កិច្ចប្រជុំលើកទី ១ របស់ក្រុមការងារផលិត និងផ្សាយកម្មវិធី សិក្សាពីចម្ងាយ និងការ សិក្សាតាមប្រព័ន្ធអេឡិចត្រូនិក រវាងក្រសួងព័ត៌មាន និងក្រសួងអប់រំ យុវជន និងកីឡា ដើម្បី ពិនិត្យការងារ និងពិភាក្សាការងារអនុវត្ត បានធ្វើឡើងនៅព្រឹកថ្ងៃទី ១៧ ខែមេសា ឆ្នាំ២០២០ នៅទីស្តីការក្រសួងព័ត៌មាន ក្រោមវត្តមានអញ្ជើញជាអធិបតីភាព ឯកឧត្តម ខៀវ កាញារីទ្ធ រដ្ឋមន្ត្រី ក្រសួង ព័ត៌មាន ។
ក្រុមការងារបច្ចេកទេស ផលិត និងផ្សាយកម្មវិធី សិក្សាពីចម្ងាយ និងការសិក្សាតាម ប្រព័ន្ធអេឡិចត្រូនិក គឺភាគីក្រសួង ព័ត៌មាន ដឹកនាំដោយ ឯកឧត្តម កឹម គុណវឌ្ឍន៏ រដ្ឋលេខាធិការ ខាងភាគី ក្រសួង អប់រំយុវជន និងកីឡា ដឹកនាំ ដោយលោកជំទាវ គឹម សុថានី រដ្ឋលេខាធិការ ហើយជាជំហ៊ានដំបូង ក្រសួង អប់រំ ជាអ្នកផលិតរាល់មុខវិជ្ជាកម្មវិធីបង្រៀន ហើយយកមក ចាក់ផ្សាយនៅទូរទស្សន៏ជាតិកម្ពុជា និងApp ក្រសួង ព័ត៌មាន ។
តាមការបញ្ជាក់របស់ ឯកឧត្តម មាស សុភ័ណ្ឌ អនុរដ្ឋលេខាធិការ និងជាអ្នកនាំពាក្យ ក្រសួង ព័ត៌មាន បានលើកឡើងថា កិច្ចប្រជុំលើកទី ១ នេះរៀបចំឡើងស្របតាមអនុស្សារណៈនៃ ការយោគយល់រវាង ក្រសួង អប់រំ យុវជន និង កីឡា និង ក្រសួង ព័ត៌មាន ស្តីពីការរៀបចំផលិត និង ផ្សព្វផ្សាយ កម្មវិធី« ការសិក្សាពីចម្ងាយ Distance Learning» និង «ការសិក្សាតាមប្រព័ន្ធ អេឡិចត្រូនិច E-Learning» លើប្រព័ន្ធ ទូរទស្សន៏ជាតិកម្ពុជា និង App ក្រសួង ព័ត៌មាន ត្រូវបានធ្វើពិធី ចុះហត្ថលេខា ដោយ ឯកឧត្តម ខៀវ កាញារីទ្ធ រដ្ឋមន្ត្រី ក្រសួង ព័ត៌មាន និង ឯកឧត្តម ហង់ ជួនណារ៉ុន រដ្ឋមន្ត្រី ក្រសួង អប់រំ យុវជន និងកីឡា កាលពីព្រឹកថ្ងៃទី៨ ខែមេសា ឆ្នាំ២០២០ នាទីស្តីការ ក្រសួង អប់រំ យុវជន និងកីឡា ។ ដូច្នេះកិច្ចប្រជុំនាព្រឹកនេះ គឺធ្វើការ ពិភាក្សា ឈានទៅធ្វើការឯកភាពគ្នា សម្រេចចាក់ផ្សាយ កម្មវិធីរៀនពីចម្ងាយ និងការសិក្សា តាម ប្រព័ន្ធអេឡិចត្រូនិក តាមរយៈការចាក់ផ្សាយនៅទូរទស្សន៏ជាតិកម្ពុជា TVK 2 ដែលមាននៅក្នុងប្រព័ន្ធទូរទស្សន៍ Satellite តេជោ DTV និងតាមរយៈប្រព័ន្ធផ្សព្វផ្សាយ បែបទំនើប App ក្រសួង ព័ត៌មាន ដោយកំណត់យកថ្ងៃទី២០ ខែមេសា ឆ្នាំ២០២០ ជាថ្ងៃដំបូង នៃ ការចាក់ ផ្សាយ ចាប់ពីម៉ោង ៦ ព្រឹក ដល់១០យប់ និងមានការចាក់ផ្សាយឡើងវិញ រហូតដល់ ព្រឹកវិញ គឺ ២៤ ម៉ោង ជារៀងរាល់ថ្ងៃ។ សម្រាប់កម្មវិធិសិក្សាដែលគ្រោងធ្វើការ ចាក់ផ្សាយ មានការបង្រៀនពីថ្នាក់ទី ១ ដល់ថ្នាក់ទី១២ ។
ឯកឧត្តម រដ្ឋមន្រ្តី ខៀវ កាញារីទ្ធ បានបញ្ជាក់ថា នៅក្នុងដំណាក់កាលដែល មានការបិទ សាលារៀននៅទូទាំងប្រទេស ដោយសារការព្រួយបារម្ភ ពីការឆ្លងនៃ មេរោគ កូវីត១៩ ហើយសិស្សានុសិស្ស មិនបានមករៀននៅសាលានោះ ក្រសួង ព័ត៌មាន សហការជាមួយ ក្រសួង អប់រំ យុវជន និងកីឡា បានរៀបចំជាកម្មវិធី បង្រៀនពីចម្ងាយ E-LEARNING DISTANCE LEARNING នូវចំណេះដឹងទូទៅ សម្រាប់កុមារតូច រហូតដល់ធំ តាមរយៈ ការចាក់ផ្សាយតាមប្រព័ន្ធ Internet App ក្រសួង ព័ត៌មាន តាមរយៈប្រព័ន្ធ ទូរទស្សន៍ ផ្កាយរណប តេជោ ឌីធីវី ប៉ុស្តិ TVK 2 ដែលអាចឲ្យ សិស្សានុសិស្សបើកមើលបាន ដោយឥត គិត ថ្លៃ ហើយជាជំហ៊ានទៅមុខទៀត ក៏គ្រោងទៅ ស្ថានីយទូរទស្សន៍ ខ្សែកាប នៅភ្នំពេញ និងតាម បណ្តាខេត្ត ផងដែរ។
បន្ទាប់ពីបញ្ចប់កិច្ចប្រជុំរួចមក ក្រុមការងារបច្ចេកទេសផលិត និងផ្សាយកម្មវិធី សិក្សា ពី ចម្ងាយ និងការ សិក្សាតាមប្រព័ន្ធអេឡិចត្រូនិក រវាងក្រសួងព័ត៌មាន និងក្រសួងអប់រំ យុវជន និងកីឡា បានអញ្ជើញទៅពិនិត្យមើលស្ថានីយទូរទស្សន៍ ជាតិកម្ពុជា និង ស្ទូឌីយ៉ូ តេជោ ឌីធីវី ដែលជាកន្លែងចាក់ផ្សាយកម្មវិធីអប់រំពីចម្ងាយ ។
តាមការបញ្ជាក់របស់ ឯកឧត្តម បាន ភុធ ទីប្រឹក្សា ក្រសួង ព័ត៌មាន ប្រធានគ្រប់គ្រង ក្រុមហ៊ុន ទូរទស្សន៍ Satellite តេជោ DTV ប្រចាំ កម្ពុជា បាន បញ្ជាក់ពីកិច្ចសហការជាមួយ ក្រសួង ព័ត៌មាន កម្ពុជា ក្នុងការបង្រៀនពីចម្ងាយ E-Learning តាមរយៈការផ្សាយផ្ទាល់តាម ទូរទស្សន៍ តេជោ DTV ដែលពេលនេះខាង ក្រុមហ៊ុន បានត្រៀមរួចរាល់អស់ហើយ ក្នុងការ ជួយ លើផ្នែកបច្ចេកទេស ការផ្សាយ តាមរលកធាតុអាកាស និងប្រព័ន្ធផ្សព្វផ្សាយសង្គម ។
ឯកឧត្តម បាន ភុធ បានជម្រាប ជូនថា កិច្ចការងារនេះ លោកធ្លាប់បាន ធ្វើនៅប្រទេសថៃ កាល ពីជាង ១០ ឆ្នាំមុន និង ទទួលបានជោគជ័យផងដែរ។ ដូច្នេះក្នុង ឱកាសនេះ ក្រុមហ៊ុន លោកបាន ធ្វើកិច្ចសហការជាមួយ ក្រុមការងារ App ក្រសួង ព័ត៌មាន ដើម្បី ផ្សាយការបង្រៀនពីចម្ងាយ ហើយសង្ឃឹមថា នឹងទទួលបានការគាំទ្រច្រើនពី សិស្សានុសិស្ស និងប្រជាពលរដ្ឋ ដោយសារ បច្ចុប្បន្ន នៅកម្ពុជា មានអតិថិជន ប្រើប្រាស់ ប្រព័ន្ធ ទូរទស្សន៍ Satellite តេជោ DTV ចំនួន ប្រមាណ ៨ សែនគ្រឿង បើគិតអ្នកដែលទស្សនាវិញគឺមាន ប្រមាណ ជិត ៣ លាននាក់៕
អត្ថបទ និង រូបថត ៖ ក្រសួងព័ត៌មាន
