ការសម្រេចលើកថ្ងៃ ឬផ្អាកការឈប់សម្រាក របស់កម្មករ និយោជិត ក្នុងឱកាសបុណ្យចូលឆ្នាំប្រពៃណីជាតិខ្មែរ របស់រាជរដ្ឋាភិបាល គឺជាវិធានការសមស្របមួយក្នុងការឆ្លើយតបទៅនឹងស្ថានភាពជាក់ស្តែង ដើម្បីបង្ការ និងទប់ស្កាត់ការឆ្លងរាលដាលជំងឺកូវីដ-១៩ នៅកម្ពុជា នេះបើតាមការលើកឡើងរបស់ លោក អ៊ូ សុខហេង ប្រធានសហព័ន្ធសហជីពសហប្រតិបត្តិការដើម្បីកម្ពុជា នៅថ្ងៃទី៩ ខែមេសា ឆ្នាំ២០២០នេះ ។
មានមតិស្រដៀងគ្នា ក្រុមសហជីពការពារផលប្រយោជន៍កម្មករ ក៏បានគាំទ្រការសម្រេចរបស់រាជរដ្ឋាភិបាល ផ្អាកការ ឈប់សម្រាក ក្នុងឱកាសបុណ្យចូលឆ្នាំប្រពៃណីខ្មែរ ក្នុងនោះរាជរដ្ឋាភិបាល នឹងផ្ដល់ថ្ងៃឈប់សម្រាកនេះវិញ នៅពេលសមស្របណាមួយ បន្ទាប់ពីជំងឺកូវីដ-១៩មានការធូរស្រាល ខណៈបច្ចុប្បន្នកម្ពុជា នៅតែបន្តរកឃើញមានករណីអ្នកឆ្លងថ្មីជាបន្តបន្ទាប់។
ដូចគ្នានេះ លោក សោម អូន ប្រធានសភាសម្ព័ន្ធសហជីពជាតិកម្ពុជា បានចាត់ទុកការសម្រេចចិត្តរបស់រាជរដ្ឋាភិបាលក្នុងការលើកពេលឈប់សម្រាកក្នុងពិធីបុណ្យចូលឆ្នាំប្រពៃណីជាតិខ្មែរនេះ គឺដើម្បីការពារសុខភាព មុខរបរ និងអាយុជីវិតរបស់កម្មករនិយោជិត មន្ត្រីរាជការ ក៏ដូចប្រជាពលរដ្ឋខ្មែរទាំងអស់នៅក្នុងប្រទេស ពីឆ្លងជំងឺកូវីដ-១៩។
ព័ត៌មានជាតិ ថ្មីៗ
ចំណែក លោក ថុល ណន ប្រធានសម្ព័ន្ធសហព័ន្ធសហជីពកម្ពុជា យល់ថា ស្ថានភាពបច្ចុប្បន្ន សហគ្រាស គ្រឹះស្ថាន ដែលនៅបើកដំណើរការ គឺជាកន្លែងដែលមានសុវត្ថិភាពបំផុត សម្រាប់កម្មករ និយោជិត។
បើតាមលោក លោក អូន គឹមសួ ប្រធានសហព័ន្ធសហជីពកម្មករដើម្បីអភិវឌ្ឍន៍ បង្ហាញថា ប្រសិនបើ កម្មករ និយោជិតរាប់ម៉ឺននាក់ ធ្វើដំណើរទៅជួបជុំគ្រួសារតាមភូមិឋាន ឱកាសនៃការឆ្លងរីករាលដាលជំងឺកូវីដ-១៩ នឹងកាន់តែមានភាគរយខ្ពស់ ហើយអាចនឹងបង្កហានិភ័យកាន់តែធ្ងន់ធ្ងរដល់សង្គមជាតិ និងសង្គមគ្រួសារ។
គួររំលឹកថា នៅដើមសប្តាហ៍នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា មានប្រសាសន៍ថា ការរៀបចំ ពិធីកំសាន្តសប្បាយនៅតាមទីធ្លាសាធារណៈ គឺមិនអនុញ្ញាត្តិឲ្យធ្វើនោះទេ ដើម្បីចៀសវាងការប្រមូលផ្តុំគ្នាច្រើន ដែលអាចប៉ះពាល់ដល់ការចម្លងមេរោគកូវីដ-១៩។ ប៉ុន្តែប្រជាពលរដ្ឋអាចប្រារព្ធពិធីទទួលទេវតាឆ្នាំថ្មីនៅតាមផ្ទះរៀងៗខ្លួនបាន ហើយអ្វីដែលរាជរដ្ឋាភិបាលសម្រេចដាក់ចេញពេលនេះ គឺដើម្បីធានានូវសុវត្ថិភាពអាយុជីវិតជូនប្រជាពលរដ្ឋ និងក្រុមគ្រួសារ ដើម្បីកុំឲ្យឆ្លងមេរោគផ្លូវដង្ហើមដ៏កាចសាហាវដែលកំពុងរីករាលដាលពេញពិភពលោក ក្នុងខណៈពុំទាន់មានវ៉ាក់សាំងសម្រាប់ចាក់ការពារ ឬថ្នាំពេទ្យសម្រាប់ព្យាបាល៕
អត្ថបទ និង រូបថត ៖ វិទ្យុជាតិកម្ពុជា
