នៅរសៀលថ្ងៃទី៦ ខែមេសា ឆ្នាំ២០២០នេះ លោក ណុប សារ៉ាក់ អធិការនគរបាលក្រុងសៀមរាប បាននាំយកអង្ករ និងគ្រឿងឧបភោគបរិភោគមួយចំនួន ចែកជូនដល់ប្រជាពលរដ្ឋខ្វះខាតជាង១០០គ្រួសារ ស្ថិតក្នុងសង្កាត់គោកចក និងសង្កាត់នគរធំក្រុងសៀមរាប។
លោកអធិការនគរបាលក្រុង បានឲ្យដឹងថា ដោយសារការរីករាលដាលនៃជំងឺកូវីដ១៩ នៅលើពិភពលោក ក៏ដូចនៅកម្ពុជា រាជរដ្ឋាភិបាល បានសម្រេចចាត់វិធានការមួយចំនួន ដើម្បីទប់ស្កាត់ការឆ្លងជំងឺនេះ ដល់ប្រជាពលរដ្ឋកម្ពុជានៅទូទាំងប្រទេស។ អំឡុងពេល ជួបវិបត្តិបណ្ដាលពីជំងឺកូវិដ១៩នេះ ប្រជាពលរដ្ឋមួយចំនួន ដែលមានជីវភាពខ្វះខាត កំពុងតែជួបការលំបាកក្នុងការរស់នៅ ដោយសារទីផ្សារ ក្រុមហ៊ុន ការដ្ឋានជាដើម បានផ្អាកដំណើរការ។
លោកអធិការនគរបាលក្រុង បញ្ជាក់ថា នៅពេលមានអាសន្នក្នុងនាមជា ជនជាតិខ្មែរដូចគ្នា យើងត្រូវចេះជួយចែករំលែក ទោះបីតិចក្ដីច្រើនក្ដី វាបានបង្ហាញពីទឹកចិត្តជាជនរួមជាតិ និងរក្សាសាមគ្គីភាពជាធ្លុងមួយ។ ក្នុងនោះដែរ លោកក៏បាន សំណូមពរដល់ ប្រជាពលរដ្ឋទាំងអស់ ចូលរួមថែរក្សាអនាម័យ ដោយលាងដៃនឹងទឹកសាប៊ូ ឬទឹកអាកុលតាមការណែនាំរបស់ក្រសួងសុខាភិបាល ដើម្បីប្រយុទ្ធប្រឆាំងនិងជំងឺឆ្លងខូវីដ១៩។
សូមជម្រាបថា ជំនួយសប្បុរសធម៌ ដែលបានចែកជូននាពេលនោះ ក្នុងមួយគ្រួសារទទួលបាន អង្ករ១០គីឡូក្រាម រួមនិងគ្រឿងឧបភោគបរិភោគមួយចំនួនផងដែរ។
អត្ថបទ និងរូបភាព៖ បូ សាវី
សម្រួលអត្ថបទ៖ សេង ផល្លី
