នៅព្រឹកថ្ងៃទី១៥ ខែមេសា ឆ្នាំ២០២០ ម្សិលមិញនេះ ឯកឧត្តម គុជ លីណា អនុប្រធានគណៈកម្មាធិការ សាខាកាកបាទក្រហមកម្ពុជាខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា ប្រធានគណៈកម្មាធិការសាខាខេត្តសៀមរាប បានអញ្ជើញជួបសំណេះសំណាលសួរសុខទុក្ខជាមួយក្រុមគ្រូពេទ្យ នៃមន្ទីរពេទ្យបង្អែកស្រុក និងតំណាងមណ្ឌលសុខភាពចំនួន ៨ក្នុងស្រុកក្រឡាញ់ ដោយបានប្រគល់ជូននូវអាកុល និងម៉ាស់មួយចំនួនដល់មណ្ឌលសុខភាពទាំង ៨ដើម្បីប្រើប្រាស់ក្នុងការបំពេញការងារ ក្នុងការប្រយុទ្ធប្រឆាំងនឹងជំងឺរលាកសួតប្រភេទថ្មី (Covid-19) ។ ហើយមណ្ឌលសុខភាពទាំង ៨រួមមាន៖ មណ្ឌលសុខភាព ក្រូចគរ ,មណ្ឌលសុខភាព រោងគោ ,មណ្ឌលសុខភាព តាអាន ,មណ្ឌលសុខភាព កំពង់ថ្កូវ ,មណ្ឌលសុខភាព ស្រណាល ,មណ្ឌលសុខភាព សំពៅលូន ,មណ្ឌលសុខភាព សំបួរ ,មណ្ឌលសុខភាព គោកស្នួល ។
មានប្រសាសន៍នាឱកាសនោះ ឯកឧត្តម គុជ លីណា ក៏បានពាំនាំនូវការផ្ដាំផ្ញើសួរសុខទុក្ខ ពីសំណាក់សម្ដេចកិត្តិយព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងឯកឧត្តម ទៀ សីហា ប្រធានគណៈកម្មាធិការសាខាខេត្តសៀមរាប ជូនចំពោះលោកគ្រូ អ្នកគ្រូពេទ្យនៅតាមមណ្ឌលសុខភាពខាងលើ និងបានថ្លែងអំណរគុណដល់លោកគ្រូ អ្នកគ្រូពេទ្យមណ្ឌលសុខភាពខាងលើ ដែលបានយកចិត្តទុកដាក់ខ្ពស់ ក្នុងការពិគ្រោះយោបល់មើលថែ និងព្យាបាលសុខភាពដូនដល់បងប្អូនប្រជាពលរដ្ឋនៅមូលដ្ឋាន ។ ពិសេស ការផ្ដល់សារអប់រំផ្សព្វផ្សាយអំពីជំងឺរលាកសួតប្រភេទថ្មី (Covid-19) ជូនដល់បងប្អូនប្រជាពលករ ដែលទើបត្រលប់មកពីប្រទេសជិតខាង និងប្រជាពលរដ្ឋទូទៅ ។
ឯកឧត្តម មានប្រសាសន៍បន្ថែមថា អាល់កុល និងម៉ាស់ ដែលបានផ្ដល់ជូននាពេលនេះ គឺបានពីកាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ហើយការផ្ដល់ជូននេះគឺចំនួនមានកំណត់ក៏ដោយ ប៉ុន្តែនៅក្នុងដំណាក់កាលនេះ យើងចាំបាច់ត្រូវចែករំលែកគ្នា ព្រោះស្ទើរតែគ្រប់មណ្ឌលសុខភាព គឺមានការខ្វះខាតដូចគ្នា ។ ហើយការផ្ដល់ជូននាឱកាសនេះ វាគឺជាការបង្ហាញឲ្យឃើញពីសកម្មភាព នៃការយកចិត្តទុកដាក់គិតគូរ ពីសំណាក់ថ្នាក់ដឹកនាំ ពិសេសកាកបាទក្រហមកម្ពុជា ក្នុងការចូលរួមប្រយុទ្ធនឹងជំងឺរលាកសួតប្រភេទថ្មី (Covid-19)នេះ ។
ព័ត៌មានជាតិ ថ្មីៗ
សូមបញ្ជាក់ថា សម្ភារដែលសាខាកាកបាទក្រហមកម្ពុជាសៀមរាប បានផ្ដល់ជូននាឱកាសនោះ គឺក្នុង ១មណ្ឌលសុខភាព រួមមាន៖ អាល់កុល ៥លីត្រ ម៉ាស់១០កញ្ចប់ស្មើនឹង៥០០ និងក្រមារម្នាក់ ១សម្រាប់លោកគ្រូ អ្នកគ្រូពេទ្យ ។ ហើយឆ្លៀតក្នុងឱកាសនេះ ឯកឧត្តមអនុប្រធានសាខា ក៏បានអញ្ជើញសួរសុខទុក្ខ និងផ្ដល់ជូននូវអំណោយមនុស្សធម៌មួយចំនួនដល់អ្នកជំងឺដែលកំពុងសម្រាកព្យាបាលនៅក្នុងមន្ទីរពេទ្យបង្អែកស្រុកក្រឡាញ់ផងដែរ ៕
អត្ថបទ និងរូបភាព ៖ រដ្ឋបាលខេត្តសៀមរាប
