រាជរដ្ឋាភិបាល សម្រេចបិទការធ្វើដំណើរឆ្លងកាត់ពីបណ្ដាស្រុក និងខេត្តនានាក្នុងប្រទេស រួមទាំងការធ្វើដំណើរចេញ-ចូលរាជធានីភ្នំពេញផងដែរ ចាប់ពីម៉ោង១២:០០អាធ្រាតឈានចូលថ្ងៃទី១០ រហូតដល់ថ្ងៃ១៦ ខែមេសា ឆ្នាំ២០២០ នេះបើតាម បទបញ្ជារបស់រាជរដ្ឋាភិបាលចេញនៅរសៀលថ្ងៃទី០៩ ខែមេសា ឆ្នាំ២០២០នេះ ។
បទបញ្ជា ស្ដីអំពីការដាក់កំហិត លើការធ្វើដំណើរក្នុងប្រទេស ក្នុងគោលដៅបង្ការ និងទប់ស្កាត់ការរាតត្បាតនៃជំងឺកូវីដ១៩ ចុះហត្ថលេខា ដោយសម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា បានអនុញ្ញាត ការធ្វើដំណើរផ្ទៃក្នុងរបស់រាជធានីភ្នំពេញនៅតែបន្ត និងអនុញ្ញាតការធ្វើដំណើរមួយចំនួនដូចជា៖
– រថយន្ត និងមធ្យោបាយធ្វើដំណើរមន្ត្រីរាជការស៊ីវិលគ្រប់ស្ថាប័នរដ្ឋ ទាំងថ្នាក់ជាតិ និងថ្នាក់ក្រោមជាតិ ក្នុងគោលបំណងបំពេញការងារប្រចាំថ្ងៃ ដែលម្ចាស់យានយន្ត ត្រូវបង្ហាញដល់កងកម្លាំងមានសមត្ថកិច្ចត្រួតពិនិត្យអត្តសញ្ញាណបណ្ណការងាររបស់ខ្លួន
– រថយន្តនិងមធ្យោបាយធ្វើដំណើររបស់កងកម្លាំងប្រដាប់អាវុធគ្រប់ប្រភេទក្នុងគោលដៅបំពេញភារកិច្ចរបស់ខ្លួន
– រថយន្តសង្គ្រោះបន្ទាន់របស់មន្ទីរពេទ្យរដ្ឋ និងឯកជន
– រថយន្តពន្លត់អគ្គីភ័យ
– រថយន្តបម្រើសេវាដឹកជញ្ជូនសំរាមនិងកាកសំណល់
– ការដឹកជញ្ជូនកម្មករទៅកាន់ទីតាំងការងារ នៅតាមរោងចក្រសហគ្រាស ដែលត្រូវមានបណ្ណអនុញ្ញាតចេញដោយក្រសួងការងារនិងបណ្ដុះបណ្ដាលវិជ្ជាជីវៈ ឬមន្ទីរការងារ និងបណ្ដុះបណ្ដាលវិជ្ជាជីវៈ
– ការធ្វើដំណើររបស់ប្រជាពលរដ្ឋទៅកាន់មន្ទីរពេទ្យ ឬមណ្ឌលសុខភាព ដែលនៅជិតបំផុត ដើម្បីទទួលបាន នូវសេវាសុខភាពចាំបាច់ និងបន្ទាន់ដោយកំណត់ចំនួនមនុស្សមិនលើសពី ០៤នាក់ សម្រាប់ករណីនីមួយៗ
គួរជម្រាបថា កាលដើមសប្ដាហ៍កន្លងមកនេះ រាជរដ្ឋាភិបាល ក៏បានសម្រេចលើកថ្ងៃឈប់សម្រាក របស់កម្មករ និយោជិត និងការជួបជុំនៅតាមទីសាធារណៈ ក្នុងឱកាសបុណ្យចូលឆ្នាំប្រពៃណីជាតិខ្មែរ ដើម្បីបង្ការ និងទប់ស្កាត់ការឆ្លងរាលដាលជំងឺកូវីដ-១៩ ខណៈបច្ចុប្បន្នកម្ពុជា នៅតែបន្តរកឃើញមានករណីអ្នកឆ្លងថ្មី នៃជំងឺនេះជាបន្តបន្ទាប់។
អត្ថបទ៖ សេង ផល្លី
