នៅរសៀលថ្ងៃទី០៣ ខែមេសា ឆ្នាំ២០២០ រដ្ឋបាលខេត្តសៀមរាប បានបើកកិច្ចប្រជុំក្រុមការងារទទួល និងដឹកជញ្ជូនបងប្អូនប្រជាពលរដ្ឋខ្មែរ ដែលត្រឡប់ពីប្រទេសថៃ ដើម្បីពិនិត្យ និងតាមដានពីសកម្មភាព នៃការវិលត្រឡប់របស់ ប្រជាពលរដ្ឋខ្មែរ។
ក្នុងនាមឯកឧត្តម ទៀ សីហា អភិបាលខេត្តសៀមរាប លោក នាក់ ណេរ៉ុន អភិបាលរងខេត្ត បានលើកឡើង ពី សេចក្ដីណែនាំរបស់រាជរដ្ឋាភិបាល ក៏ដូចជាក្រសួងមហាផ្ទៃ នៃព្រះរាជាណាចក្រកម្ពុជា ស្ដីពីវិធានការគ្រប់គ្រង ប្រជាពលរដ្ឋខ្មែរ ដែលវិលត្រឡប់ពីប្រទេសថៃ ចូលមកប្រទេសកម្ពុជាវិញ ប្រកបដោយសណ្ដាប់ធ្នាប់ និងសុវត្ថិភាពល្អប្រសើរ។ ក្នុងនោះ រដ្ឋបាលខេត្តសៀមរាប បានដាក់ចេញនូវវិធានការមួយចំនួន ដល់បណ្ដាថ្នាក់ដឹកនាំ មន្ទីរអង្គភាពអាជ្ញាធរ ក្រុង-ស្រុកទាំង១២ ត្រូវចូលរួមសហការ ជាមួយរដ្ឋបាលខេត្តរបស់កម្ពុជា ដែលនៅជាប់ព្រំដែនរបស់ប្រទេសថៃ ដើម្បីដោះស្រាយ លើការដឹកជញ្ជូនប្រជាពលរដ្ឋខ្មែរ ដែលទើបត្រឡប់មកពីប្រទេសថៃ មកកាន់លំនៅឋានក្នុងខេត្តសៀមរាប ក្រោមដែនសមត្ថកិច្ចរបស់រដ្ឋបាលស្រុកនីមួយៗ។
លោកអភិបាលរងខេត្ត បានសង្កត់ធ្ងន់ថា ចំពោះអាជ្ញាធរភូមិ ឃុំ-សង្កាត់ ត្រូវសហការជាមួយសមត្ថកិច្ចពាក់ព័ន្ធ ចុះត្រួតពិនិត្យជាប្រចាំ តាមផ្ទះរបស់ប្រជាពលរដ្ឋ ដែលមានសមាជិក ទើបវិលត្រឡប់មកពីបរទេស ត្រូវអនុវត្តន៍វិធានការណ៍ ដាក់ខ្លួនឲ្យនៅដាច់ដោយឡែករយៈពេល១៤ថ្ងៃ ស្របតាមនីតិវិធី ដែលកំណត់ដោយក្រសួងសុខាភិបាល ព្រទាំងធ្វើការណែនាំដល់ក្រុមគ្រួសារ អំពីវិធីការការពារឆ្លងជំងឺកូវីដ។ ក្នុងនោះដែរ អាជ្ញាធរថ្នាក់ក្រុង-ស្រុក រហូតដល់ថ្នាក់ភូមិ ត្រូវមានកិច្ចសហការគ្នា បង្កើនសកម្មភាពបិទផ្សាយផ្ទាំងរូបភាព និងចាក់ផ្សាយជាសំឡេងអប់រំរបស់គណៈកម្មការជាតិប្រយុទ្ធប្រឆាំងនឹងជំងឺកូវីដ១៩ នៅមូលដ្ឋានរៀងៗខ្លួន ពិសេសតំបន់ ដែលមានប្រជាពលរដ្ឋច្រើន ទើបវិលត្រឡប់មកពីបរទេស ៕
ព័ត៌មានជាតិ ថ្មីៗ
ទន្ទឹមនោះ លោកអភិបាលរងខេត្ត ក៏បានណែនាំ រដ្ឋបាលក្រុង-ស្រុក ត្រូវចិត្តទុកដាក់ អំពីសុវត្ថិភាព សុខភាព និងទ្រព្យសម្បត្តិ របស់ប្រជាពលរដ្ឋ ទើបវិលត្រឡប់មកពីបរទេស ព្រមទាំងរក្សាឲ្យបាននូវសណ្ដាប់ធ្នាប់ និងរបៀបរាបរយសាធារណៈ។ ជាពិសេស រដ្ឋបាលក្រុង-ស្រុក គួរ ជួយឧបត្ថម្ភនូវ ម្ហូបអាហារ ទឺកស្អាត សម្ភារៈ និងថ្នាំពេទ្យ ដល់ប្រជាពលរដ្ឋ ដែលបានដាក់ខ្លួននៅដាច់ដោយឡែក និងមានជីវភាពខ្វះខាត។
អត្ថបទ និងរូបភាព៖ អ៊ុន ណារាជ្យ
សម្រួលអត្ថបទ៖ សេង ផល្លី
