កាលពីថ្ងៃទី៣០ ខែមីនា ឆ្នាំ២០២០ អាជ្ញាធរស្រុកក្រឡាញ់ ដឹកនាំដោយ លោកស្រី ម៉ននី រង្សី អភិបាលស្រុក បានចុះបាញ់ថ្នាំសម្លាប់មេរោគ នៅតាមទីប្រជុំជនសំខាន់ ក្នុងស្រុកក្រឡាញ់ ខេត្តសៀមរាប ដើម្បីលើកកម្ពស់សុខុមាលភាព និងចូលរួមបង្ការការឆ្លងជំងឺផ្សេងៗ ដល់ប្រជាពលរដ្ឋនៅទូទាំងស្រុក។
លោក សុខ ណារ៉េត អភិបាលរងស្រុក បានឲ្យដឹងថា នេះជាការបាញ់ថ្នាំលើកទី១ ជាការផ្ដល់ដោយក្រសួងសុខាភិបាល និងបច្ចេកទេសពី ការិយាល័យសុខាភិបាលស្រុកប្រតិបត្តិ ការបាញ់ថ្នាំសម្លាប់មេរោគនេះ នឹងនៅអនុវត្តបន្តទៀត នៅពេលខាងមុខ បន្ទាប់ពីរដ្ឋបាលស្រុកពិនិត្យឃើញថា បានអនុវត្តន៍គ្រប់គោលដៅដែលបានកំណត់ទុក។
លោកអភិបាលរងស្រុក បញ្ជាក់បន្ថែមថា មុនការបាញ់ថ្នាំសម្លាប់មេរោគនេះ រដ្ឋបាលស្រុក បានចុះផ្សព្វផ្សាយ សារអំប់រំជាសំឡេង ខិតបណ្ណនានា ជុំវិញការបង្ការពីជំងឺកូវីដ១៩ នៅតាមមូលដ្ឋានភូមិឃុំ។ ជាពិសេស អាជ្ញាធរភូមិឃុំ បានចុះស្រង់ស្ថិតិប្រជាពលរដ្ឋ ដែលបានត្រឡប់ពីក្រៅប្រទេស ចូលមកស្នាក់នៅក្នុងស្រុកក្រឡាញ់ ព្រមទាំងបានណែនាំដល់ពួកគេអនុវត្តន៍ ការរដាក់ខ្លួនឲ្យនៅដោយឡែកចំនួន១៤ថ្ងៃ ជៀសវាងការចម្លងជំងឺដល់សមាជិកគ្រួសារ និង សហគមន៍៕
ព័ត៌មានជាតិ ថ្មីៗ
អត្ថបទ និង រូបភាព៖ រដ្ឋបាលស្រុកក្រឡាញ់
កែសម្រួល៖ សេង ផល្លី
