កាលពីថ្ងៃទី១១ ខែមេសា ឆ្នាំ២០២០ លោកជំទាវ ទាង អេង-ទៀសីហា អនុប្រធានសាខាកាកបាទក្រហមកម្ពុជាខេត្តសៀមរាប បានដឹកនាំក្រុមការងារ ចុះសួរសុខទុក្ខប្រជាពលរដ្ឋរងគ្រោះដោយខ្យល់កន្ទ្រាក់ ចំនួន៣៧គ្រួសារ នៅឃុំតាសៀម និងឃុំកន្ទួត ស្រុកស្វាយលើ ខេត្តសៀមរាប។
មានប្រសាសន៍ នៅសាលាបឋមសិក្សាត្រពាំងថ្ម ឃុំតាសៀម លោកជំទាវអនុប្រធាន នាំយកនូវការសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាឯកឧត្តម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប ដែលតែងតែយកចិត្តទុកដាក់គិតគូរ ចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ។
ឆ្លៀតក្នុងឱកាសនោះ លោកជំទាវ ក៏បានលើកយកបញ្ហា ជំងឺឆ្លងកូវីដ១៩ កំពុងតែរីករាលដាលទូទាំងពិភពលោក និងនៅកម្ពុជាផងដែរ។ ក្នុងកាលៈទេសៈ ដ៏លំបាកនេះ រាជរដ្ឋាភិបាលកម្ពុជា ចាំបាច់ត្រូវសម្រេចផ្អាក ការប្រារព្ធពិធីចូលឆ្នាំថ្មីប្រពៃណីជាតិខ្មែរ រួមនិងលើថ្ងៃឈប់សម្រាករបស់មន្ត្រីរាជការ កម្មករ នយោជិកនៅទូទាំងប្រទេស លើសពីនោះ រាជរដ្ឋាភិបាលក៏បានដាក់បទបញ្ជា ការធ្វើដំណើរឆ្លងពីខេត្តមួយទៅខេត្ត ក្នុងប្រទេស អំឡុងពិធីបុណ្យចូលឆ្នាំថ្មីនេះផងដែរ។
ព័ត៌មានជាតិ ថ្មីៗ
លោកជំទាវពន្យល់បន្ថែមថា ពិធីបុណ្យចូលឆ្នាំ នៅប្រទេសចិន កាលពីដើមឆ្នាំ២០២០កន្លងទៅថ្មីនេះ គឺជាមេរៀនយ៉ាងជូរចត់របស់ប្រជាជន និងថ្នាក់ដឹកនាំចិន ដែលបានបង្កឲ្យមានការផ្ទុះឡើងនៃជំងឺផ្លូវដង្ហើមថ្មីកូវីត១៩ យ៉ាងធ្ងន់ធ្ងរ និងបានសម្លាប់ជីវិតមនុស្សរាប់ម៉ឺននាក់នៅទូទាំងពិភពលោក ត្រឹមតែរយៈ៣ខែប៉ុណ្ណោះ។ សោកនាដកម្មទាំងនោះ គឺជាមេរៀនសម្រាប់ពិភពលោក ព្រោះតែ មើលងាយជំងឺកូវីដ១៩ និងមានការធ្វេសប្រហែស ចំពោះការធ្វើដំណើរ និងជួបជុំគ្នា ដែលជាមូលហេតុនៃការចម្លង។
ក្នុងឱកាសចុះជួបប្រជាពលរដ្ឋ រងគ្រោះដោយសារខ្យល់កន្ទ្រាក់នោះដែរ លោកជំទាវ ក៏បាននាំយកម៉ាស និងអាល់កុល ចែកជូន គ្រូពេទ្យតាមមណ្ឌលសុខភាពចំនួន៥ និងប្រគេនចង្ហាន់ ដល់ព្រះសង្ឃចំនួន ២វត្ត ដែលកំពុងជួបការខ្វះខាតក្នុងស្ថានភាពនៃវិបត្តិកូវីដ-១៩ ក្នុងស្រុកស្វាយលើនេះផងដែរ។
អត្ថបទ និង រូបថត ៖ ងិន គឹមឡេង និង យូ វង្ស
កែសម្រួលអត្ថបទ ៖ សេង ផល្លី
