កាលពីថ្ងៃទី ៣០ ខែមីនា ឆ្នាំ២០២០ ប្រតិភូសាខាកាកបាទក្រហមកម្ពុជា ខេត្តសៀមរាប ដឹកនាំដោយ លោកជំទាវ ទាង អេង ទៀសីហា អនុប្រធានគណៈកម្មាធិការសាខា បានជួបសំណេះសំណាល និងសួរសុខទុក្ខក្រុមគ្រូពេទ្យ នៅតាមមណ្ឌលសុខភាពចំនួន ៤កន្លែង ក្នុងស្រុកក្រឡាញ់ និងស្រុកអង្គរជុំ នៃខេត្តសៀមរាប។
ក្នុងនាម ឯកឧត្តម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប លោកជំទាវ បាននាំយកនូវការផ្ដាំផ្ញើសួរសុខទុក្ខ ពីសម្ដេចកិត្តិយព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដល់លោកគ្រូ អ្នកគ្រូពេទ្យ ព្រមទាំងអ្នកជំងឺ ដែលកំពុងសម្រាកព្យាបាលនៅតាមមណ្ឌលសុខភាព ត្រូវមានការប្រុងប្រយ័ត្នខ្ពស់ការថែទាំសុខភាព ខណៈពិភពលោក ក៏ដូចប្រទេសកម្ពុជា នៅតែបន្តប្រឈមនឹងការឆ្លងរីករាលដាលនៃជំងឺកូវីដ១៩។
ក្នុងឱកាសនោះ លោកជំទាវអនុប្រធាន ក៏បាននាំយកនូវ អាល់កុល ដែលទទួលបានពីកាកបាទក្រហមកម្ពុជា រួមនិងម៉ាស់ របស់សាខាកាកបាទក្រហមកម្ពុជា ខេត្តសៀមរាប ប្រគល់ជូនមណ្ឌលសុខភាព ចន្លាស់ដៃ មណ្ឌលសុខភាព សែនសុខ ស្ថិតក្នុងស្រុកក្រឡាញ់ និងមណ្ឌលសុខភាព ចាឈូក មណ្ឌលសុខភាព តាសោម ស្ថិតក្នុង ស្រុកអង្គរជុំ ដែលកំពុងជួបការខ្វះខាតអាកុល និងម៉ាស។ ដោយមណ្ឌលសុខភាពនីមួយៗ ទទួលបានអាល់កុល ៥លីត្រ ម៉ាស់១០ ប្រអប់ស្មើនឹង៥០០ម៉ាស់។
ព័ត៌មានជាតិ ថ្មីៗ
នៅថ្ងៃដដែលនេះ សាខាកាកបាទក្រហមកម្ពុជា ខេត្តសៀមរាប ក៏បានផ្ដល់ជូន អនុសាខាកាកបាទក្រហមកម្ពុជា ស្រុកក្រឡាញ់ និងអនុសាខាកាកបាទក្រហមកម្ពុជា ស្រុកអង្គរជុំ ដោយអនុសាខានីមួយៗ ទទួលបាន អាល់កុល ៥លីត្រ សាប៊ូ ៥០ដុំ និងPoster អប់រំពីជំងឺ Covid-19 មួយចំនួនផងដែរ។
អត្ថបទ និង រូបភាព៖ គឿន វេត
កែសម្រួល៖ សេង ផល្លី
