សម្រាប់ពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំជូត ទោស័ក ពុទ្ធសករាជ២៥៦៤ គណៈកម្មការវត្តចារឈូករង្សី ស្រុកអង្គរជុំ ខេត្តសៀមរាប ពុំមានរៀបចំកម្មវិធីជួបជុំ ឬលេងល្បែងប្រជាប្រិយដូចរាល់ឆ្នាំនោះទេ ទាំងនេះគឺជាការគោរពតាមបទបញ្ជា របស់រាជរដ្ឋាភិបាល ក្នុងការបង្ការទប់ស្កាត់ការឆ្លងរីករាលដាលនៃជំងឺកូវីដ១៩នៅកម្ពុជា និង ការពារឲ្យបាន នូវបាត់បង់ជីវិតប្រជាពលរដ្ឋកម្ពុជាដំបូងគេ ដោយសារជំងឺនេះ។
មានសង្ឃដីការ នៅថ្ងៃទី១៥ ខែមេសា ឆ្នាំ២០២០នេះ ព្រះបរិត្តកោវិទ វជិរប្បញ្ញោបណ្ឌិត សូម សាម៉ន ព្រះអនុគណស្រុកអង្គរជុំ និងជាព្រះគ្រូចៅអធិការវត្តចារឈូករង្សី ស្ថិតក្នុងឃុំចារឈូក ស្រុកអង្គរជុំ ខេត្តសៀមរាប បង្ហាញថា ជាទំនៀមតាំងពីបុរាណ និងជារៀងរាល់ឆ្នាំ ពុទ្ធបរិស័ទ នៅតែយកចង្ហាន់មកប្រគេនព្រះសង្ឃនៅទីអារាម ទោះមានបទបញ្ជាផ្អាកការប្រារព្ធពិធីបុណ្យចូលឆ្នាំថ្មីប្រពៃណីជាតិខ្មែរ ដើម្បីការពារប្រជាពលរដ្ឋពីការឆ្លងជំងឺកូវីដ១៩ របស់រាជរដ្ឋាភិបាលក៏ដោយ។
តាមការសង្កេត ព្រះគ្រូចៅអធិការ យល់ឃើញថា ប្រជាពលរដ្ឋចំណុះជើងវត្ត មានការយល់ដឹងច្រើន ក្នុងការធ្វើអនាម័យការពារដៃ ដោយលាងដៃនឹងសាប៊ូ ឬអាកុល និងមិនមានបង្ហាញពីអារម្មណ៍ អាក់អន់ស្រពន់ចិត្ត ដែលមានការអាក់ខាននៃការជួបជុំគ្នាលេងល្បែងកំសាន្តប្រជាប្រិយនោះឡើយ ទាំងនេះបានបង្ហាញពីប្រសិទ្ធភាព នៃការផ្សព្វផ្សាយរបស់រាជរដ្ឋាភិបាល រួមជាមួយវិធានការរបស់ក្រសួងសុខាភិបាល លើការបង្ការទប់ស្កាត់ការរីករាលដាលនៃជំងឺកូវីដ១៩ ទៅដល់សហគមន៍ និងកម្ពុជាទាំងមូល។
ព័ត៌មានជាតិ ថ្មីៗ
អត្ថបទ និង រូបភាព៖ ងិន គឹមឡេង
កែសម្រួល៖ សេង ផល្លី
