លោក ធា សថានី អនុប្រធានសហភាពសហព័ន្ធយុវជនកម្ពុជាខេត្តសៀមរាប បានឲ្យដឹងថា យុទ្ធនាការសៀមរាបផ្ទះខ្ញុំ ក្រោមប្រធាន បទ ការបញ្ជ្រាបការយល់ដឹងឆ្ពោះទៅសហគមន៍ ស្តីពីការទប់ស្កាត់ការចម្លង រីករាលដាល នៃវារុសកូវីដ១៩ ដែលមានសមាជិកចូលរួមជាង១០០នាក់ នៅថ្ងៃនេះ គឺមិនមែនជាលើកដំបូងនោះទេ ដែលយុទ្ធនាការសៀមរាបផ្ទះខ្ញុំ ត្រូវបានដំណើរការចូលរួមឃោសនាអប់រំ ជូនដល់ប្រជាជនក្នុងវិបត្តិកូវីដ១៩ ហើយក៏មិនត្រឹមតែបានធ្វើឡើងនៅក្រុងសៀមរាបនោះដែរ គ្រួសារសហភាពសហព័ន្ធយុវជនកម្ពុជា នៅតាមបណ្តាស្រុកនានាក្នុងខេត្តសៀមរាប ក៏បានចូលរួមយ៉ាងសកម្ម ជាមួយអាជ្ញាធរមូលដ្ឋាន។
លោក ធា សថានី បានឲ្យដឹងទៀតថា តាមការកត់សំគាល់ ការ ជួប ជុំបើកយុទ្ធនាការលើកនេះ មានទ្រង់ទ្រាយមិនធំដូចលើកមុនៗនោះទេ ដោយគោរពតាមគោលការណ៍នៃការប្រុងប្រយ័ត្នខ្ពស់ ក៏ប៉ុន្តែត្រូវបានផ្តោតទៅលើឆន្ទៈនៃការចូលរួម និងទទួលបានប្រសិទ្ធភាពនៃការអប់រំ ដាស់តឿនស្មារតីយល់ដឹងរបស់ប្រជាពលរដ្ឋ ឲ្យទទួលបាននូវការចងចាំថា កូវីត១៩ មិនមករកយើងទេ បើយើងមិនទៅរកវា ហើយវាក៏មិនមានការឆ្លងពីមនុស្សម្នាក់ទៅមនុស្សម្នាក់ទៀត ឬពីមនុស្សម្នាក់ចូលទៅក្នុងសហគមន៍នោះដែរ បើយើងមិនចម្លងវា ហើយយុទ្ធនាការនេះ ត្រូវបានចេញដំណើរឆ្ពោះទៅបង្ហាញ សារអប់រំនៅតាមបណ្តាគោលដៅសហគមន៍សង្កាត់ទាំង១២ ក្នុងក្រុងសៀមរាប ដោយត្រូវអនុវត្តក្នុង១សប្តាហ៍៣ថ្ងៃ រហូតដល់ វិបត្តិកូវីដ-១៩ វិលទៅរកសភាពស្ងប់ស្ងាត់ជាធម្មតាវិញ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
ព័ត៌មានជាតិ ថ្មីៗ
