នៅក្នុងឱកាសនៃកិច្ចប្រជុំ សាមញ្ញប្រចាំសប្តាហ៍ថ្នាក់ដឹកនាំ ក្រសួងព័ត៌មាន នាដើម ខែមេសា ឆ្នាំ២០២០ ឯកឧត្តម ខៀវ កាញារីទ្ធ រដ្ឋមន្រ្តី ក្រសួង ព័ត៌មាន បានគាំទ្រឲ្យ ប្រព័ន្ធ ផ្សព្វផ្សាយ របស់រដ្ឋ ផ្សាយរំលឹកពី កម្មវិធី មួយចំនួនពាក់ព័ន្ធពិធីបុណ្យ ចូលឆ្នាំប្រពៃណីជាតិ ខ្មែរ តែកុំឲ្យខុសពីបទបញ្ជា របស់ប្រមុខរាជរដ្ឋាភិបាល ក្នុងការរួមគ្នា បង្ការ និងទប់ស្កាត់ នៃជំងឺ កូវីដ ១៩ ដោយមិនឲ្យមានការជួបជុំគ្នារាំលេងកំសាន្តសប្បាយ កម្មវិធីកំសាន្តនានា ដែលមានមនុស្សច្រើននោះទេ ហើយបង្វែរមក ជួបជុំជាគ្រួសារសែន ចូលឆ្នាំ នៅ ក្នុងផ្ទះ នីមួយៗ ទាំងអស់គ្នា ដើម្បីជៀសវាងការឆ្លងនូវជំងឺ កូវីដ១៩ ។
ឯកឧត្តម រដ្ឋមន្រ្តី ខៀវ កាញារីទ្ធ មានប្រសាសន៏លើកឡើងថា ការដែលថ្នាក់ដឹកនាំ ក្រសួង ព័ត៌មាន នៅតែជួបប្រជុំគ្នាប្រជុំប្រចាំសប្តាហ៍នេះ គឺ ដោយសារ មានករណីចាំបាច់នានា ជាច្រើនពាក់ព័ន្ធ ដែលត្រូវតែធ្វើរួមគ្នា ដោះស្រាយ តាមរយៈការ សម្របសម្រួល សហការគ្នា ដើម្បី ប្រសិទ្ធភាពការងារ ថ្មីៗបន្ថែមទៀត ជាពិសេសការផ្សាយប្រទាក់ក្រឡាគ្នា ក្នុងការឆ្លើយ តប នឹង ព័ត៌មាន ក្លែងក្លាយ ព្រោះថាក្នុងរយៈពេលចុង ក្រោយនេះមានសភាពការណ៍តឹងតែង ទាក់ទង បញ្ហាជំងឺកូវីដ១៩ ដែលមានក្រុម និងបុគ្គលមួយចំនួនបានផ្សាយ នូវព័ត៌មាន មិនពិត ធ្វើឲ្យប្រជាពលរដ្ឋ មានការ យល់ច្រឡំ ។ ដូច្នេះ ប្រព័ន្ធផ្សព្វផ្សាយរបស់រដ្ឋ មានតូនាទី យ៉ាងសំខាន់ ក្នុងការផ្សាយ ដំណឹងនិងព័ត៌មាន ពិតប្រាកដ ក្នុងនោះទាក់ទងជំងឺកូវីដ១៩ មានតែ ក្រសួងសុខាភិបាល តែប៉ុណ្ណោះ ដែលជាអ្នកចេញសេចក្តីប្រកាសព័ត៌មាន យកជាផ្លូវការបាន។ តាមការបញ្ចាក់របស់ ក្រសួង សុខាភិបាល បានឲ្យដឹងថា ក្នុងរយៈពេល ៣ ថ្ងៃមកនេះ មិនមានអ្នកឆ្លងជំងឺ កូវីដ១៩ ហើយការព្យាបាលជាសះស្បើយ ក៏មានចំនួនច្រើនផងដែរ។ តែទោះជាណា ឯកឧត្តមរដ្ឋមន្រ្តី ក៏បានជំរុញដល់ប្រព័ន្ធផ្សព្វផ្សាយ ទាំងអស់បន្ត ចូលរួមផ្សាយពីវិធានការ ការពារ និងទប់ស្កាត់នូវការឆ្លងរីករាលដាល នៃជំងឺកូវីដ ១៩ នេះ បានកាន់តែទូលំទូលាយ ជាពិសេសផ្សាយពីទឹកចិត្តដ៏ល្អរបស់ បងប្អូនប្រជាពលរដ្ឋ សប្បុរសជន រួមទាំងថ្នាក់ដឹកនាំ ដែលបានបរិច្ចាកនូវធនធានផ្ទាល់ខ្លួន ក្នុងការរួមគ្នាប្រយុទ្ធនឹងជំងឺកូវីដ ១៩ ខ្មែរ ជួយខ្មែរ ទោះតិចក្តៅ ច្រើនក្តី ដើម្បីខ្មែរទាំងអស់គ្នា។
នៅក្នុងឱកាសនៃកិច្ចប្រជុំសាមញ្ញប្រចាំសប្តាហ៍របស់ថ្នាក់ដឹកនាំ ក្រសួង ព័ត៌មាន នាព្រឹកថ្ងៃទី៦ ខែមេសា ឆ្នាំ២០២០ នេះដែរ ឯកឧត្តម លោកជំទាវ ជា អគ្គនាយក ទាំង ៥ ឯកឧត្តម លោកជំទាវ ជា រដ្ឋលេខាធិការ អនុរដ្ឋលេខាធិការ ដែល ទទួលបន្ទុកតាម ផ្នែក និងជំនាញ នីមួយៗ បានជម្រាបជូនពីវឌ្ឍនភាពការងារ សំខាន់ ៗ ដែលតាមផ្នែក តាមជំនាញ នីមួយៗ សម្រេច អនុវត្តន៏ បានក្នុងរយៈពេលពេញ មួយសប្តាហ៍ កន្លងមកនេះ និងលើកជាទិសដៅ ផែនការ សម្មភាពការងារ ដែលត្រូវបន្តបំពេញ នៅសប្តាហ៍ខាងមុខទៀត ឲ្យបានកាន់ តែមានប្រសិទ្ធិភាព និងប្រសិទ្ធិផល ល្អប្រសើរបន្ថែមទៀត។
ឆ្លៀតក្នុងឱកាសនោះ ឯកឧត្តម ខៀវ កាញារីទ្ធ បានឲ្យថ្នាក់ដឹកនាំ នៃអគ្គនាយកដ្ឋាន វិទ្យុ ទូរទស្សន៍ជាតិកម្ពុជា និងទីភ្នាក់ងារសារព័ត៌មានកម្ពុជា AKPត្រូវលើកជាគម្រោងកម្មវិធី នានា ដែលត្រូវផ្សាយនៅក្នុងឱកាសបុណ្យចូលឆ្នាំប្រពៃណីជាតិខ្មែរ ខាងមុខនេះ ដើម្បី ឯកឧត្តម រដ្ឋមន្រ្តី យកទៅគោរពរាយការណ៍ ជូនប្រមុខថ្នាក់ដឹកនាំ សម្តេចតេជោ ហ៊ុន សែន បាន ជ្រាប ជាមុន ហើយបើមានចំណុចខ្វះចន្លោះ ឬ លើសអ្វីដែលជា វិធានការ និងបទបញ្ជា នៃការ ប្រយុទ្ធ ប្រឆាំងនិងជំងឺ កូវីដ ១៩ គឺត្រូវកែសម្រួល មុននិងឈានទៅធ្វើការផ្សាយ។
នៅក្នុងឱកាសនៃកិច្ចប្រជុំនោះដែរ ឯកឧត្តម រដ្ឋមន្រ្តី ខៀវ កាញារីទ្ធ បានលើកឡើងនូវ ចំណុចសំខាន់មួយទៀតគឺ រៀបចំកម្មវិធីបង្រៀនពីចម្ងាយ E-Learning តាមរយៈកិច្ចសហការ ជាមួយ ក្រសួង អប់រំយុវជន និងកីឡា ហើយធ្វើការផ្សាយតាម ប៉ុស្តី TVK2 App ក្រសួង ព័ត៌មាន និងផ្សាយបន្ត ផ្ទាល់ទៅកាន់ទូរទស្សន៍ Satellite តេជោ DTV ប៉ុស្តីលេខ ២២ ។
ឯកឧត្តម រដ្ឋមន្រ្តី ខៀវ កាញារីទ្ធ បានបញ្ជាក់ថា នៅក្នុងដំណាក់កាលដែល មានការបិទសាលារៀននៅទូទាំងប្រទេស ដោយសារការព្រួយបារម្ភ ពីការឆ្លងនៃមេរោគ កូវីដ១៩ ហើយសិស្សានុសិស្ស មិនបានមករៀននៅសាលានោះ ក្រសួង ព័ត៌មាន សហការជាមួយ ក្រសួង អប់រំ យុវជន និងកីឡា បានរៀបចំជាកម្មវិធី បង្រៀនពីចម្ងាយ ដោយ ហើយគ្រោង ចាក់ផ្សាយនៅប៉ុស្តីទូរទស្សន៍ថ្មី TVK 2 ដែលផ្តល់ភាពងាយស្រួល ឲ្យសិស្សានុសិស្ស អាចបើកមើលបានពីការបង្រៀនពីថ្នាក់ទី ១ ដល់ទី ១២ ។ ឯកឧត្តម រដ្ឋមន្រ្តី បានបញ្ចាក់ដែរថា ប៉ុស្តីទូរទស្សន៍ថ្មី TVK 2 នេះ គឺគ្រោងបង្កើតឡើងមិនមែនគ្រាន់តែផ្សាយពីការបង្រៀនដល់ សិស្ស ក្នុងពេលសាលាបិទនោះទេ នៅពេលសាលាទាំងអស់បើកដំណើរការបង្រៀនវិញ ក៏ប៉ុស្តិនេះ នៅដំណើរផ្សាយដដែល ក្នុងនោះ មានជាកម្មវិធីយល់ដឹងផ្នែកច្បាប់ និងចំណេះ ទូទៅជាច្រើនទៀត ផងដែរ។ ដូច្នេះចាប់ពីពេលនេះទៅ ថ្នាក់ដឹកនាំ និងមន្រ្តី ទាំងអស់ នៃក្រសួងព័ត៌មាន ត្រូវតែត្រៀមលក្ខណៈឲ្យទាំងអស់គ្នា តាមរយៈការបង្កើនចំណេះដឹង និងជំនាញ បច្ចេកទេស ព្រោះថា មានកិច្ច ការងារជាច្រើនទៀត ដែលត្រូវរួមគ្នាធ្វើ និង ដកស្រង់ បទពិសោធនានា ដើម្បីត្រៀមឈានទៅ ធ្វើការផ្លាស់ប្តូរ ប្រព័ន្ធផ្សព្វផ្សាយ ពី អានណាឡូក ទៅជា ឌីជីថល នាឆ្នាំ ២០២៣ ខាងមុខនេះ ៕
អត្ថបទ និងរូបភាព៖ ក្រសួងព័ត៌មាន