ដើម្បីចូលរួមប្រយុទ្ធប្រឆាំងនឹងជំងឺកូវីដ១៩ នៅកម្ពុជា ជាមួយរាជរដ្ឋាភិបាល ឯកឧត្តម ទៀ សីហា អភិបាលខេត្តសៀមរាប បានបរិច្ចាគប្រាក់បៀវត្សប្រចាំខែទាំងអស់ សម្រាប់រយៈពេល៧ខែ ជូនគណៈកម្មការជាតិប្រយុទ្ធប្រឆាំងនឹងជំងឺកូវីដ១៩ នេះបើយោងតាមលិខិតមួយច្បាប់ របស់ឯកឧត្តម នៅថ្ងៃទី០៣ ខែមេសា ឆ្នាំ២០២០។
ក្នុងលិខិតនោះ ឯកឧត្តមអភិបាលខេត្ត បានបញ្ជាក់ថា ប្រាក់បៀវត្សប្រចាំខែរបស់ឯកឧត្តម ដែលបានកាត់ពន្ធរួចរាល់ រយៈពេល៧ខែ គឺចាប់ពីខែមេសា ដល់ខែតុលា ឆ្នាំ២០២០ នឹងត្រូវបរិច្ចាគជូនគណៈកម្មការជាតិប្រយុទ្ធប្រឆាំងនឹងជំងឺកូវីដ១៩ ទាំងអស់(១០០ភាគរយ) តាមរយៈឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាអនុប្រធានអចិន្ត្រៃយ៍ គណៈកម្មការជាតិប្រយុទ្ធប្រឆាំងនឹងជំងឺកូវីដ១៩។
ក្នុងថ្ងៃដដែលនេះដែរ អភិបាលរងខេត្តសៀមរាបទាំង៦រូប រួមនិងមន្ត្រីសាលាខេត្តសៀមរាប ក៏បានស្ម័គ្រចិត្តបរិច្ចាគប្រាក់បៀវត្សផ្ទាល់ខ្លួន រយៈពេល៧ខែ ជូនដល់គណៈកម្មការជាតិប្រយុទ្ធប្រឆាំងនឹងជំងឺកូវីដ១៩ ផងដែរ។
ព័ត៌មានជាតិ ថ្មីៗ
គួរជម្រាបថា កាលពីថ្ងៃទី០១ ខែមេសា ឆ្នាំ២០២០ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា បានស្ម័គ្រចិត្តបរិច្ចាគប្រាក់បៀវត្សរបស់សម្ដេច១០០ភាគរយ រយៈពេល៧ខែ ចាប់ពីខែមីនា ដល់ខែកញ្ញា ឆ្នាំ២០២០ ជូនគណៈកម្មការជាតិប្រយុទ្ធប្រឆាំងនឹងជំងឺកូវីដ១៩ ដើម្បីសម្ដែងពីសមានចិត្ត ក្នុងការចូលរួមប្រយុទ្ធប្រឆាំងនឹងជំងឺកូវីដ១៩ នៅកម្ពុជា។
អត្ថបទ៖ សេង ផល្លី
