នៅថ្ងៃទី០៤ ខែមេសា ឆ្នាំ២០២០នេះ ឯកឧត្តម ខៀវ ឆេន នាយកខុទ្ទកាល័យ សម្តេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រី ក្រសួងការពារជាតិ និងជាប្រធានក្រុមការងារថ្នាក់ជាតិ ចុះជួយខេត្តសៀមរាប បានចុះជួបសំណេះសំណាល ជាមួយសមាជិកសមាជិកាក្រុមប្រឹក្សាឃុំ និងប្រធានគ្រប់ភូមិ និងប្រជាពលរដ្ឋ ស្ថិតក្នុងឃុំពាក់ស្នែង ស្រុកអង្គរធំ ខេត្ដសៀមរាប ដើម្បីចូលរួមផ្សព្វផ្សាយបន្ថែមទៀត ក្នុងការបង្ការ និងប្រយុទ្ឋប្រឆាំង ការរីករាលដាលជំងឺកូវីដ១៩ ទៅដល់អាជ្ញាធរ និងប្រជាពលរដ្ឋជនបទ។
ឯកឧត្តម ខៀវ ឆេន លើកឡើងថា ដើម្បីការពារ ការឆ្លងជំងឺកូវីដ១៩ ពីមនុស្សម្នាក់ទៅមនុស្សម្នាក់ ឬច្រើននាក់ យើងត្រូវចៀសវាងការជួបជុំផ្សេងៗ កន្លែងមានមនុស្សច្រើនកុះករ ពាក់ម៉ាស ឬខ្ទប់ផ្ទៃមុខនឹងក្រមាឲ្យបានត្រឹមត្រូវ ជាពិសេសត្រូវធ្វើអនាម័យដៃ នឹងអាកុល ឬសាប៊ូ ឲ្យបានញឹកញាប់។ លើសពីនោះ អាជ្ញាធរភូមិ-ឃុំ រួមនិងប្រជាពលរដ្ឋ ត្រូវគោរពតាមការណែនាំ ក៏ដូចជាបទបញ្ជារបស់រាជរដ្ឋាភិបាល ក្រសួងសុខាភិបាល អំពីការបង្ការ ទប់ស្កាត់ជំងឺកូវីដ១៩នេះ។
ឯកឧត្តម ក៏បានបញ្ជាក់ផងដែរថា ដើម្បីការសុវត្ថិភាព គ្រួសារ និងសហគមន៍ គ្រួសារដែលមានសមាជិកមកពីក្រៅប្រទេស ឬសង្ស័យថា ខ្លួនឯងមានឆ្លងជំងឺកូវីដ១៩ គួរទៅជួបជាមួយគ្រូពេទ្យនៅក្បែរពួកគេបំផុត និងគួរដាក់ខ្លួនឯងឲ្យនៅដាច់ដោយឡែក រយៈពេល១៤ថ្ងៃ តាមការណែនាំរបស់ក្រសួងសុខាភិបាល។
ព័ត៌មានជាតិ ថ្មីៗ
ក្នុងឱកាសជួបសំណេះសំណាលនោះដែរ ក្រុមការងារ ក៏បាន នាំយកអំណោយ រួមមាន ក្រមាចំនួន500 សាប៊ូដុំ ៥កេស សាប៊ូខ្មៅ ៣កេស អាល់កុល ១០០លីត្រ អង្ករ២០បាវ ទឹកស៊ីអ៊ីវ៥កេះ ខិតបណ្ណអប់រំពីការបង្ការ ការឆ្លងជំងឺកូវីដ១៩ ចំនួន១០០សន្លឹក រួមនិងថវិកាមួយចំនួន ជូនទៅដល់មេឃុំ ដើម្បីធ្វើការចែកជូន និង បិទផ្សាយ ដល់ពលរដ្ឋផងដែរ៕
អត្ថបទ និងរូបភាព៖ បូ សាវី
សម្រួលអត្ថបទ៖ សេង ផល្លី
