កាលពីថ្ងៃទី១៥ ខែមេសា ឆ្នាំ២០២០ម្សិលមិញនេះ លោក សូ ប្លាតុង អភិបាលស្រុកប្រាសាទបាគង ជាប្រធានគណៈកម្មាធិការអនុសាខាកាកបាទក្រហមកម្ពុជាស្រុក និងលោក ទៀប ប៊ុនឈួយ ប្រធានក្រុមប្រឹក្សាស្រុក ជាប្រធានគណៈកម្មាធិការកិត្តិយសនៃអនុសាខារួមជាមួយ រួមជាមួយនឹងក្រុមការងារ បាននាំយកអំណោយសប្បុរសធម៌របស់អនុសាខា ជូនដល់គ្រួសារដែលលំនៅដ្ឋានរងគ្រោះដោយ សារអគ្គិភ័យ កាលពីថ្ងៃទី១៣ ខែមេសា ឆ្នាំ២០២០កន្លងទៅថ្មីៗនេះ គឺលោក ជា រុណ អាយុ៣១ឆ្នាំ ត្រូវជាប្ដី និងប្រពន្ធឈ្មោះ ជា ប្រាក់ អាយុ៣១ឆ្នាំ រស់នៅភូមិឃុនមោឃ ឃុំកណ្តែក ស្រុកប្រាសាទបាគង ។
អំណោយសប្បុរសធម៌ផ្តល់ជូនគ្រួសាររងគ្រោះរួមមាន៖ អង្ករ២៥ គីឡូក្រាម , ទឹកត្រី ១យួរ , ទឹកស៊ីអ៊ីវ ១យួរ , ទឹកសុទ្ធវីតាល់ ១កេស , មី១កេស , តង់១ , ធុង១ , កន្ទេល១ , មុង១ , ឆ្នាំងបាយ១ , ភួយ១ , ខ្នើយ១ , ចានដែក១ , ចានសម្ល៥ , ចានបាយ ៥ , ស្លាបព្រា ៥ , វែកបាយ១ , វែកសម្ល១ , ចានស្រាក់ ១ និងថវិកា ៦១០,០០០រៀល ។
សូមបញ្ជាក់ថា បើតាមរបាយការណ៍របស់នាយកដ្ឋានបង្ការ ពន្លត់អគ្គិភ័យ និងសង្គ្រោះ ក្រសួងមហាផ្ទៃ បានឲ្យដឹងថា ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ មានគ្រោះអគ្គិភ័យទូទាំងប្រទេស ចាប់ពីថ្ងៃទី១៣ ដល់ថ្ងៃទ១៦ ខែមេសា ឆ្នាំ២០២០២ នេះ ករណីគ្រោះអគ្គិភ័យបានកើតឡើងចំនួន០៧លើក បំផ្លាញផ្ទះអស់ចំនួន ១០ខ្នង បណ្តាលឱ្យមនុស្សស្លាប់ម្នាក់ និងរបួសម្នាក់ ព្រមទាំងខូចខាតអស់ទ្រព្យសម្បត្តិ និង សម្ភារប្រើប្រាស់ជាច្រើនទៀត ខណៈពិធីបុណ្យចូលឆ្នាំថ្មី កាលពីឆ្នាំ២០១៩ មានគ្រោះអគ្គិភ័យកើតឡើងចំនួន១៤លើក ៕
ព័ត៌មានជាតិ ថ្មីៗ
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក លីវ សាន្ត
