបន្តនៅដាច់ដោយឡែកពីរហូតដល់១៤ ពេលត្រឡប់ទៅកាន់លំនៅដ្ឋានវិញ។
បុរសរូបនេះ បានថ្លែងអំណរគុណ ទៅដល់សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ទោះបីសម្ដេចទាំងពីរ មានកិច្ចមមាញឹកយ៉ាងណាក៏ដោយ ក៏សម្ដេចតែងឆ្លៀតសួរសុខទុក្ខលោក អំឡុងពេល លោកសម្រាកព្យាបាល នៅមន្ទីរពេទ្យបង្អែកខេត្តសៀមរាប។ ជាមួយនោះ លោកគាំទ្រដល់ការដឹកនាំ និងចំណាត់របស់សម្ដេចតេជោ ជុំវិញការទប់ស្កាត់ ការរីករាលដាល នៃជំងឺកូវីដ១៩នៅកម្ពុជា ក្នុងនោះក្រសួងសុខាភិបាល បានខិតខំយ៉ាងពេញទំហឹងក្នុងយុទ្ធនាការនេះ ទន្ទឹមឯកឧត្តមអភិបាលខេត្តសៀមរាប លោកប្រធានមន្ទីរសុខាភិបាល មន្ត្រីសុខាភិបាលខេត្ត រួមនិងអាជ្ញាធរមូលដ្ឋាន ក៏បានអនុវត្តន៍យ៉ាងយកចិត្តទុកដាក់ ទៅតាមបទបញ្ជារបស់ប្រមុខរាជរដ្ឋាភិបាល។
គួរជម្រាបថា បច្ចុប្បន្នក្នុងខេត្តសៀមរាប មានករណីឆ្លងជំងឺកូវីដ១៩ សរុបចំនួន ៥ករណី ក្នុងនោះជាសះស្បើយ ១ករណី និងបានពនិត្យករណីសង្ស័យថាមានឆ្លងជំងឺកូវីដ១៩ សរុប៤៩០ករណី គិតត្រឹមរសៀលថ្ងៃទី៣០ ខែមីនានេះ ជាមួយនោះដែរ មន្ទីរសុខាភិបាលខេត្តសៀមរាប នៅពុំទាន់រកឃើញ វិជ្ជមាននៃជំងឺកូវីដ១៩ លើអ្នកទាំងនោះនៅឡើយទេ។
អត្ថបទ និង រូបភាព៖ សេង ផល្លី និង ខេង ឧត្តម
