កាលពីថ្ងៃទី០៩ ខែមេសា ឆ្នាំ២០២០ម្សិលមិញនេះ លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាប និងជាប្រធានក្រុមការងារចុះជួយមូលដ្ឋានឃុំជីក្រែង ស្រុកជីក្រែង រួមនឹងសហការី បានចុះផ្សព្វផ្សាយអំពីវិធានការការពារ ការឆ្លងមេរោគកូវិដ-១៩ ដល់ប្រជាពលរដ្ឋដែលត្រឡប់មកពីប្រទេសថៃ និងបានផ្តល់ជាម៉ាស់ អាកុល ឧបករណ៍វាស់កម្តៅ និងសាប៊ូ ដើម្បីឱ្យពួកគាត់យកទៅធ្វើអនាម័យឱ្យបានជាប្រចាំ រួមជាមួយការបាញ់ថ្នាំសម្លាប់មេរោគផងដែរ។
លោក ទា គឹមសុទ្ធ បានមានប្រសាសន៍ថា ដើម្បីធានាសុវត្ថិភាពដល់បងប្អូនប្រជាពលរដ្ឋនៅក្នុងភូមិ បងប្អូនដែលត្រឡប់មកពីប្រទេសថៃត្រូវនៅដាច់ដោយឡែកពីគ្រួសារចំនួន១៤ថ្ងៃ និងត្រូវអនុវត្តតាមវិធានការការពារឱ្យបានត្រឹមត្រូវ តាមការណែនាំរបស់ក្រសួងសុខាភិបាល ដូចជាការលាងដៃឱ្យបានស្អាតជានិច្ច ហើយបើមានរោគសញ្ញាសង្ស័យដូចជា ក្តៅខ្លួន ក្អក ហៀសំបោ ថប់ដង្ហើម ត្រូវទៅជួបគ្រូពេទ្យនៅមូលដ្ឋាន។
លោក ទា គឹមសុទ្ធ មានប្រសាសន៍បន្ថែមថា យើងមិនត្រូវធ្វេសប្រហែស និងការមើលស្រាលលើឥទ្ធិលពលរីករាលដាលនៃវីរុសកូវីដ-១៩នេះឡើយ ព្រោះការធ្វេប្រហែស បាននាំឱ្យពិភពលោកធ្លាក់ចូលក្នុងគ្រោះថ្នាក់ដែលមិនអាចគ្រប់គ្រងបាន ក្នុងនោះបណ្តាប្រទេសមួយចំនួននៅអ៊ឺរ៉ុប និងសហរដ្ឋអាមេរិក បានទទួលរងដោយសោកនាដកម្មយ៉ាងធ្ងន់ធ្ងរ ក្រោមការសម្លាប់មនុស្សយ៉ាងរង្គាលគួរឱ្យរន្ធត់ ដែលស្ថានភាពនោះ វាជាមេរៀនដ៏ជាក់ស្តែង ដែលរាជរដ្ឋាភិបាលកម្ពុជា កំពុងព្យាយាមពុះពារបញ្ជៀសស្ថានភាពដ៏អាក្រក់ទាំងនោះ មិនឱ្យកើតមាននៅកម្ពុជានោះឡើយ ហើយលោកក៏បានអំពាវនាវឱ្យបងប្អូនប្រជាពលរដ្ឋគ្រប់មជ្ឈដ្ឋាន មន្រ្តីរាជការ រួមគ្នាអនុវត្តវិធានការនានាឱ្យមានប្រសិទ្ធភាពដែលដាក់ចេញដោយក្រសួងសុខាភិបាល។
ព័ត៌មានជាតិ ថ្មីៗ
សូមបញ្ជាក់ថា គិតត្រឹមព្រឹកថ្ងៃទី០៩ ខែមេសា ឆ្នាំ២០២០ មានបងប្អូនប្រជាពលរដ្ឋដែលត្រឡប់មកពីប្រទេសថៃ ចូលមកក្នុងឃុំជីក្រែង ចំនួន៦៧នាក់ ក្នុងនោះអ្នកដែលបានឆ្លងផុត១៤ថ្ងៃមានចំនួន៥៣នាក់ និង ចំនួន១៤នាក់ទៀត កំពុងស្ថិតដាក់នៅដោយឡែក ៕
អត្ថបទ និង រូបថត ៖ លោក ឃុត សៅ
កែសម្រួលអត្ថបទ ៖ លោក លីវ សាន្ត
