គម្រោងបន្ទាយស្រីស្អាតឆ្នាំ២០២០ នឹងត្រូវអនុវត្តន៍ នៅក្នុងខែមេសានេះ បន្ទាប់ពី ក្រសួងបរិស្ថាន បានផ្តល់រថយន្តដឹកសំរាមខ្នាតតូចចំនួន៦គ្រឿង ដល់អាជ្ញាធរស្រុកបន្ទាយស្រី នេះបើតាមការឲ្យដឹងពីលោក ឃឹម ហ្វីណង់ អភិបាលស្រុកបន្ទាយស្រី នៅព្រឹកថ្ងៃទី០៣ ខែមេសា ឆ្នាំ២០២០។
ដោយសារ បញ្ហាជំងឺឆ្លងកូវីដ១៩ លោកអភិបាលស្រុក លើកឡើងថា គម្រោងនេះ ត្រូវបានពន្យារពេលជាបណ្ដោះអាសន្នសិន រហូតដល់ស្ថានភាព នៃការរីករាលជំងឺនេះមានភាពធូរស្រាលឡើងវិញ។
លោកបានបន្តថា ក្នុងនាមជាស្រុកសំបូរដោយតំបន់ទេសចរណ៍ របស់ខេត្តសៀមរាប ពិតជាមានការចាំបាច់ណាស់ ត្រូវមានយន្តការមួយជាក់លាក់ក្នុងការគ្រប់គ្រងសំរាម ដែលរហូតមកដល់បច្ចុប្បន្ននេះ សំរាមនៅក្នុងស្រុកបន្ទាយស្រី នៅតែមានការរាយប៉ាយនៅតាមទីសាធារណៈនៅឡើយ។
ព័ត៌មានជាតិ ថ្មីៗ
តាមការរៀបចំរបស់រដ្ឋបាលស្រុក រថយន្តដឹកសំរាមខ្នាតតូចទាំង៦នេះ នឹងចេញទៅដឹកសំរាមនៅតាមបណ្តាឃុំទាំង៦ក្នុងស្រុកបន្ទាយស្រី មកដាក់កន្លែងរួមមួយ ដើម្បីរថយន្តធំដឹកបន្ត ទៅកាន់ឡដុតសំរាមតែម្តង។
លោកអភិបាលស្រុក បញ្ជាក់ថា ជំហានដំបូង អាជ្ញាធរ មិនយកថ្លៃសេវាពីការដឹកសំរាមនេះឡើយ។ នៅពេលអាជ្ញាធរស្រុក អាចគ្រប់គ្រងសំរាមបានល្អហើយនោះ អាជ្ញាធរនិងចាប់ផ្តើមរឹតបន្តឹងការបោះចោលសំរាមពាសវាលពាសកាលឱ្យបានកាន់តែខ្លាំងបន្ថែមទៀត ក្នុងគោលដៅធ្វើឲ្យស្រុកបន្ទាយស្រីគ្មានសំរាមប្លាស្ទិច ។ ជាមួយនោះដែរ ដើម្បីឱ្យយុទ្ធនាការនេះ ដំណើរការទៅដោយជោគជ័យ អាជ្ញាធរចាំបាច់ធ្វើការណែនាំអប់រំដល់ប្រជាពលរដ្ឋ ឱ្យមានការយល់ដឹងពីរបៀបនៃការទុកដាក់សំរាម ការញែកសំរាមឱ្យបានត្រឹមត្រូវផងដែរ៕
អត្ថបទ និងរូបភាព៖ ឃុត សៅ
សម្រួលអត្ថបទ៖ សេង ផល្លី
