កាលពីថ្ងៃទី០៧ ខែ មេសា ឆ្នាំ២០២០ លោក ចៅ ម៉ៅមុនី សមាជិកគណៈកម្មាធិការសាខាកាកបាទក្រហមកម្ពុជា ខេត្តសៀមរាប និង សហការី បានអញ្ជើញចុះជួបសំណេះសំណាលសួរសុខទុក្ខក្រុមគ្រូពេទ្យនៅតាមមណ្ឌលសុខភាព ។
ដោយមើលឃើញកង្វះខាតរបស់មណ្ឌលសុខភាព នូវអាល់កុល និង ម៉ាស់ សម្រាប់ប្រើប្រាស់ក្នុងការបំពេញការងារ ហើយការជួបសួរសុខទុក្ខនេះ គឺជាការរួមចំណែកក្នុងការប្រយុទ្ធប្រឆាំងនឹងជម្ងឺរលាកសួតប្រភេទថ្មី (Covid-19) ដោយលោកបាននាំយកអាល់កុល ដែលទទួលបានពីកាកបាទក្រហមកម្ពុជា និង ម៉ាស់មួយចំនួនរបស់សាខាផ្ដល់ជូនដល់មណ្ឌលសុខភាពដែរ ។
ក្នុងនាមតំណាងឯកឧត្តម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប លោក ចៅ ម៉ៅមុនី បានពាំនាំនូវការផ្ដាំផ្ញើសួរសុខទុក្ខពីសំណាក់សម្ដេចកិត្តិយព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដល់ក្រុមគ្រូពេទ្យនៅតាមមណ្ឌលសុខភាពទាំងពីរ និងបានថ្លែងអំណរគុណដល់លោកគ្រូ អ្នកគ្រូពេទ្យមណ្ឌលសុខភាពទាំងពីរ ដែលបានយកចិត្តទុកដាក់ខ្ពស់ ក្នុងការពិគ្រោះយោបល់ មើលថែ និង ព្យាបាលសុខភាពជូនដល់បងប្អូនប្រជាពលរដ្ឋនៅមូលដ្ឋាន ពិសេសការផ្ដល់សារអប់រំផ្សព្វផ្សាយអំពីជម្ងឺរលាកផ្លូវដង្ហើមប្រភេទថ្មី (Covid-19) ជូនដល់បងប្អូនប្រជាពលករដែលទើបត្រលប់មកពីក្រៅប្រទេស និង ប្រជាពលរដ្ឋទូទៅ ។
លោកបន្តថា អាល់កុល ដែលបានផ្ដល់ជូននាពេលនេះសាខាទទួលបានពីកាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន និងម៉ាស់ជារបស់សាខាផ្ទាល់ ហើយការផ្ដល់ជូននេះជាចំនួនមានកំណត់ តែនៅក្នុងដំណាក់កាលនេះយើងចាំបាច់ត្រូវចែករំលែកគ្នា ព្រោះស្ទើរតែគ្រប់មណ្ឌលសុខភាព គឺមានការខ្វះខាតដូចគ្នា ហើយនេះពិតជាការបង្ហាញពីការយកចិត្តទុកដាក់គិតគូរពីសំណាក់ថ្នាក់ដឹកនាំ ពិសេសកាកបាទក្រហមកម្ពុជា ក្នុងការចូលរួមប្រយុទ្ធនឹងជម្ងឺរលាកផ្លូវដង្ហើម (Covid-19) នេះ ។
អត្ថបទ និង រូបភាព ៖ ម៉ី សុខារិទ្ធ និង គឿន វេត
