នាព្រឹកថ្ងៃទី៣១ ខែមីនា ឆ្នាំ២០២០ នៅវត្តពោធិរាម ហៅវត្តធិបតី ឃុំត្រីញ័រ ស្រុកពួក ក្រុមការងារកាកបាទក្រហមកម្ពុជា សាខាខេត្តសៀមរាប ដឹកនាំដោយ លោកជំទាវ ទាង អេង ទៀ សីហា អនុប្រធានគណៈកម្មាធិការសាខា បានចុះជួបសួរសុខទុក្ខប្រជាពលរដ្ឋ ២៣គ្រួសារ ដែលបានរងគ្រោះដោយខ្យល់កន្រ្ទាក់កាលពីពេលថ្មីៗនេះ។
នៅក្នុងឱកាសសំណេះសំណាល ចែកអំណោយនោះ លោកជំទាវ បាននាំយកនូវការផ្តាំផ្ញើសាកសួរសុខទុក្ខ របស់សម្តេចកិតិ្តព្រឺទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និង បានសម្តែងនូវការចូលរួមសោកស្តាយចំពោះការបាត់បង់ទ្រព្យសម្បត្តិ ដោយសារគ្រោះធម្មជាតិខ្យល់កន្រ្ទាក់នេះ ។ ការផ្តាំផ្ញើរបស់សម្តេចកិត្តិព្រឹទ្ធបណ្ឌិតប្រធាន បានផ្តល់នូវការលើកទឹកចិត្តដល់ជនរងគ្រោះ ឲ្យបន្តខិតខំជំនះការលំបាក ដើម្បីស្តារជីវភាពឡើងវិញ។ ក្នុងនោះ អាជ្ញាធរមូលដ្ឋាន និងបណ្តាញកាកបាទក្រហមកម្ពុជា នៅគ្រប់ទីកន្លែង នឹងរងចាំជួយអន្តរាគមន៍ សម្របសម្រួលដោះស្រាយ មិនទុកឲ្យបងប្អូនជនរងគ្រោះ ស្ថិតនៅក្នុងភាពឯកោ ដោយគ្មានដំណោះស្រាយនោះឡើយ។
អំណោយដែលត្រូវចែកជូននាពេលនោះ ក្នុងមួយគ្រួសារទទួលបាន អង្ករ ត្រីខ មី អាវយឺត កន្ទេល ឃីតមួយកញ្ចប់ ស័ង្កសី និងថវិកាមួយចំនួនផងដែរ។ អំណោយទាំងនោះ ត្រូវបានបន្ថែមចំនួន តាមទំហំនៃការខូចខាតរបស់ជនរងគ្រោះ។
ព័ត៌មានជាតិ ថ្មីៗ
គួរជម្រាបថា ឧបទ្ទេវហេតុខ្យល់កន្ទ្រាក់នោះ កើតឡើងនៅវេលាល្ងាចថ្ងៃទី២៨ ខែមីនា ឆ្នាំ២០២០ ដោយបង្កការរងគ្រោះនៅឃុំត្រីញ័រ រលំផ្ទះ២ខ្នង របើកដំបូល១៦ខ្នង ផ្ទះប្រជាពលរដ្ឋ៣ខ្នងទៀតរបើកដំបូលនៅឃុំល្វា ចំណែកឯនៅឃុំសសរស្តម្ភ រលំផ្ទះ១ខ្នង និងផ្ទះ១ខ្នងទៀត ត្រូវទទួលរងដោយអគ្គីភ័យ ដោយសារតែទុសេខ្សែភ្លើង ក្នុងពេលដែលមានឧបទ្ទវហេតុខ្សល់កន្ទ្រាក់នោះ។
ឆ្លៀងឱកាសក្នុងពិធីចែកអំណោយនោះ លោកជំទាវអនុប្រធាន ក៏មានការផ្សព្វផ្សាយអំពីវិធានការបង្ការ និងទប់ស្កាត់ការរីករាលដាលនៃវីរុសកូវីត១៩ ផងដែរ។ ជាពិសេសនោះក្រៅតែពីការអប់រំធ្វើអនាម័យជាប្រចាំ ការជួបជុំមិនចាំបាច់ត្រូវបានហាមឃាត់ ហើយក្នុងករណីសង្ស័យ ត្រូវទៅពិគ្រោះ ពិនិត្យសុខភាពនៅមណ្ឌលសុខភាពដែលនៅជិតបំផុត ជាមួយ ក្នុងករណីសង្ស័យថា បុគ្គលខ្លួនឯងមានបញ្ហាសុខភាពពាក់ព័ន្ធនឹងជំងឺកូវីដ១៩នេះ ត្រូវយល់ដឺងអំពីការដាក់ខ្លួនឲ្យនៅដោយឡែកចំនួន១៤ថ្ងៃ ជៀសវាងការចម្លងក្នុងគ្រួសារ និងរីករាលដាលក្នុងសហគមន៍៕
អត្ថបទ និង រូបភាព៖ ងិន គឹមឡេង
កែសម្រួល៖ សេង ផល្លី
