តាមរយៈគេហទំព័រ Worldometer គិតត្រឹមម៉ោង ៨ : ៣០នាទីព្រឹកថ្ងៃសុក្រ ទី០៣ ខែមេសា ឆ្នាំ២០២០ នេះតែម្តង ចំនួនករណីឆ្លងវីរុសកូរ៉ូណា (COVID-19) នៅទូទាំងប្រទេសអាល្លឺម៉ង់ បានកើនឡើងដល់ ៨៤,៧៩៤នាក់ ក្នុងនោះស្លាប់ ១,១០៧នាក់ និងជាសះស្បើយសរុប ២២,៤៤០នាក់។
ចំនួនខាងលើនេះបានធ្វើឲ្យអាល្លឺម៉ង់ឡើងពីលើចិនវិញ ក្លាយជាប្រទេសទី ៤ ដែលមានករណីឆ្លង COVID-19 ច្រើនជាងគេក្នុងពិភពលោក ខណៈចិនមានអ្នកឆ្លងជំងឺរាតត្បាតសកលនេះសរុប ៨១,៥៨៩ករណី ក្នុងនោះស្លាប់ ៣,៣១៨នាក់ និងជាសះស្បើយរហូតដល់ ៧៦,៤០៨នាក់ឯណោះ។
ប្រជាជននៅលើពិភពលោកបានដឹងច្បាស់ថា អាមេរិក បារាំង អ៉ីតាលី អេស្ប៉ាញ អាល្លឺម៉ង់ អង់គ្លេស សុទ្ធសឹងតែជាកំពូលប្រទេសរឹងមាំ ផ្នែកសេដ្ឋកិច្ច និងសុខាភិបាលខ្លាំងពូកែ សុទ្ធតែឈរនៅលើលំដាប់កំពូលៗ នៃតារាងបញ្ជីឈ្មោះប្រទេសអ្នកឆ្លងជំងឺ Covid-19 និងមានអ្នកស្លាប់ច្រើនជាងគេ នៅលើពិភពលោកទៅវិញ។
ត្រង់ចំណុចនេះអាចបង្ហាញយ៉ាងច្បាស់ហើយថា ប្រទេសមហាអំណាចសេដ្ឋកិច្ចធំៗលើលោក ដែលមានវិស័យសុខាភិបាលខ្លាំងក្លា មិនប្រាកដថាមានអ្នកឆ្លង និងអ្នកស្លាប់ដោយសារជំងឺកូវិដ១៩នេះចំនួនតិចទេ ហើយក៏មិនប្រាកដថា ប្រទេសក្រសេដ្ឋកិច្ចមិនសូវរឹងមាំ មានឆ្លង និងស្លាប់ច្រើននោះដែរ ការដែលសំខាន់នោះគឺភាពជាអ្នកដឹកនាំនៃមេដឹកនាំប្រទេសនិមួយៗនោះទៅវិញទេ ដែលជាចំណុចគួរចាប់អារម្មណ៍។
