នៅព្រឹកថ្ងៃទី ២០ ខែមេសាឆ្នាំ ២០២០ នេះ ក្រុមវេជ្ជបណ្ឌិតជំនាញជំងឺកូវីដ១៩ នៅទីក្រុងអ៊ូ ហាន នៃសាធារណរដ្ឋប្រជាមានិតចិន បានរៀបចំជំនួបមួយតាមរយៈ វីដេអូតាមប្រព័ន្ធអ៊ិនធើណិត ឬហៅថា Video Conference ជាមួយនិង ក្រុមវេជ្ជបណ្ឌិតជំនាញកម្ពុជា នៃមន្ទីរពេទ្យមិត្តភាពខ្មែរសូវៀត មន្ទីរពេទ្យកុមារជាតិ មន្ទីរពេទ្យបង្អែកខេត្តបាត់ដំបង និងមន្ទីរពេទ្យបង្អែកសៀមរាប ក្រោមការសម្របសម្រួលដោយនាយកដ្ឋានទំនាក់ទំនងអន្តរជាតិ នៃក្រសួងសុខាភិបាលកម្ពុជា ដើម្បីធ្វើការចែករំលែកបទពិសោធន៍សំខាន់ៗមួយចំនួន ក្នុងការប្រយុទ្ធប្រឆាំង និង ព្យាបាលជំងឺកូវីដ១៩ ប្រកបដោយប្រសិទ្ធភាព។
បន្ទាប់ពីជំនួបរយៈពេល២ម៉ោង លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្ត និងប្រធានក្រុមការងារចត្តាឡីស័កខេត្តសៀមរាប បានវាយតម្លៃថា ជំនួបនេះ គឺជាការចែករំលែកដ៏មានសារសំខាន់ ទោះបីប្រទេសចិន និងកម្ពុជាស្ថិតនៅក្នុងទ្វីបអាស៊ីដូចគ្នា ប៉ុន្តែនៅក្នុងទីក្រុង អ៊ូ ហាន មានករណីអ្នកជំងឺកូវីដ១៩ ធ្ងន់ធ្ងរជាងនៅប្រទេសកម្ពុជា។ មួយវិញទៀត ដើម្បីឈានទៅលុបបំបាត់ជំងឺកូវីដ១៩នេះបាន លុះត្រាតែអាជ្ញាធរត្រូវកាត់ផ្ដាច់ឲ្យបាននូវការចម្លង។
លោកប្រធានមន្ទីរសុខាភិបាលខេត្ត លើកឡើងថា ទោះបីជា នៅប្រទេសកម្ពុជា ក៏ដូចនៅក្នុងខេត្តសៀមរាប ពុំទាន់មានករណី អ្នកកើតជំងឺកូវីដ១៩ មានសភាពធ្ងន់ធ្ងរ ដូចនៅប្រទេសចិន និងមានការធូរស្រាល ពីមួយថ្ងៃទៅមួយថ្ងៃក្ដី ក៏រាជរដ្ឋាភិបាលកម្ពុជា នៅតែបន្តប្រយុទ្ធប្រឆាំងនឹងជំងឺកូវីដ១៩ ដោយមិនបន្ធូរដៃឡើយ។
ព័ត៌មានជាតិ ថ្មីៗ
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
