នាថ្ងៃអង្គារនេះ កូរ៉េខាងត្បូងបានរាយការណ៍ពីករណីឆ្លង COVID-19 ចំនួន១២៥នាក់ថែមទៀត ធ្វើឲ្យតួលេខអ្នកឆ្លងសរុបបានកើនដល់៩,៧៨៦នាក់។ រីឯចំនួនអ្នកជំងឺដែលបានបាត់បង់ជីវិត ក៏កើនពី១៥៨នាក់ ដល់១៦២នាក់ផងដែរ។ នេះបើតាមការចេញផ្សាយដោយទីភ្នាក់ងារព័ត៌មាន ស៊ីនហួរ នៅថ្ងៃអង្គារ ទី៣១ ខែមីនា ឆ្នាំ២០២០។
ក្នុងចំណោមករណីថ្មីទាំងនោះ មាន១៥ករណីត្រូវបានរកឃើញនៅតាមអាកាសយានដ្ឋានរបស់ប្រទេសកូរ៉េខាងត្បូង។ ក្រៅពីការរកឃើញករណីឆ្លងថ្មីចំនួន១២៥នាក់ អ្នកជំងឺ COVID-19 ចំនួន០៤នាក់ទៀតនៅកូរ៉េខាងត្បូង ទើបតែបានស្លាប់។ ទន្ទឹមគ្នានេះដែរ អ្នកជំងឺសរុប១៨០នាក់បន្ថែមទៀតត្រូវបានអនុញ្ញាតឲ្យចាកចេញពីមន្ទីរពេទ្យក្រោយជាសះស្បើយ ដែលធ្វើឲ្យចំនួនអ្នកជាពីជំងឺ COVID-19 នៅកូរ៉េខាងត្បូង សរុបមានចំនួន៥,៤០៨នាក់។
គួរជម្រាបថា កូរ៉េខាងត្បូងបានចាប់ផ្តើមមានការផ្ទុះរាលដាលខ្លាំងនៃ COVID-19 នៅពេលចង្កោមក្រុមអ្នកឆ្លងដ៏ធំមួយ ត្រូវបានរកឃើញនៅក្នុងទីក្រុង Daegu ដែលមានប្រជាជនរស់នៅប្រមាណ២.៥លាននាក់។ ទីក្រុងនេះនិងខេត្ត North Gyeongsang ដែលនៅជាប់គ្នាទទួលបន្ទុករ៉ាប់រងជាង៨០ភាគរយនៃចំនួនករណីឆ្លងសរុបនៅទូទាំងប្រទេស។
