ស្របពេលក្រសួងសុខាភិបាល បានបង្ហាញនូវការព្រួយបារម្ភអំពីការឆ្លងរីករាលដាលជំងឺកូវីដ១៩ នៅក្នុងសហគមន៍ គណៈកម្មការប្រយុទ្ធប្រឆាំងជំងឺកូវីដ១៩ ខេត្តសៀមរាប បានបន្តផ្សព្វផ្សាយ ដល់អាជ្ញាធរភូមិ ត្រូវណែនាំដល់ប្រជាពលរដ្ឋ ទើបមកពីបរទេស ត្រូវស្នាក់់នៅដាច់ដោយឡែករយៈពេល ១៤ថ្ងៃ ដើម្បីបង្ការទប់ស្កាត់ការឆ្លងជំងឺកូវីដ១៩ នៅក្នុងមូលដ្ឋានរបស់ខ្លួន។
ក្នុងឱកាសជួបសំណេះសំណាលសួរសុខទុក្ខជាមួយមេភូមិ អនុភូមិ និងសមាជិកភូមិ ក្នុងឃុំចារឈូក ស្រុកអង្គរជុំ ខេត្តសៀមរាប នៅថ្ងៃទី១៥ ខែមេសាឆ្នាំ២០២០ នេះ លោក ពិន ប្រាកដ អភិបាលរងខេត្ត និងជាអនុប្រធានគណៈកម្មការប្រយុទ្ធប្រឆាំងជំងឺកូវីដ១៩ ខេត្តសៀមរាប បានការសរសើរចំពោះការខិតខំរបស់អាជ្ញាធរភូមិ ក្នុងការផ្សព្វផ្សាយនិងណែនាំប្រជាពលរដ្ឋក្នុងមូលដ្ឋានរបស់ខ្លួន ដែលទើបត្រឡប់ពីបរទេស ជាពិសេសប្រទេសថៃ ស្ម័គ្រចិត្តនៅដាច់ដោយឡែករយៈពេល ១៤ថ្ងៃ។ តែទោះបីជាយ៉ាងណាក៏ដោយ ប្រជាពលរដ្ឋមួយចំនួនតូច ជាពិសេសប្រជាពលរដ្ឋ ដែលបន្តត្រឡប់មកពីបរទេស នៅតែពុំទាន់ដឹង និងយល់ច្បាស់អំពីការដាក់ខ្លួនឯង នៅដាច់ដោយឡែកនេះនៅឡើយ។ បញ្ហានេះទាមទារ ឲ្យអាជ្ញាធរភូមិ ត្រូវបន្តពង្រឹងវិធានការ និងផ្សព្វផ្សាយដល់ពួកគាត់បន្ថែមទៀត។ លើសពីនោះ អាជ្ញាធរភូមិ នៅតែត្រូវបន្តស្រង់ចំនួនប្រជាពលរដ្ឋចំណូលថ្មី ក៏ដូចជាប្រជាពលរដ្ឋទើបត្រឡប់មកពីបរទេស ចូលមកស្នាក់នៅក្នុងមូលដ្ឋានរបស់ខ្លួន ទោះបីពិធីបុណ្យចូលឆ្នាំប្រពៃណីជាតិខ្មែរត្រូវបានបញ្ចប់ក៏ដោយ។
ទន្ទឹមនោះ លោកអភិបាលរងខេត្ត ក្នុងនាម ឯកឧត្តម ទៀ សីហា អភិបាលខេត្តសៀមរាប បាននាំយកអំណោយរួមមាន អង្ករ សាប៊ូ ម៉ាស មី និងថវិកាមួយចំនូន ប្រគល់ជូនអាជ្ញាធរភូមិ មកពី២០ភូមិក្នុងឃុំចារឈូក ក្នុងឱកាសពិធីបុណ្យចូលឆ្នាំប្រពៃណីជាតិខ្មែរ។
ព័ត៌មានជាតិ ថ្មីៗ
ឆ្លៀតក្នុងឱកាសនោះ លោកអភិបាលរងខេត្ត បានចុះទៅសួរសុខទុក្ខដល់ ប្រជាពលរដ្ឋ ដែលកំពុងស្នាក់នៅដាច់ដោយនៅទីតាំងចំនួន២ ក្នុងចំណោម ១៨ទីតាំងក្នុងស្រុកអង្គរជុំ ក្នុងនោះ ឃុំតាសោម សាលាបឋមសិក្សាតាសោម មានចំនួន១៦នាក់ និង នៅឃុំនគរភាស អនុវិទ្យាល័យនគរភាស មានចំនួន៦នាក់។ ក្នុងនោះលោកអភីបាលស្រុកអង្គរជុំ ក៏បាន កោតសរសើរ ដល់ប្រជាពលរដ្ឋ ដែលបានគិតគូរដល់មនុស្សនៅជុំវិញខ្លួននៅក្នុងសហគមន៍ និងស្ម័គ្រចិត្តមកស្នាក់នៅដាក់ដោយឡែកផងដែរ។
គួរបញ្ជាក់ថា គិតមកត្រឹមព្រឹកថ្ងៃទី១៥ ខែមេសានេះ នៅស្រុកអង្គរជុំ មានប្រជាពលរដ្ឋ ស្ម័គ្រចិត្តស្នាក់នៅដាច់ដោយឡែករយៈពេល១៤ថ្ងៃ សរុប ១៥៣នាក់។
សូមជម្រាបផងដែរថា រយៈពេល៣ថ្ងៃ អំឡុងពិធីបុណ្យចូលឆ្នាំប្រពៃណីជាតិខ្មែរ ចាប់ពីថ្ងៃទី១៣ ដល់ ១៥ ខែមេសា ឆ្នាំ២០២០ អាជ្ញាធរខេត្តសៀមរាប រួមនិងសហភាពសហព័ន្ធយុវជនខេត្តសៀមាប យុវជនស្ម័គ្រចិត្តគាំទ្ររាជរដ្ឋាភិបាល និងសប្បុរសជននានា បានចូលរួមផ្ដល់ជាអំណោយដល់ មេភូមិ អនុភូមិ និងសមាជិកភូមិ សរុប ៩៥២ភូមិ ក្នុងក្រុងស្រុកទាំង១២ នៃខេត្តសៀមរាប ដើម្បីជាការលើកទឹកចិត្ត ដល់អាជ្ញាធរ ដែលបាននិងកំពុងផ្សព្វផ្សាយ ណែនាំដល់ ប្រជាពលរដ្ឋក្នុងមូលដ្ឋានរបស់ខ្លួន បង្ការ ទប់ស្កាត់ជំងឺកូវិដ១៩ និងការស្ម័គ្រចិត្តដាក់ខ្លួនឲ្យនៅដាច់ដោយឡែក។
អត្ថបទ និង រូបថត ៖ សេង ផល្លី
